NAISANGSANGAYAN A SARITA: AGAS TI BANNOG (PART III)
Topic: Pasalip
MENSAHE: Dagitoy ket bukodmi a paliiw kas maysa nga esponsor, nanumo a mannurat ken gagangay nga agbasbasa kadagiti naisalip ita a tawen. Awan sabali a pinanggepmi no di laeng mangted iti sangkapirgis nga impormasion kadagiti naisalip ken mangted iti pagliwliwaanyo bayat iti panaguray iti resulta ti pasalip.
No adda man dagiti nagkamtudanmi, pagpaspasensiaandakami. Awan sabali a pampanunotenmi no di ti pagragsakan dagiti agbasbasa a sumangbay ditoy pagtaenganmi iti Internet.
UMANAYEN a ragsakmi no adda maparuar a naisangsangayan a sarita. Umanayen a mangpakired kadakami iti pannakaupay ken mangagas kadakami iti bannogmi.
Ket adtoy manen sabali pay a dua a sarita a namnamaenmi a makapatar iti pagrukodan a sapsapulenmi. Adtoy dagiti paset nga iburaymi kadagiti agbasbasa.
----------------
#I
INANG, apay nga addaka ditoy?
Yur-urayka, ballong. Darsem, sakbay a maladaw ti amin...
P-papananta?
Agawidtan...
Nagkibinda. Ngem idi umaddangda, kellaat a nagbalin a baket nga agkubkubbo ken nakakutkuttong ti inana a marigatan a magna...
N-nabatik 'tay sarukodko, ballong. Agal-alak a magna...
Bayabayenka, Inang. Siak ti sarukodmo...
Agyamanak, Nakkong...
Ne, kellaat metten a napisi ti dalanta, Inang?
Sadino ti dalanenta?
Dayta marmolisado nga atiddog nga agdan nga agpababa, agturong iti pamiliam. Yur-uraydaka. Dayta agpangato nga agdan a nakumotan kadagiti ulep, yur-uraynak ti amam idiay ungtona...
Ni tatang? Ket no idi pay kasangapulo a tawen a dimmaga?
Adda kenka no palugodannakon a mapan kenkuana. Wenno itugotnak dita agdan nga agpababa...
Inarakupna ti inana. Ngem nagasug iti nakasasaem ti baket...
Inang? Inangko? Inangkooo!
#II
NAIPATUGAWEN ti kaldero iti naikadkad a dapo idi lumaem ni Lakay Binong. Nakitana ni Mercy nga aggalgalip, a tunggal dilpatan ti lumabbasit a dila ti apuy ti ubet ti nakasaang a banga, rumangrangrang ti minar ti anakna.
Pinagari ti lakay ti ulimek iti nagbabaetanda. Riniknana ti aglawlaw. Nakaturog ti lukmo, aburido met ti buridek a mangkuditkudit iti umamarilion ti marisna a libro. Tepteppelan ti balasangna ti saibbekna?
Tinurongna ti bangsal. Kimmaud ti sangaungot iti malabi. Sinam-it ti karabukobna ti nalamiis a danum.
Pimmasaren dagiti agkaka. Pinagtimkan itay ni Mercy nga agsasangodan ngem nagkedked. Imbagana nga isu’t mangsublat a mangbantay iti nakaidda; inyalaanna iti sangaduyog sa inkagumaanna a pinatugaw; nakasanggir iti tinabid a diding. Marmaratubbog dagiti luana a nangmatmat iti anakna. Lumlummuag ti panagriknana iti asi; nga iti lansad dayta, nakalinlinak a gura a mangkibkibkib iti sagbabassit ti kinataona. No koma landok ti pangyariganna iti bagina, isuda dagitay lati a kimpet.
Agtigtig-aben ti buridek. Ammona, nalpasen dagiti agkaka. Kinita ti pakpakanenna. Arigna di pay namki ti duyog. Manen, rinimbawan ti asi ti panunotna. Ad-adu ngamin ti rumtab iti ngiwat ni Pilar ngem ti maipunegna.
“Ala siakon, tatang, ti mangituloy. Inkayo manganen, ket adun sa ti awatyo ita a masukdipan,” siniggawat ni Mercy ti duyog. Nagtugaw iti iking ti katre.
Minirana ti anakna. Addaan daytoy iti nasidap a mata ngem kasla kumaykayakayda ita. “Dinak pakaringgoran, anakko. Addayta laeng ta kaldero, ne. Apagbiit la ti kumammet,” impatalgedna.
Nagari ti ulimek iti nagbaetanda a sagpaminsan pirsapirsayen ti panagbuabo ni Pilar a mangan.
"Ay wen gayam, anakko. Ita man pay a nasapaka a nagawid?" nadlawna ti pannakakilga ni Mercy.
Tumbog ta tumbogen ti lua ti anakna. “Ama, diak kadi pakabasolan no diak nadakdakamat nga ita ti maudi nga aldawko iti trabahok. Agkiskissayda.”
Maawatanna ti sasaaden ti anakna. Ngem kasla nagkuppit ti barukongna. Anian a dagsen ti paspasarenda a rigat!
----------------
Dagiti laeng autor dagitoy a sarita ti makaammo a magustuanmi ti sinuratna. A makapatar iti pagrukodan iti kinaisangsangayan ti sarita a mangagas iti bannogmi. Agyamankami, Patgenmi a Mannurat, iti daytoy a gapuanam. Sapay koma ta magustuanto met daytoy dagiti hurado.
Good luck, Appo a Mamannurat!
Posted by rfaafil
at 3:13 PM EDT
Updated: Sat, Mar 31 2007 3:18 PM EDT