KAYATMI man a palagipan dagiti agbasbasa iti 2007 RFAAFIL Reader’s Choice Award a mayat a mangibutos iti sarita wenno daniw a magustuanda. Tapno mairaman ti butosyo, basaen koma a naimbag ti pagannurotan ti RFAAFIL RCA 2007.

Adda bayad ti tunggal butos, Patgenmi nga Agbasbasa. Basaen koma dagiti palawagmi (Q & A) no apay nga adda gatad a kaibatogan ti kada butos. Kas nakunamin kadagiti agbasbasa a makiparpartisipar iti daytoy a proyekto, ibilangmi nga ayat ken gundawayyo a tumulong a mangpasantak iti Literatura Ilokana.

Kadagiti mayat nga agbutos, ag-e-mail laeng iti RFAAFIL (rfaafil@hotmail.com ken admin@rfaafil.com) wenno agusar kadagiti links no bilang ti aramaten ket credit card wenno PAYPAL tapno maidatag dagiti butos. Dagitoy laeng ti opisial a wagas tapno mairaman dagiti butosyo. Adda ngamin dagiti makiparpartisipar a saanda a sursuroten dagiti pagannurotan. Saan no kua a mairaman dagitoy a butos.

Naidasaren dagiti sarita ken daniw, Patgenmi nga Agbasbasa, para iti tinawen nga RFAAFIL Reader’s Choice Award. Awisendaka a mangbasa kadagitoy. Amangan ta adda kadagitoy dagiti sinurat a magustuam wenno pakaragsakam. Saanmo a palusposan ti gundaway a mabasam ti naguneg dagiti daniw ni ayat a: Barangabang, Essem, Kudos iti Ayatmo iti Bukodtayo a Dila, Sapulem ti Kulluong, ken, Yndependencia Y Revolucion.

Ken dagiti bugas ni ayat kadagiti sarita a: Ayat iti Panawen ti Ariangga; Basikaw, Pagutpot, Sukdip; Imeng ken Anglem iti Sakbibi ti Niebe; Panagbukar; ken, Yna.

Agpatingga iti tapos daytoy a tawen ti panagbutos. Ania pay laeng ti ur-urayem, Patgenmi nga Agbasbasa, makipartisipar iti 2007 Reader’s Choice Award.

Posted by rfaafil at 5:40 AM EDT

Share This Post

Post Comment | View Comments (1) | Permalink

MENSAHE: Madama nga isagsagana ti artikulo maipanggep iti resulta ti pasalip. Pagur-urayan, adtoy man iburaymi a padigo iti pasalip iti 5th RFAAFIL.

AMMOYO kadi a nagsusurot manen dagiti hurado ita a tawen iti magustuanda a sarita a mapadayawan iti umuna a gunggona?

Adda kadagitoy tallo a sarita ti nagustuan dagiti tallo a hurado a mangabak iti umuna a gunggona: Imeng ken Anglem iti Sakbibi ti Niebe; Ayat iti Panawen ti Ariangga; ken, Basikaw, Pagutpot, Sukdip.

[Magustuanmi dagitoy tallo a sarita. Uray ania kadagitoy ti mangabak iti umuna a gunggona. Ammoyo kadi a dagiti autor dagitoy tallo a sarita ket addaan iti initials a PGP, ASA ken JGR?]

Ammoyo kadi a ti autor ti Imeng ken Anglem iti Sakbibi ti Niebe ket adda idiay Canada? Ammoyo kadi a ti autor ti Ayat iti Panawen ti Ariangga ket adda idiay U.S.A.? Ammoyo kadi a ti autor ti Basikaw, Pagutpot, Sukdip ket adda idiay Ilocos Sur?

Iti met biang ti daniw, ammoyo kadi nga agsasabali iti #1 a pili dagiti tallo a hurado?

Dagitoy dagiti tallo a daniw iti #1 a pili dagiti tallo a hurado: Barangabang, Sapulem ti Kulluong, ken, Essem. Ania kadagitoy a daniw ti mapadayawan iti kangrunaan a gunggona?

[Magustuanmi met dagitoy tallo a daniw. Uray ania kadagitoy ti mangabak iti umuna a gunggona. Ammoyo kadi a dagiti met autor dagitoy tallo a daniw ket addaan iti initials a ASA, JMP, ken RVA?]

Ammoyo kadi a ti mannaniw ti Barangabang ket adda idiay U.S.A.? Ammoyo kadi a ti mannaniw ti Sapulem ti Kulluong ket adda idiay Cagayan? Ammoyo kadi a ti mannaniw ti Essem ket adda idiay Cagayan?

Posted by rfaafil at 5:40 AM EDT

Updated: Mon, Apr 2 2007 5:49 AM EDT

Share This Post

Post Comment | View Comments (2) | Permalink

ADTOY dagiti TOP 5 a Sarita ken Daniw iti maika-5 a tawen a panagpasalipmi. Kapudpudotanna, Patgenmi nga Agbasbasa, daytoy a resulta a naggapu kadagiti hurado. (Awan ti partikular a pannakaurnosda.)

SARITA

Yna – ni Nana

Imeng ken Anglem iti Sakbibi ti Niebe – ni Kofi-Hearty Sarmingly

Basikaw, Pagutpot, Sukdip – ni Inocente De Ti

Ayat iti Panawen ti Ariangga – ni Bannuar Agtarap

Panagbukar – ni Juan Dasig 

Sayang! Saan a simrek ti (dagiti) kayatmi a sarita. Ngem kas nakunamin, awan kadakami ti desision no di ket adda iti pangngeddeng dagiti hurado.  

DANIW 

Barangabang – ni Nasudi Francine

Essem – ni Shantih Shantih Shantih

Independencia Y Revolucion – ni An-anabo T. Ylocos

Kudos ti Ayatmo iti Bukodtayo a Dila – ni Sagibo de Amor

Sapulem ti Kulluong – ni Yang-yin 

Sayang manen! Saan a simrek ti(dagiti) kayatmi a daniw. Na-sandstorm sa! Wenno agpatingga lattan a lagip ni ayat. 

Padaananyo ti resulta ti pasalip! Uray dakami ket maganatan met a mangiruaren kadagiti mapadayawan ita a tawen.

Posted by rfaafil at 4:59 PM EDT

Updated: Sun, Apr 1 2007 5:04 PM EDT

Share This Post

Post Comment | Permalink

PARA kadagiti maganatan a makaammo iti resulta ti pasalip kangrunaanna iti daniw, adtoy dagiti sangapulo ket tallo (13) a nabati iti yakayakan dagiti hurado. Kitaemon, Patgenmi a Mannurat, no nakastrek pay ti gapuanam.

LUCKY 13 A DANIW

Anggulo 3 : Tallo-Suli a Pigura ni Ayat – ni Juan Abay-a

Ayat: Lagip: Ayat – ni Amor Callaguip

Barangabang – ni Nasudi Francine

Di Matay a Tedted ti Tudo – ni Anib

Dinak Idarum iti Pangukoman ti Daniw – ni Taga-Caba

Essem – ni Shantih Shantih Shantih

Independencia Y Revolucion – ni An-anabo T. Ylocos

Iti Temtem ti Duadua – ni Lei

Kasingin ti Sellag iti Hardin a Kayumanggi – ni Ridam Dignos

Kudos iti Ayatmo iti Bukodtayo a Dila – ni Sagibo de Amor

Sagibon’ Dara – ni Rettab ‘07

Sandstorm – ni Tarukoy T. Kadaratan

Sapulem ti Kulluong – ni Yang-yin

Daytoy a listaan iti ngato ket opisial a naggapu kadagiti hurado. Padaananyo dagiti mangabak.

----------------

MENSAHE: Dagitoy ket bukodmi a paliiw kas maysa nga esponsor, nanumo a mannurat ken gagangay nga agbasbasa kadagiti naisalip ita a tawen. Awan sabali a pinanggepmi no di laeng mangted iti sangkapirgis nga impormasion kadagiti naisalip ken mangted iti pagliwliwaanyo bayat iti panaguray iti resulta ti pasalip.

No adda man dagiti nagkamtudanmi, pagpaspasensiaandakami. Awan sabali a pampanunotenmi no di ti pagragsakan dagiti agbasbasa a sumangbay ditoy pagtaenganmi iti Internet.

KADAGITI 13 a daniw a nadakamat iti ngato, magustuanmi amin ida. Ngem adda met bukodmi a pili. Lima laeng dagiti mapadayawan ngem mabalin nga adda mainayon a pammadayaw depende iti pangngeddeng dagiti hurado.

Dagitoy ti bukodmi a pili nga awan ti partikular a panagsaganadda: Essem, Sandstorm, Ayat: Lagip: Ayat, Di Matay a Tedted ti Tudo, Sapulem ti Kulluong, Barangabang, Sagibon' Dara, ken, Independencia Y Revolucion.

Magustuanmi met ti Kudos ti Ayatmo iti Bukodtayo a Dila. Ngem ipaigidmi daytoy a daniw ta daniw daytoy a maipaay kadakami. Napintas koma daytoy a daniw no naisalip idi iti salip ti daniw a mairuknoy iti RFAAFIL. Ngem nupay kasta, adda karbengan daytoy a daniw a lumaban agsipud ta trinatarna met ti tema nga ayat.

Kadagiti inagapadmi a magustuanmi, kangrunaan unay a daniw a nangtugkik kadakami ti daniw a Sapulem ti Kulluong. Paulo pay laeng, ammomon ti isimsimbolona. Simple ti daniw ngem nadagsen ti timbangna. Iba ang dating, kunada iti Tagalog.

Ania ngata?  Magustuanto ngata met dagiti hurado ti daniw a Sapulem...?  Uray ngata pumustaak, adda gunggona a masukdal daytoy a sinurat ni mannurat a naglinged iti parbo a nagan a Yang-yin. Sapulemon ti Premio, Patgenmi a Mannurat!

Posted by rfaafil at 4:50 AM EDT

Updated: Sun, Apr 1 2007 4:55 AM EDT

Share This Post

Post Comment | Permalink

MENSAHE: Dagitoy ket bukodmi a paliiw kas maysa nga esponsor, nanumo a mannurat ken gagangay nga agbasbasa kadagiti naisalip ita a tawen. Awan sabali a pinanggepmi no di laeng mangted iti sangkapirgis nga impormasion kadagiti naisalip ken mangted iti pagliwliwaanyo bayat iti panaguray iti resulta ti pasalip.

No adda man dagiti nagkamtudanmi, pagpaspasensiaandakami. Awan sabali a pampanunotenmi no di ti pagragsakan dagiti agbasbasa a sumangbay ditoy pagtaenganmi iti Internet.

UMANAYEN a ragsakmi no adda maparuar a naisangsangayan a sarita. Umanayen a mangpakired kadakami iti pannakaupay ken mangagas kadakami iti bannogmi.

Ket adtoy manen sabali pay a dua a sarita a namnamaenmi a makapatar iti pagrukodan a sapsapulenmi. Adtoy dagiti paset nga iburaymi kadagiti agbasbasa.

----------------

#I

INANG, apay nga addaka ditoy?

Yur-urayka, ballong.  Darsem, sakbay a maladaw ti amin...

P-papananta?

Agawidtan...

Nagkibinda. Ngem idi umaddangda, kellaat a nagbalin a baket nga agkubkubbo ken nakakutkuttong ti inana a marigatan a magna...

N-nabatik 'tay sarukodko, ballong. Agal-alak a magna... 

Bayabayenka, Inang. Siak ti sarukodmo... 

Agyamanak, Nakkong...

Ne, kellaat metten a napisi ti dalanta, Inang?

Sadino ti dalanenta?

Dayta marmolisado nga atiddog nga agdan nga agpababa, agturong iti pamiliam. Yur-uraydaka. Dayta agpangato nga agdan a nakumotan kadagiti ulep, yur-uraynak ti amam idiay ungtona... 

Ni tatang? Ket no idi pay kasangapulo a tawen a dimmaga? 

Adda kenka no palugodannakon a mapan kenkuana. Wenno itugotnak dita agdan nga agpababa... 

Inarakupna ti inana. Ngem nagasug iti nakasasaem ti baket... 

Inang? Inangko? Inangkooo!

#II

NAIPATUGAWEN ti kaldero iti naikadkad a dapo idi lumaem ni Lakay Binong.  Nakitana ni Mercy nga aggalgalip, a tunggal dilpatan ti lumabbasit a dila ti apuy ti ubet ti nakasaang a banga, rumangrangrang ti minar ti anakna.

Pinagari ti lakay ti ulimek iti nagbabaetanda. Riniknana ti aglawlaw. Nakaturog ti lukmo, aburido met ti buridek a mangkuditkudit iti umamarilion ti marisna a libro. Tepteppelan ti balasangna ti saibbekna?

Tinurongna ti bangsal. Kimmaud ti sangaungot iti malabi. Sinam-it ti karabukobna ti nalamiis a danum.

Pimmasaren dagiti agkaka. Pinagtimkan itay ni Mercy nga agsasangodan ngem nagkedked. Imbagana nga isu’t mangsublat a mangbantay iti nakaidda; inyalaanna iti sangaduyog sa inkagumaanna a pinatugaw; nakasanggir iti tinabid a diding. Marmaratubbog dagiti luana a nangmatmat iti anakna. Lumlummuag ti panagriknana iti asi; nga iti lansad dayta, nakalinlinak a gura a mangkibkibkib iti sagbabassit ti kinataona. No koma landok ti pangyariganna iti bagina, isuda dagitay lati a kimpet.

Agtigtig-aben ti buridek. Ammona, nalpasen dagiti agkaka. Kinita ti pakpakanenna. Arigna di pay namki ti duyog. Manen, rinimbawan ti asi ti panunotna. Ad-adu ngamin ti rumtab iti ngiwat ni Pilar ngem ti maipunegna.

“Ala siakon, tatang, ti mangituloy. Inkayo manganen, ket adun sa ti awatyo ita a masukdipan,” siniggawat ni Mercy ti duyog. Nagtugaw iti iking ti katre.

Minirana ti anakna. Addaan daytoy iti nasidap a mata ngem kasla kumaykayakayda ita. “Dinak pakaringgoran, anakko. Addayta laeng ta kaldero, ne. Apagbiit la ti kumammet,” impatalgedna.

Nagari ti ulimek iti nagbaetanda a sagpaminsan pirsapirsayen ti panagbuabo ni Pilar a mangan.

"Ay wen gayam, anakko. Ita man pay a nasapaka a nagawid?" nadlawna ti pannakakilga ni Mercy.

Tumbog ta tumbogen ti lua ti anakna. “Ama, diak kadi pakabasolan no diak nadakdakamat nga ita ti maudi nga aldawko iti trabahok. Agkiskissayda.”

Maawatanna ti sasaaden ti anakna. Ngem kasla nagkuppit ti barukongna. Anian a dagsen ti paspasarenda a rigat!

----------------

Dagiti laeng autor dagitoy a sarita ti makaammo a magustuanmi ti sinuratna. A makapatar iti pagrukodan iti kinaisangsangayan ti sarita a mangagas iti bannogmi. Agyamankami, Patgenmi a Mannurat, iti daytoy a gapuanam. Sapay koma ta magustuanto met daytoy dagiti hurado.

Good luck, Appo a Mamannurat!

Posted by rfaafil at 3:13 PM EDT

Updated: Sat, Mar 31 2007 3:18 PM EDT

Share This Post

Post Comment | Permalink

MENSAHE: Dagitoy ket bukodmi a paliiw kas maysa nga esponsor, nanumo a mannurat ken gagangay nga agbasbasa kadagiti naisalip ita a tawen. Awan sabali a pinanggepmi no di laeng mangted iti sangkapirgis nga impormasion kadagiti naisalip ken mangted iti pagliwliwaanyo bayat iti panaguray iti resulta ti pasalip.

No adda man dagiti nagkamtudanmi, pagpaspasensiaandakami. Awan sabali a pampanunotenmi no di ti pagragsakan dagiti agbasbasa a sumangbay ditoy pagtaenganmi iti Internet.

KAS nakunami iti umuna a paset daytoy a topiko, umanayen a ragsakmi no adda maparuar a naisangsangayan a sarita. Umanayen a mangpakired kadakami iti pannakaupay, mangagas iti bannogmi.

Ket adtoy manen sabali a sarita a namnamaenmi a makapatar iti pagrukodan a sapsapulenmi. Adtoy ti maysa a paset nga iburaymi kadagiti agbasbasa. Inikkatmi ti nagan ti bida iti sarita, uray ti lugar, ken ineditmi ti sumagmamano a balikas tapno saan a maitugotan no ania ti paulo ti sarita.

..................

Posted by rfaafil at 2:38 AM EDT

Updated: Mon, Mar 26 2007 4:38 PM EDT

Share This Post

Post Comment | View Comments (4) | Permalink

MENSAHE: Dagitoy ket bukodmi a paliiw kas maysa nga esponsor, nanumo a mannurat ken gagangay nga agbasbasa kadagiti naisalip ita a tawen. Awan sabali a pinanggepmi no di laeng mangted iti sangkapirgis nga impormasion kadagiti naisalip ken mangted iti pagliwliwaanyo bayat iti panaguray iti resulta ti pasalip.

No adda man dagiti nagkamtudanmi, pagpaspasensiaandakami. Awan sabali a pampanunotenmi no di ti pagragsakan dagiti agbasbasa a sumangbay ditoy pagtaenganmi iti Internet.

KAYATMI laeng a sungbatan dagiti patpatgenmi nga agbasbasa iti kiddawda: Diyo pay laeng ginudua dagiti sarita! Uray pay koma dagiti daniw!

Iti sarita, adtoy ngarud a kerrasanmi pay dagiti sarita a maibase iti bukodmi a panagraman. Kayatmi a sawen, dagitoy dagiti pattapattaenmi a magustuan dagiti hurado.

Kadagiti sarita a saanmi a nadakamat iti ngato, saanmi kayat a sawen nga awan serbida. Napintas met ti pannakaisuratda ngem nakapkapuyda laeng no maidilig kadagiti kabalubalda. Ngem ala, adda pay laeng namnama ta daytoy ket bukodmi met laeng a panagraman. 

Iti met biang ti daniw, narigat ti agtinnag, wenno mangibaga iti komento amangan ta saan ketdi a maitugotan iti anag wenno pudno a bugas dagitoy a daniw. Nangruna ket limapulo ket lima (55) amin dagiti naisalip a daniw.

Ulitenmi, saanyo koma a liplipatan ti mensahemi iti ngato. Agyamankami unay!

Posted by rfaafil at 2:11 AM EDT

Updated: Tue, Mar 20 2007 2:19 AM EDT

Share This Post

Post Comment | Permalink

Para kada nakisalip, adtoy ti umuna a padamag maipanggep iti sarita tapno saan unay a matektekan nga aguray iti resulta. Kitaenyo no nakastrek pay laeng ti pakilabanyo a sarita.

Posted by rfaafil at 3:21 AM EDT

Updated: Sun, Mar 18 2007 3:51 AM EDT

Share This Post

Post Comment | View Comments (2) | Permalink

Pammateg ti gapuna no apay a napanunotmi met ti mangesponsor iti pasalip. Pammateg iti bukod a pagsasao. Kas maysa nga esponsor, adu a rigat ken tuok ti pagpaspasaranmi iti tinawen tapno laeng maipatungpalmi dagiti aktibidadesmi. Ket umanayen a ragsakmi no adda napintas a sinurat a maparuar ti pasalip. Addan agas ti bannogyo iti daytoy a gapuanan ni mannurat, kuna no kua dagiti hurado. Saan a nasayang ti panagesponsoryo. Saan a nasayang ti bannogyo.

3rd RFAAFIL - Siak ni Tranquilino Tacneng, Iti 28 a Kadsaaran a Lubong ni Lorenzo G. Tabin, Dagiti Proberbio iti Biag ni Maestro Modesto ni Joel B. Manuel

4th RFAAFIL - Maysa a Rabii, Iti Sirok ti Daldaligan ni Joel B. Manuel

5th RFAAFIL - ?

Iti maika-5 a tawen a panagpasalipmi, magagarankami a mangammo no adda met laeng sarita a maibilang a naisangsangayan a mangagas iti bannogmi. Adda kadi met laeng makapatar iti dayta a pagrukodan tapno kunaenmi a saan nga eppes ti panagapitmi?

Ti gagarmi a mangtakuat no adda met laeng sarita a makapasa iti pagrukodan a kunami ti gapuna a sinukainanmi, uray apagbiit, dagiti naisalip iti baet ti kinaadu a pakakumikomanmi. Ket, wen, bareng ta saankami a nagbiddut iti panangipapan nga adda manen gapuanan ni mannurat a maibilang a kasta.

Saanmi nga ibaga ti paulo ti sarita ken ti parbo a nagan ni mannurat ngem mangadawkami man ketdi iti paset ti sarita tapno iburaymi kadakayo.

Ngem diakon nakasungbat ta sinitadak dagiti agbambantay iti daungan ket idi awan ti maipakitak a pammaneknek nga agawidak, binugawdak a pinaadayo. Nagnaak nga agkatangkatang, sibabasol, agury-uray iti pangngeddeng, awanan iti ayat iti daga dagiti ganggannaet.

LIMA nga aldaw kalpasanna, nakadaongen iti pantalan ti dakkel a barangay. Immarakup ni Ina Day-eng ken ni Manang Raya. Inruar ni Manang Raya ti patapat iti ulo. Gimmilap ti pasig a balitok iti tangatang ti init. Intedna daytoy iti naklaat a baket a nangbitin iti sango ti kaamaanna. Maysamaysa ti nangsagid iti balitok. Inted met ni Manang Raya ti daradara a saong ti alingo ken ni masmasdaaw nga Allawig.

"Kamaudiananna, adda pamuonantayon nga agbiag," nayesngaw ni Ama Sawagan.

"Agyamanta iti anakmo, amada," inyisem ni Ina Day-eng. "Ikarkararaganta isuna."

"Ni manangko ti kayatko," imbaningrot ni Sawiri. "Di met nagawid ni manangko."

Inarakup ni Allawig ti ubing. "Sumangpetto ni manangmo, ading, ta awan ti ayat sadiay, adda kadatayo."

Daytoy ti eksena, iti tartaraudi a paset ti sarita, a nangkulding iti pusomi. Paset ti sarita a nangted iti napigsa a gutad iti panangwaswasna iti tema nga ayat.

Iti paniriganmi, inubon daytoy a sarita dagiti amin-amin a tema nga inaramatmi. Daytoy a sarita ket maipanggep iti pamilia, adda bugas ti naindaklan a panagsakripisio, adda kinatan-ok ti pagsapulan nga ipakpakitana, adda ramen ti tema iti panaggayyem, ken, ipangpangrunana ti nabalitokan nga ayat nga isagut ti bida iti/kadagiti ipatpategna. No makapasangit pay iti paglalabanan, tumbaenna dagiti makalabanna. Wen, ta napuotanmi laengen a nayagusen ti riknami iti maudi a paset ti sarita. No bilang ta mabati iti yakayakan dagiti hurado ket maidasarto daytoy a sarita kadagiti agbasbasa, amangan ta adayonto ti tarayenna iti RFAAFIL Reader's Choice Award.

Posted by rfaafil at 4:33 AM EDT

Updated: Mon, Mar 12 2007 4:39 PM EDT

Share This Post

Post Comment | Permalink

Maragsakankami koma ta inaldaw nga adu dagiti maaw-awatmi a mensahe iti E-lokano Mail iti inaldaw ngem saan ta makauma met ti agpugas kadagitoy. Agasem ta saan metten a sumardeng ti e-mail a maawatmi gapu iti inkabilmi iti ruangan ti website a mangkalap iti opinion dagiti readers maipanggep iti ayat: (Para kenka, Patgenmi nga Agbasbasa, ania ti depinisionmo iti sao nga AYAT?) No asinoda man, naayatanda met la unayen!

Kuna ni Reader iti AYAT, daytoy man ti inaramidmi a subject ti e-mail a maawatmi. Ngem saan metten nga agsardeng daytoy. Inaldaw a 'Kuna ni Reader iti AYAT.'  Kuna ni Reader iti AYAT. Kuna ni Reader iti AYAT. Kuna ni Reader iti AYAT. Kuna ni Reader iti AYAT. Kuna ni Reader iti AYAT. Kuna ni Reader iti AYAT. Kuna ni Reader iti AYAT. Kuna ni Reader iti AYAT. Sikami pay ketdin ti mauma. Naimbag koma no ti naguneg ti Kuna ni Reader iti AYAT a mensahe ket maipanggep iti kunaen ni Reader iti AYAT ngem saan met. Ti la addan a maaw-awatmi.

Naisangrat laeng koma ti rfaafil@hotmail.com para iti mensahe mainaig iti pasalip wenno iti website ngem naduktalan metten dagiti spammers. Namin-adu nga inyakarmin ti e-mail nga agawat iti KUNA NI READER ITI AYAT ngem kaskasdi a sumrekda iti rfaafil@hotmail.com. Nakarehistron kadakuada daytoy nga address. Nakaprogram sa pay ketdin ta agasem metten ti agsingkuenta nga e-mail a maawatmi iti uneg ti maysa nga aldaw. Kabutengmi payen a lukatan dagitoy a mensahe ta saanmi nga ammon no ania ti opisial nga e-mail ken saan. Awan serserbi ti alad a pangserrami kadagiti mangurkuriro. Nasiglatda a sukatan ti paggappuan ti e-mail tapno nawayada manen a sumrek.

Naimbag ketdi ta dida pay naduktalan ti admin@rfaafil.com. Isudanto ketdi pay a pasalsali. Narigat pay no addanto ketdi entry a malibtawanmi. Daytoy la unay ti ipangpangruna nga an-annadanmi. Imbag ta saanmi nga ar-aramaten daytoy nga e-mail nga agkalap kadagiti kapanunotan no di laeng eksklusibo para iti pasalip wenno maipanggep iti RFAAFIL.

Naannadkami a kankanayon a manglukat iti e-mail a dimi ammo ti naggapgapuanna. No masinunuomi a naggapu iti maysa a mannurat wenno am-mmomi, isu laeng ti pananglukatmi. No saanda a mauma nga agipatulod iti awan kaes-eskanna a mensahe, saankami met a mauma a mangilaksid kadakuada. Ngem nasigsiglattayo latta ta saanda a maawatan ti bukodtayo a sao. Daytoy ti pakaarusanda. Saanda a maaw-awatan ti rirriribukenda.

Dagiti laeng padatayo nga Ilokano ti makaawat kadagiti naimaldit. Bay-anmi a maumanto dagitoy sabali a puli a sumengsenggat iti annayas ti panagnami. Iti sabali a bangir, pakaragsakanmi met nga iturong dagiti madaydayaw a bisitami tapno saanda a mayaw-awan iti nanumo a pagtaenganmi iti Internet. Kas koma no simrekda iti biddut a dalan a kas itoy. (www.rfaafil.com/nayaw-awanak. I-klik daytoy kas pagarigan nayaw-awanka tapno iturongkayo iti ruangan ti pagtaengantayo iti Internet.)

Kayatmi met ti agyaman kadagiti agbasbasa nga agipatpatulod iti e-mail a naglaon iti makapatibker ken makainspirar a mensahe. Saan a mailaksid kadakami ti kinapategyo nga agbasbasa. Saankami a makapagna no awan mangkibin kadakami. Saankami nga agbiag no awan mangbiag kadakami. Awankami no awankayo.

Kuna ni Reader iti AYAT, sungbatanmi iti 'Ti kunami nga Ayat ken ni Reader' - isu ti rfaafil.com nga ikarigatanmi a biagen agingga a sibibiagkami.

Posted by rfaafil at 5:28 AM EST

Updated: Fri, Feb 23 2007 5:39 AM EST

Share This Post

Post Comment | Permalink