Topic: Pasalip
KITA’M kad’ laeng, nakaadayo gayamen ti RFAAFIL! Saanmi a namnamaen nga addakami gayamen iti maikanem a tawen. Dandani payen agtangep daytoy a pasalip (6th RFAAFIL). Innem laengen nga aldaw, addaytan ti maikapito. Saanen a napupuotan ti panaglabas ti tawen.
No kastoy a sanguenmi ti pasalip. Adu dagiti bambanag a malagipmi. Adu met dagiti mapaliiwmi. No pay ket dadduma, kasla makitkitami dagiti sumaruno a mapasamak. Kasla pay mapugtuanmi no ania dagiti dumteng kalpasan a maiwayat dagiti pangngeddengmi – kas iti panagpili iti tema wenno topiko ti sarita a matratar. Daytoy ngata ti kabayagan no kua a desisionanmi.
Sakbay a pilienmi ti tema wenno topiko a mapagsasalipan, panunotenmi nga umuna no alisto met laeng nga arakupen daytoy dagiti mannurat a pakaibilanganen dagiti agdadamo. Adu kadi met laeng ti masurat maipanggep iti dayta a tema? Nakasagana kadin dagiti mannurat a mangsurat iti daytoy? Kasano ti readership? Kasano ti kalawa ti okuparen daytoy a tema? Ken adu pay a saludsod.
Sarita maipanggep iti TAO KEN AYUP ti tema ita a panagpasalip. No ngata daytoy idi ti umuna a tema a mapagsasalipan iti damo a tawenmi, adda ngata nakisalip? Nalabit adda, wenno manmano wenno awan pay ketdi. Adu kadi ti mabalin a suraten iti daytoy a topiko? Sisasagana kadin dagiti mannurat a mangsurat iti daytoy a topiko? Saan kadi a nairuam a kanayon ni mannurat a tao latta ti agbibiag iti sinuratna? Ania ngata no sarita a maipanggep iti ayup laeng, adda wenno adu ngata ti masurat? Isu nga idi aramatenmi ti tema nga ayat, saanmi a linimitaran ti ayat iti pagitan laeng ti baro ken balasang tapno ad-adu met laeng ti pagrikosan dagiti mannurat.
Napateg ti tema kadakami. No apay? Tapno napimpintas kunami ti panagsasangdo dagiti makisalip. No saankami a nagbiddut iti panangipagarup, mabalin kadi a kunami a dakami ti nangirusat iti pasalip iti sarita nga agaramat iti maymaysa a tema? Ta mariknami la unay no kasta a disidirenmi no ania ti maaramat a tema, kunaemi no kua, ania ngata no saanmi a limitaran dagiti maisalip gapu iti tema? Isu ngarud nga agtultuloy latta nga ipudosanmi ti kayat dagiti agbasbasa a basaen, dagiti mannurat a suraten.
Iti 6th RFAAFIL, mariknami a manmano ti makisalip gapu iti tema wenno topiko. Nasapa pay a sawen ngem daytoy ti mapattapattami. Nupay kasta, adu man wenno bassit dagiti maisalip, basta maparuarmi ti anag ti tema a sapsapulenmi, umanay unayen. Dakkelen a pakaragsakanmi. Umanayen a masurat ti sarita a maisagut kadagiti annak ni Saluyot.
Adda metten napalabsanmi a naisalip ita a magustuanmi. Ngem addayta metten ti umip-ipus a saludsodmi no makapasa met laeng daytoy iti pagrukodan dagiti hurado. Ta no dadduma, mabutengkami payen, ta pumudno no kua ti atapmi. Sikami ti umuna a malidayan no matnag ti naisalip gapu laeng kadagiti saan a naigaggagara a panagerrado.
Adda ngata mangsurat iti manok, itik, pato, baboy? Adda ngata? Wen, adda ngata? Adda ngata mangsurat maipanggep iti aso, pusa, baka, nuang? Adda, wen, adda. Aduda? Puotem man ti sungbatmi iti daytoy a saludsod ta subliannakam’to no husto met laeng ti paliiwmi. Bay-am man ta i-blogminto no ania dagiti ayup iti tunggal maisalip.
Dakkel ti pakainaigan ti topiko wenno tema ti sarita iti bilang dagiti makisalip. Ita a maikanem a tawen ti pasalip, mariknami a nakisang dagiti makisalip gapu iti mapagsasalipan. Sapay koma ta nagbiddutkami iti panangipapan.
Ita, pampanunotenmi manen no ania ti tema wenno topiko a maaramat iti sumaruno a tawen. Iti pannakairugi manen ti sumaruno a panagpasalip, ikarkararagmi a sapay koma ta madanonmi pay ti sabali pay nga innem a tawen.
