"NO apay a nasuratko ti saritak," kinuna ni mannurat a naglemmeng iti nagan a Policarpio Uyucan, "assideg ngamin a malaglagipko ti maysa kadagiti ugalitayo a maipagtangsit iti asino man ken iti uray sadino man.  Awan ti kaibatoganna a pirak ti anag daytoy a kaugalian. Uray no sadino iti ayan, no adda timpuyog ken panagkaykaysa, adda man dumteng a pakaseknan, palag-anenna ti pannakairingpasna."

No apay a sapsapulenmi ti palawag nga aggapu iti makisalip no apay a nasuratna ti sarita a pakisalipna ket gapu iti adu a banag. Ngem kangrunaanna ti rason a kayatmi nga ammuen ken ni makisalip no ania ti mensahe a kayatna nga iburay iti panangputarna iti saritana.

"Winaswasko ti saritak iti pakasaritaan ti pinnateg ti tao ken ti tarakenna. Nga ti ayat ken panangipateg ket saan laeng  nga iti puso ti tao ti pagtaltalaytayanna, agkarkaradap met iti rikna ti ayup wenno uray pay ania nga umang-anges a parsua." kinuna pay ni Policarpio Uyucan.

Sapay koma ta saan a liplipatan ni mannurat a makisalip iti sarita nga iragpin ti ababa a palawagna. Saan a basehan daytoy iti pannakapili ti sarita a mangabak ngem mabalin ketdi a pakadiskalipikaan ni mannurat ta paset daytoy iti pagannurotan ti pasalip iti sarita.

No apay a nasurat ti sarita ket maysa a saludsod nga isapsapulan iti simple a sungbat, mabalin met a narabaw wenno nauneg nga anag, wenno uray ania man a banag a kayat nga ipadigo ni mannurat iti nagnaan wenno gapu a nasangalna ti saritana.

"Kayatko a ti saritak ket ipakita ken ipariknana ti ayat nga agtar-taray iti tao ken ayup; ayup ken ayup; tao ken tao ngem kangrunaanna ti maimatangan a patempateg. Dagiti ngamin dadduma no dadduma, gapu ta ayup, matrato met a kas ayup. Agbaliw koma daytan a nakem, saan a gapu ta ayup, ayup lattan. Panunoten koma nga adda met rikna dagiti ayup." innayon pay ni makisalip a mannurat.

Ti ketdi masaomi no apay a nasurat ni mannurat dayta a saritana ket maysa a nalawag a marka wenno pammaneknek iti panangipategna iti pagsasao a nariinganna. No apay a nasurat ni mannurat ti saritana? Dayta ti gapuna no apay a basaenmi ti sinuratna, pagyamananmi iti sakripisio ken kanitona ken panagraemmi iti kabaelan ken ayatna. 

No apay a nasurat ni mannurat ti saritana? Daytoy ti kanayon a saludsodmi ta napateg unay kadakami ti gapuananna. - RFAAFIL

Posted by rfaafil at 6:49 AM EST

Updated: Mon, Jan 21 2008 9:03 PM EST

Share This Post

Post Comment | Permalink

ADTOY ti listaan dagiti kasapaan a naisalip iti 6th RFAAFIL a mangtratar iti tema maipanggep iti tao ken ayup:

SARITA

"Nupay nailista ti paulo ti sarita wenno daniw kasta metten ti parbo a nagan ti autor, saanto a madakamat wenno mairakurak ditoy ti pudpudno a nagan ti autor malaksid no napili ti sinuratna wenno adda pammalubos nga aggapu a mismo kenkuana." - RFAAFIL

Posted by rfaafil at 3:19 AM EST

Updated: Thu, Jan 17 2008 4:00 AM EST

Share This Post

Post Comment | Permalink

HURADO KORNER
No mabalin koma, kayatko dagitoy sumaganad nga aghurado kadagiti sumaruno a pasalipyo:
     a. daniw: Ariel Agcaoili, Prodie Gar. Padios, ken Reynaldo Duque
     b. sarita: Cles Rambaud, Juan S.P. Hidalgo, Jr., ken Fernando Sanchez.
Agyamanak no maikkan iti importansia daytoy a singasingko. Komustakayo amin dita, apo. - Mindo 

[Agyamankami iti rekomendasionmo, Mindo. Bay-am ta padasenmi a pagtutugmoken dagitoy a hurado ita a tawen ngem saanmi a maipanamnama dayta, wen! Nabayagen a kayatmi nga agsasarak koma dagiti hurado iti Internet kas inrusatmi a gagem. Tinawen nga isaganami iti websitetayo ti pagadadanonan dagiti hurado ngem lima a tawenen ti napalabas, saanmi pay a nagun-od ti kayatmi koma a mapasamak. Ala ket, padasen latta a padasen. Isu ngarud a naiyanak ti RFAAFIL tapno agusar iti Internet.] 

PAGGATANGAN ONLINE
Ania, apo, ti napasamaken ti SAGUT 2. Nairuar kadi met laengen daytoy? Kayatmi koma ti gumatang. – Dex 

[Naipaigid bassit daytoy a proyekto, Dex. Adda laeng nakataktakanna.]  

PASALIP – 6^th RFAAFIL
Namindua nga impatulodko babaen ti e-mail ti pakisalipko iti address nga admin@rfaafil.com, kayatko koma laeng a maammuan no naawatyo daytoyen no adda pannakabalinna. - Tiktik R. Ubong 

[Nupay kasano ti ayatmi nga agsubalit kadagiti adu nga e-mail a maaw-awatmi, napaidam dagiti gundaway no dadduma. Ngem saanka a madanagan, Tiktik R. Ubong, ta naawatmin ti pakaisalipmo. Kadagiti nakaipatulod metten iti pakisalipna, kitaen laeng iti listaan dagiti naisalip a sarita iti 6^th RFAAFIL. Naawatmi metten ti pakisalipmo, Basa Metro; ken Laong Laan T. Padsan.  Iti sabali a bangir, kayatmi man a dakamaten ditoy ti kanayon a kunami a saanminto nga ibunannag ti kinasiasino ti mannurat iti likudan ti parbo a nagan malaksid no napili a mapadayawan ti sinuratna wenno adda pammalubos nga aggapu a mismo kenkuana. Saanmi metten a biang no ti mismo a mannurat ti mangibutaktak iti pannakisalipna.]   

MENSAHE
1.
Panagtamed daytoy iti saan a MALPAAG a panagayatmo iti patgentayo a literatura. Agasem, di pay naipudosan dagiti agdama a naisalip, adda manen sumaruno a pasalipmo. Ammok a daytoy binangonmo a TEDDEK ti literatura ket mataginayonto kadagiti panid ti pakasaritaan ti inatayo a Literatura Iluko. Sapay la koma ngarud ta agbiag nga agnanayon ti impasdekmo a monumentom. Agbiagka! Agbiag ti pamiliam a mangsupsuporta kenka. Agbiag ti RFAAFIL! Agbiag ti Literatura Ilokana! – Freddie

[Agyamankami, kabsat! Dakkel a banag ti tulongmo tapno agbiagkami!]

2.
Napintas unay daytoy websiteyo. Ngem di kad’ napimpintas no mabasa koma dagiti daniw a naipalaon ditoy, nangabak ken saan. Iti kasta mabasa ket mairaman met iti pagpilian iti readers choice ta sabali me’ ti taste ti agbasbasa kadagiti hurado. – Gregorio M.

[Awan karbenganmi kadagiti daniw a saan a napili, Gregorio M., isu a saanmi mabalin nga ipablaak.] 

3.
Would it be possible for someone to contact the writer Edilberto H. Angco to tell that his old friend and colleague Nic Sommer would like to renew contact. We worked together in the Philippines 1984-86. Please provide him my contact info. Thanks a lot!  – N. Sommer 

[Sapay koma ta mabasa ti maseknan daytoy mensahem, N. Sommer, tapno makontakmo isuna.]

 4.
Nastrekmi ti dadapilan.com babaen ditoy websiteyo, sir!. Maysa kadi pay daytoy kadagiti partuatyo? Lugayankayo iti nasayaat a panggepyo. Ad-adu koma pay ti kas kadakayo a sisasagana a mangipateg iti pagsasaotayo. – Nick 

[Saanmi nga aramid ti dadapilan.com, Nick. Kukua ken imatonan daytoy ni Apo Roy V. Aragon, mabigbig ken nalaing a mannurat.] 

TEMA TI 7^th RFAAFIL
Adtoy dagiti nairekomenda a tema para iti sumaruno a pasalip – 7^th RFAAFIL: 

Pakasaritaan ti panagballigi – Danny
Sarita para kadagiti ubbing – D. Laguesma
Kabibiag ti bannuar (soldado) – Jeff S.
Panagdappat – Leo
Pakpakatawa a sarita – Rosellette P.
Dagiti sabsabong – Vj
Dagiti mapaspasamak iti uneg ti pagadalan – Rilobedo
Pammateg iti pagilian – Simon

[Agsasabali ken adu dagiti nairekomenda a tema ngem dagitoy laeng ti daras a naukaganmi. Agtultuloy latta nga agawat ti secretariat ti RFAAFIL kadagiti suhestionyo. Iti man hurado, iti tema wenno iti ania man a kapanunotanyo.]

Posted by rfaafil at 7:25 AM EST

Updated: Sun, Jan 13 2008 6:36 AM EST

Share This Post

Post Comment | Permalink

2007 READER’S CHOICE AWARD

Paggugustok ti agbasa kadagiti daniw. Magustuak amin dagiti pagpilian iti Reader’s Choice  2007 ngem kaykayatko ti Kudos iti Ayatmo iti Bukodtayo a Dila kasta metten ti Sapulem iti Kulluong. Asino kadi ti nangabak? No rummuar man ti Essem, mabalin met latta. Di kadi nagmayat koma no mabasami a kas readers dagiti dadduma pay a naisalip. Apay a saanyo nga ipablaak ida iti rfaafil.com? - Mark C.

[Asidegen a rummuar ti resulta ti RCA 2007. Abangam laeng ti iruruarna ditoy rfaafil.com.] 

TEMA TI 6^th RFAAFIL – SARITA MAIPANGGEP ITI TAO KEN AYUP

Kuna ni reader: Tapno agbiag, kasapulan ti tao ti pammateg ti ayup ket kasapulan met ti ayup ti pammateg ti tao. Nalablabes pay ti it’den a pammateg ti ayup ngem ti pammateg ti tao. 

PERSONAL SITE

Naukagak ti aglemlemmeng a personal sitemo, kabsat! Nasayaat unay ta nasukainak daytoy tapno adda met pamalpalatpatak iti kinasiasino ti mangimatmaton iti RFAAFIL. Panagkunak, naubingka pay laeng no ibasarko kadagiti ladawan malaksid no daanen dagitoy. Makais-isemak idi basbasaek dagiti padasmo iti biag ken ti in-the-making pay laeng a prinsesam, uray pay ti eye contact. Maitugotak nga adda sense of humormo. Nakandaduan ketdin dagiti sinuratmo ta kayatko koma ida a basaen. – RMP 

[Talaga a managsukisokka, RMP. Nasangal dayta a site para kadakami ken ti pamiliami. Pagipempenan ken pagidulinanmi kadagiti bambanag a nakasagana a malukatan uray sadino iti ayanmi. Daytoy ita ti pagpintasan ti Internet. Saanen a kasapulan ti agitugot kadagiti records wenno dagiti naikur-it iti papel. Isu a panunoten a naimbag wenno pilien ketdi a nasayaat dagiti ipisok ta awanen ti privacy wenno confidentiality no naikabilen iti website.] 

BENNEG TI AGDADAMO

Nabasakon ti pagannurotan ti Benneg ti Agdadamo ngem amadek man no mano kadi ti panid ti aramiden a sarita. Napintas pay koma no adda retrato ti agdadamo a mannurat a maipaskil iti umokyo. Agyamanak unay. Happy New Year!  - MIB 

[Dika madanagan, MIB, ta no adda la ket isubmitir ti mannurat a ladawanna, inayonmi nga i-upload. No maipanggep met iti bilang ti panid ti sarita nga idatag, awan ti detaliado nga impanmi iti pagannurotan. Mabalin ti ababa a sarita. Happy new year met kenka!] 

A.N.A.K. TI RFAAFIL

Addaak ditoy Jeddah, K.S.A., nabayagen a kayatko ti agatendar iti GUMIL Filipinas kombension ngem saanko pay a naaramid dayta. Naragsak ngata ti makitabuno wenno makidinnakulap kadagiti pada a taga-Ilocos. Kayatko koma ti agbalin nga sponsor uray maysa laeng a mannurat para iti A.N.A.K. ti RFAAFIL (Addang Nga Agayab Kamannurat: Awis Nga Agpaay Kailokuan). Kasano kadi a mayawatko ti pagrebbengak no kas pagarigan?  - J. Bugarin 

[Ita pay laeng, idanonmi kenkan ti naimpapusuan a panagyamanmi, Mr. Bugarin. Ti PAYPAL ti ar-aramatenmi nga agkalap kadagiti donasion para iti proyektomi kangrunaanna ti A.N.A.K.. Mabalinmo nga aramaten dagiti link ti PAYPAL iti websitemi. Nasayaat met no subaybayam ti kallukat a Benneg ti Agdadamo tapno mapili wenno mabasam ti gapuanan ti mannurat a kayatmo nga esponsoran. Ni Apo Dios ti mangtarabay kenka!]

Posted by rfaafil at 4:43 PM EST

Updated: Fri, Jan 11 2008 9:55 PM EST

Share This Post

Post Comment | Permalink

KAYATMI man a palagipan dagiti agbasbasa iti 2007 RFAAFIL Reader’s Choice Award a mayat a mangibutos iti sarita wenno daniw a magustuanda. Tapno mairaman ti butosyo, basaen koma a naimbag ti pagannurotan ti RFAAFIL RCA 2007.

Adda bayad ti tunggal butos, Patgenmi nga Agbasbasa. Basaen koma dagiti palawagmi (Q & A) no apay nga adda gatad a kaibatogan ti kada butos. Kas nakunamin kadagiti agbasbasa a makiparpartisipar iti daytoy a proyekto, ibilangmi nga ayat ken gundawayyo a tumulong a mangpasantak iti Literatura Ilokana.

Kadagiti mayat nga agbutos, ag-e-mail laeng iti RFAAFIL (rfaafil@hotmail.com ken admin@rfaafil.com) wenno agusar kadagiti links no bilang ti aramaten ket credit card wenno PAYPAL tapno maidatag dagiti butos. Dagitoy laeng ti opisial a wagas tapno mairaman dagiti butosyo. Adda ngamin dagiti makiparpartisipar a saanda a sursuroten dagiti pagannurotan. Saan no kua a mairaman dagitoy a butos.

Naidasaren dagiti sarita ken daniw, Patgenmi nga Agbasbasa, para iti tinawen nga RFAAFIL Reader’s Choice Award. Awisendaka a mangbasa kadagitoy. Amangan ta adda kadagitoy dagiti sinurat a magustuam wenno pakaragsakam. Saanmo a palusposan ti gundaway a mabasam ti naguneg dagiti daniw ni ayat a: Barangabang, Essem, Kudos iti Ayatmo iti Bukodtayo a Dila, Sapulem ti Kulluong, ken, Yndependencia Y Revolucion.

Ken dagiti bugas ni ayat kadagiti sarita a: Ayat iti Panawen ti Ariangga; Basikaw, Pagutpot, Sukdip; Imeng ken Anglem iti Sakbibi ti Niebe; Panagbukar; ken, Yna.

Agpatingga iti tapos daytoy a tawen ti panagbutos. Ania pay laeng ti ur-urayem, Patgenmi nga Agbasbasa, makipartisipar iti 2007 Reader’s Choice Award.

Posted by rfaafil at 5:40 AM EDT

Share This Post

Post Comment | View Comments (1) | Permalink

MENSAHE: Madama nga isagsagana ti artikulo maipanggep iti resulta ti pasalip. Pagur-urayan, adtoy man iburaymi a padigo iti pasalip iti 5th RFAAFIL.

AMMOYO kadi a nagsusurot manen dagiti hurado ita a tawen iti magustuanda a sarita a mapadayawan iti umuna a gunggona?

Adda kadagitoy tallo a sarita ti nagustuan dagiti tallo a hurado a mangabak iti umuna a gunggona: Imeng ken Anglem iti Sakbibi ti Niebe; Ayat iti Panawen ti Ariangga; ken, Basikaw, Pagutpot, Sukdip.

[Magustuanmi dagitoy tallo a sarita. Uray ania kadagitoy ti mangabak iti umuna a gunggona. Ammoyo kadi a dagiti autor dagitoy tallo a sarita ket addaan iti initials a PGP, ASA ken JGR?]

Ammoyo kadi a ti autor ti Imeng ken Anglem iti Sakbibi ti Niebe ket adda idiay Canada? Ammoyo kadi a ti autor ti Ayat iti Panawen ti Ariangga ket adda idiay U.S.A.? Ammoyo kadi a ti autor ti Basikaw, Pagutpot, Sukdip ket adda idiay Ilocos Sur?

Iti met biang ti daniw, ammoyo kadi nga agsasabali iti #1 a pili dagiti tallo a hurado?

Dagitoy dagiti tallo a daniw iti #1 a pili dagiti tallo a hurado: Barangabang, Sapulem ti Kulluong, ken, Essem. Ania kadagitoy a daniw ti mapadayawan iti kangrunaan a gunggona?

[Magustuanmi met dagitoy tallo a daniw. Uray ania kadagitoy ti mangabak iti umuna a gunggona. Ammoyo kadi a dagiti met autor dagitoy tallo a daniw ket addaan iti initials a ASA, JMP, ken RVA?]

Ammoyo kadi a ti mannaniw ti Barangabang ket adda idiay U.S.A.? Ammoyo kadi a ti mannaniw ti Sapulem ti Kulluong ket adda idiay Cagayan? Ammoyo kadi a ti mannaniw ti Essem ket adda idiay Cagayan?

Posted by rfaafil at 5:40 AM EDT

Updated: Mon, Apr 2 2007 5:49 AM EDT

Share This Post

Post Comment | View Comments (2) | Permalink

ADTOY dagiti TOP 5 a Sarita ken Daniw iti maika-5 a tawen a panagpasalipmi. Kapudpudotanna, Patgenmi nga Agbasbasa, daytoy a resulta a naggapu kadagiti hurado. (Awan ti partikular a pannakaurnosda.)

SARITA

Yna – ni Nana

Imeng ken Anglem iti Sakbibi ti Niebe – ni Kofi-Hearty Sarmingly

Basikaw, Pagutpot, Sukdip – ni Inocente De Ti

Ayat iti Panawen ti Ariangga – ni Bannuar Agtarap

Panagbukar – ni Juan Dasig 

Sayang! Saan a simrek ti (dagiti) kayatmi a sarita. Ngem kas nakunamin, awan kadakami ti desision no di ket adda iti pangngeddeng dagiti hurado.  

DANIW 

Barangabang – ni Nasudi Francine

Essem – ni Shantih Shantih Shantih

Independencia Y Revolucion – ni An-anabo T. Ylocos

Kudos ti Ayatmo iti Bukodtayo a Dila – ni Sagibo de Amor

Sapulem ti Kulluong – ni Yang-yin 

Sayang manen! Saan a simrek ti(dagiti) kayatmi a daniw. Na-sandstorm sa! Wenno agpatingga lattan a lagip ni ayat. 

Padaananyo ti resulta ti pasalip! Uray dakami ket maganatan met a mangiruaren kadagiti mapadayawan ita a tawen.

Posted by rfaafil at 4:59 PM EDT

Updated: Sun, Apr 1 2007 5:04 PM EDT

Share This Post

Post Comment | Permalink

PARA kadagiti maganatan a makaammo iti resulta ti pasalip kangrunaanna iti daniw, adtoy dagiti sangapulo ket tallo (13) a nabati iti yakayakan dagiti hurado. Kitaemon, Patgenmi a Mannurat, no nakastrek pay ti gapuanam.

LUCKY 13 A DANIW

Anggulo 3 : Tallo-Suli a Pigura ni Ayat – ni Juan Abay-a

Ayat: Lagip: Ayat – ni Amor Callaguip

Barangabang – ni Nasudi Francine

Di Matay a Tedted ti Tudo – ni Anib

Dinak Idarum iti Pangukoman ti Daniw – ni Taga-Caba

Essem – ni Shantih Shantih Shantih

Independencia Y Revolucion – ni An-anabo T. Ylocos

Iti Temtem ti Duadua – ni Lei

Kasingin ti Sellag iti Hardin a Kayumanggi – ni Ridam Dignos

Kudos iti Ayatmo iti Bukodtayo a Dila – ni Sagibo de Amor

Sagibon’ Dara – ni Rettab ‘07

Sandstorm – ni Tarukoy T. Kadaratan

Sapulem ti Kulluong – ni Yang-yin

Daytoy a listaan iti ngato ket opisial a naggapu kadagiti hurado. Padaananyo dagiti mangabak.

----------------

MENSAHE: Dagitoy ket bukodmi a paliiw kas maysa nga esponsor, nanumo a mannurat ken gagangay nga agbasbasa kadagiti naisalip ita a tawen. Awan sabali a pinanggepmi no di laeng mangted iti sangkapirgis nga impormasion kadagiti naisalip ken mangted iti pagliwliwaanyo bayat iti panaguray iti resulta ti pasalip.

No adda man dagiti nagkamtudanmi, pagpaspasensiaandakami. Awan sabali a pampanunotenmi no di ti pagragsakan dagiti agbasbasa a sumangbay ditoy pagtaenganmi iti Internet.

KADAGITI 13 a daniw a nadakamat iti ngato, magustuanmi amin ida. Ngem adda met bukodmi a pili. Lima laeng dagiti mapadayawan ngem mabalin nga adda mainayon a pammadayaw depende iti pangngeddeng dagiti hurado.

Dagitoy ti bukodmi a pili nga awan ti partikular a panagsaganadda: Essem, Sandstorm, Ayat: Lagip: Ayat, Di Matay a Tedted ti Tudo, Sapulem ti Kulluong, Barangabang, Sagibon' Dara, ken, Independencia Y Revolucion.

Magustuanmi met ti Kudos ti Ayatmo iti Bukodtayo a Dila. Ngem ipaigidmi daytoy a daniw ta daniw daytoy a maipaay kadakami. Napintas koma daytoy a daniw no naisalip idi iti salip ti daniw a mairuknoy iti RFAAFIL. Ngem nupay kasta, adda karbengan daytoy a daniw a lumaban agsipud ta trinatarna met ti tema nga ayat.

Kadagiti inagapadmi a magustuanmi, kangrunaan unay a daniw a nangtugkik kadakami ti daniw a Sapulem ti Kulluong. Paulo pay laeng, ammomon ti isimsimbolona. Simple ti daniw ngem nadagsen ti timbangna. Iba ang dating, kunada iti Tagalog.

Ania ngata?  Magustuanto ngata met dagiti hurado ti daniw a Sapulem...?  Uray ngata pumustaak, adda gunggona a masukdal daytoy a sinurat ni mannurat a naglinged iti parbo a nagan a Yang-yin. Sapulemon ti Premio, Patgenmi a Mannurat!

Posted by rfaafil at 4:50 AM EDT

Updated: Sun, Apr 1 2007 4:55 AM EDT

Share This Post

Post Comment | Permalink

MENSAHE: Dagitoy ket bukodmi a paliiw kas maysa nga esponsor, nanumo a mannurat ken gagangay nga agbasbasa kadagiti naisalip ita a tawen. Awan sabali a pinanggepmi no di laeng mangted iti sangkapirgis nga impormasion kadagiti naisalip ken mangted iti pagliwliwaanyo bayat iti panaguray iti resulta ti pasalip.

No adda man dagiti nagkamtudanmi, pagpaspasensiaandakami. Awan sabali a pampanunotenmi no di ti pagragsakan dagiti agbasbasa a sumangbay ditoy pagtaenganmi iti Internet.

UMANAYEN a ragsakmi no adda maparuar a naisangsangayan a sarita. Umanayen a mangpakired kadakami iti pannakaupay ken mangagas kadakami iti bannogmi.

Ket adtoy manen sabali pay a dua a sarita a namnamaenmi a makapatar iti pagrukodan a sapsapulenmi. Adtoy dagiti paset nga iburaymi kadagiti agbasbasa.

----------------

#I

INANG, apay nga addaka ditoy?

Yur-urayka, ballong.  Darsem, sakbay a maladaw ti amin...

P-papananta?

Agawidtan...

Nagkibinda. Ngem idi umaddangda, kellaat a nagbalin a baket nga agkubkubbo ken nakakutkuttong ti inana a marigatan a magna...

N-nabatik 'tay sarukodko, ballong. Agal-alak a magna... 

Bayabayenka, Inang. Siak ti sarukodmo... 

Agyamanak, Nakkong...

Ne, kellaat metten a napisi ti dalanta, Inang?

Sadino ti dalanenta?

Dayta marmolisado nga atiddog nga agdan nga agpababa, agturong iti pamiliam. Yur-uraydaka. Dayta agpangato nga agdan a nakumotan kadagiti ulep, yur-uraynak ti amam idiay ungtona... 

Ni tatang? Ket no idi pay kasangapulo a tawen a dimmaga? 

Adda kenka no palugodannakon a mapan kenkuana. Wenno itugotnak dita agdan nga agpababa... 

Inarakupna ti inana. Ngem nagasug iti nakasasaem ti baket... 

Inang? Inangko? Inangkooo!

#II

NAIPATUGAWEN ti kaldero iti naikadkad a dapo idi lumaem ni Lakay Binong.  Nakitana ni Mercy nga aggalgalip, a tunggal dilpatan ti lumabbasit a dila ti apuy ti ubet ti nakasaang a banga, rumangrangrang ti minar ti anakna.

Pinagari ti lakay ti ulimek iti nagbabaetanda. Riniknana ti aglawlaw. Nakaturog ti lukmo, aburido met ti buridek a mangkuditkudit iti umamarilion ti marisna a libro. Tepteppelan ti balasangna ti saibbekna?

Tinurongna ti bangsal. Kimmaud ti sangaungot iti malabi. Sinam-it ti karabukobna ti nalamiis a danum.

Pimmasaren dagiti agkaka. Pinagtimkan itay ni Mercy nga agsasangodan ngem nagkedked. Imbagana nga isu’t mangsublat a mangbantay iti nakaidda; inyalaanna iti sangaduyog sa inkagumaanna a pinatugaw; nakasanggir iti tinabid a diding. Marmaratubbog dagiti luana a nangmatmat iti anakna. Lumlummuag ti panagriknana iti asi; nga iti lansad dayta, nakalinlinak a gura a mangkibkibkib iti sagbabassit ti kinataona. No koma landok ti pangyariganna iti bagina, isuda dagitay lati a kimpet.

Agtigtig-aben ti buridek. Ammona, nalpasen dagiti agkaka. Kinita ti pakpakanenna. Arigna di pay namki ti duyog. Manen, rinimbawan ti asi ti panunotna. Ad-adu ngamin ti rumtab iti ngiwat ni Pilar ngem ti maipunegna.

“Ala siakon, tatang, ti mangituloy. Inkayo manganen, ket adun sa ti awatyo ita a masukdipan,” siniggawat ni Mercy ti duyog. Nagtugaw iti iking ti katre.

Minirana ti anakna. Addaan daytoy iti nasidap a mata ngem kasla kumaykayakayda ita. “Dinak pakaringgoran, anakko. Addayta laeng ta kaldero, ne. Apagbiit la ti kumammet,” impatalgedna.

Nagari ti ulimek iti nagbaetanda a sagpaminsan pirsapirsayen ti panagbuabo ni Pilar a mangan.

"Ay wen gayam, anakko. Ita man pay a nasapaka a nagawid?" nadlawna ti pannakakilga ni Mercy.

Tumbog ta tumbogen ti lua ti anakna. “Ama, diak kadi pakabasolan no diak nadakdakamat nga ita ti maudi nga aldawko iti trabahok. Agkiskissayda.”

Maawatanna ti sasaaden ti anakna. Ngem kasla nagkuppit ti barukongna. Anian a dagsen ti paspasarenda a rigat!

----------------

Dagiti laeng autor dagitoy a sarita ti makaammo a magustuanmi ti sinuratna. A makapatar iti pagrukodan iti kinaisangsangayan ti sarita a mangagas iti bannogmi. Agyamankami, Patgenmi a Mannurat, iti daytoy a gapuanam. Sapay koma ta magustuanto met daytoy dagiti hurado.

Good luck, Appo a Mamannurat!

Posted by rfaafil at 3:13 PM EDT

Updated: Sat, Mar 31 2007 3:18 PM EDT

Share This Post

Post Comment | Permalink