Topic: Pasalip
"Dakkel a pakaidayawan 'toy numo ta napili dagiti agbasbasa ti saritak ket isu't napusgan a mangabak iti Reader's Choice itoy a tawen - 2007," kinuna ni Jaime G. Raras, ti Candon City, Ilocos Sur. Mapadayawan nga umawat iti RFAAFIL 2007 Reader's Choice Award para iti sarita babaen ti sinuratna a Basikaw, Pagutpot, Sukdip. "Panamatik nga adda talibagok ti tunggal mannurat, adda bukel ti kinapudno a kayatna nga iburay isu a nangbukel iti maysa a sarita. Iti biangko kas maysa a mannurat, dakkel a paratignay ti mapalpaliiwko iti aglawlaw - dagiti kapadasan dagiti mailupitlupit a tao, a binuyogan iti makapaaliaw a social injustices, dagiti rabrabak iti kinapudno ken kinatao - amin dagitoy napateg a linabag tapno maadalan ti maysa nga agbasbasa."
"Kayatko nga ibisik nga awan ti narigat a banag no addaantayo iti kinapinget; kas laengen ti maysa nga eksena iti sarita: "no addaantayo iti adu nga ayat, nalaka ti mamakawan (ken mangawat iti kinapudno); ngem kasapulan ti adu a kinapakumbaba no datayo ti dumawat iti pammakawan."
"Ti eskuela a pagpapaayak ket maysa met a pamilia, maysa a kangrunaan a pagubbogan ti ayat. Ngarud, kas maysa a mangisursuro, adu ti "annaktayo" a mabalin nga ibagnostayo tapno agbalindanto met a maipagpampannakkel. Ikkantayo, no mabalin, itasarantayo pay ida iti lapis tapno ikur-itda met dagiti kinapudno nga agbatbatay iti isipda. Iti kasta, mawayawayaanda iti kawar ni kinaignorante. Ket agbalinda a masirib."
"Makawayawaya ngamin ti kur-it ti lapis a buyogan ti nadarisay nga ayat."
Posted by rfaafil
at 6:58 PM EST
Updated: Mon, Jan 14 2008 4:37 AM EST
