A.N.A.K.

Kablaaw kadagiti agdadamo a mannurat a naikkan iti sertipiko ti A.N.A.K. [Addang Nga Agayab Kamannurat: Awis Nga Agpaay Kailokuan] ti RFAAFIL. Ti A.N.A.K. ket isu ti tinawen a panagesponsor kadagiti agdadamo a mannurat tapno maikkanda iti libre a panagatendar (registration) iti kombension ti GUMIL Filipinas tapno umadu dagiti mannurat a tumulong a mangpasantank iti Literatura Ilokana. Nangrugi ti A.N.A.K. ti RFAAFIL idi 2005. 

Dagiti agdadamo a mannurat a naparaburan iti A.N.A.K. iti 2010: Ronnie Aguinaldo; Mark Anthony Ganotice; Bernard Lomauig; Alma Martinez; Mighty Rasing;  ken, Derick Marcel Yabes. 

Panagyaman ti RFAAFIL dagiti esponsor iti ayatda a tumulong iti A.N.A.K.. Isuda da: Jefferson Apolonio, Helen Kintana, Rochelle Mendoza, Agustin DC. Rubin, Tess Viduya ken Prima Vistal. Saan nga agballigi daytoy a proyekto no awankayo nga esponsor. Agbiagkayo! 

Maawis dagiti naayat nga Ilokano a tumulong iti daytoy a proyekto. Mapan iti:  http://www.rfaafil.com.  

2009 RFAAFIL READER’S CHOICE 

Ti RAAFIL Reader’s Choice Award ket pammadayaw iti sarita ken daniw a magustuan dagiti agbasbasa iti bukodda a panagraman. Napadayawan iti sertipiko ken cash prize a P3,000.00 ti “Ni Kanor ken Siak iti Taaw” a sarita ni Danilo B. Antalan idinto a sertipiko ken cash prize a P1,000.00 met ti “Mariknak ti Saem Dagiti Agarubos a Luam, Nanangko!” a daniw ni Agustin DC. Rubin para iti 2009. Nayawat dagiti pammadayaw iti 42^nd GUMIL Filipinas Convention iti Pangil Beach Resort, Currimao, Ilocos Norte idi Abril 9, 2010. 

Panagultuloy a pannakaputar dagiti de-kalidad a sinurat ken panagrang-ay ni mannurat, ti GUMIL ken ti Literatura Ilokana ti panggep a ragpaten ti RFAAFIL Reader’s Choice Award babaen ti ayat ken tulong dagiti agbasbasa.  

8TH RFAAFIL [2009-2010] WINNERS

Naited ken ni Virgilio S. Naungayan, ti Candon City, ti Naisangsangayan a Gunggona (Special Prize) babaen ti saritana a “Ti Naisar-ong a Lungon”. Immawat ti autor iti sertipiko ken P8,500.00 a cash prize. Maysa laeng a sarita ti napadayawan iti Salip ti Sarita iti 8^th RFAAFIL kas inkeddeng dagiti hurado.  

Dagiti met nangabak iti Salip iti Daniw: Umuna, Agustin DC. Rubin ti Subic, Zambales babaen ti daniwna a “Rissik ti Panunot, Kannawidan Rumasuk”; Maikadua, Florentino V. Rosal, ti Urdaneta City babaen ti daniwna nga “Umok ti Ragsak”; Maikatlo, Severino V. Pablo ti Laoag City, Ilocos Norte babaen ti daniwna a “Saringit ti Pamilia: Anus a Naullo iti Panawen ti Rigat”; Maikapat, Florentino V. Rosal babaen ti daniwna a “Daytoy ti Gapuna No Apay a Subliananka”; ken Maikalima, Agustin DC Rubin babaen ti daniwna nga “Organiko”.

Nayawat dagiti gunggona iti 42^nd GUMIL Filipinas Convention iti Pangil Beach Resort, Currimao, Ilocos Norte idi Abril 9, 2010. Dagiti naghurado iti agpada a kategoria: Ariel S. Tabag, chairman; kameng da Juan Al. Asuncion ken Cles B. Rambaud.  

9TH RFAAFIL [2010-2011]

Silulukaten ti pasalip ti RFAAFIL para iti maika-9 a tawen a panagpasalip. Makapakatawa a sarita ti mapagsasalipan iti Salip iti Sarita idinto a daniw a para ubbing ti masangal iti Salip iti Daniw.

Posted by rfaafil at 12:01 AM EDT

Updated: Mon, Apr 12 2010 9:43 PM EDT

Share This Post

Post Comment | Permalink

MARSO 31, 2009. Dua a bulanen ti napalabas kalpasan a nagtapos ti pasalip, awan pay resultana ti pasalipmi. Ania ngarud ket kastoy met ti adda a situasionmi. Ammomi nga adda dagiti matuokan nga aguray iti resulta ti pasalip ngem ad-adda a sikami ita ti maburiboran, maringgoran ken madanagan. Sangapulo ket maysa nga aldaw pay, nasken a maited dagiti premio iti 41^st GF Convention. Kasano itan ti panagikamakammi kadagiti sertipiko? No malagipmi, adda pay daydi tawen a madaman ti kombension, awan pay resulta ti pasalipmi. Malagipmi la ketdi ngarud, kasano idin nga insaganami dagiti sertipiko? 

No ammo koma la ti kaaduan dagiti mapaspasamak iti likudan ti RFAAFIL, maanagda a natuok ti kasasaadmi. Kasla met laeng makiginginnubalkami iti nakaparsuaan. Sipud pay nangrugi nga agsangpet dagiti entry, nangrugi metten ti problemami. Adda dagiti sumagmamano nga e-mail a saanmi a dagus nalukatan dagiti attachmentna. Ania pay, no di aguray ken ni mannurat nga ipatulodna manen ti pakisalipna. 

Idi damo, naragsakankami ta tallo laeng dagiti naikoreo nga entry. Ngem dandani maysa pay daytoy a pinarikutmi. Impagarupmi idi no saanmin a makita dagitoy nga entry. Ta adda simmabog nga eroplano ti FedEx. Naitantan ti panagtayab dagiti eroplano a magna iti nasion dagiti Hapon. Sa ninayonan pay ti panagputok ti bulkan iti asidegmi. Nadanagankami idi ta awan no kua pamalpalatpatanmi iti kinasiasino dagiti autor dagitoy a sarita. Awan met ngaminen ti matalekmi a runner ta immay metten iti sibaymi. Isu ti mangi-e-mail idi ket a dagus ti kinasiasino dagiti nakisalip. 

Maragsakankami no kua no awan mapili dagiti hurado kadagiti naikoreo ta di pay isu a parikutmi ti pannakaitypena. Adda pay idi pinaitypemi a sarita iti mabaybayadan a typist ngem anian ta idi maawatmi ti naitype, saanmi metten a maawatan dagiti naitype. Kunami idi, ta uray no saan nga Ilokano ti nagtype, no surotenna koma laeng dagiti letra, awan koma parikut.  

Padpadasenmi met nga iskanen dagitoy nga entries tapno napaspas a mayawatmi kadagiti hurado ngem no saan a nalawag a mabasa dagiti letra wenno balikas anusanmi no kua nga ikompiuter. Kaasi met ni mannurat a nakisalip no yawatmi ken ni hurado ti naiskan a pakisalipna ta amangan no daytoy ti pakaabakanna no saan a mabasa a naimbag ti sarita. No met ipatulodmi ti hard copy ti naimakinilia nga entry, ad-adda manen a bumuntog ti schedulemi. 

Maibilang kadagiti tallo a naikoreo a sarita ita a tawen ti Troso, Lapat, ken, Pangen. Idi kunami, a manmano dagiti sarita a nakatiliw a dagus iti interesmi. Daydiay sarita maipanggep iti troso, daydiay mangngalap, ken daydiay agminmina, saanmi pay a nabasa dagitoy tallo a sarita. Daydiay nadakamatmi a maipanggep iti troso, saan a ti Troso a naikoreo ti nabasami. Saanmi met nga innaganan ti sarita a kunami a mangngalap ta adu met dagiti naisalip maipanggep iti taaw. 

Nagustuanmi amin dagiti naisalip ngem ad-adda a nagustuanmi dagiti tallo a sarita a naikoreo. Ngem gapu iti tema – tao kontra nakaparsuaan – ken ti nasken a panangipakita iti kultura ni Ilokano, sabali iti panangsirigmi kadagiti naisalip.  

Ti Pangen, maarus kadagiti dua gapu iti tema. Saanna a tinaming ti tema. Ti Lapat, baro iti panagramanmi. Ti Troso, awanen ti baro nga iburayna ngem naannayas ketdi ti pannakaisuratna. 

Idi kunami a naturedkami a mangibaga a dagitoy dagiti mapilimi a sarita. Wen, gapu ta isu met ti immunan a napili dagiti hurado. Kayatmi a sawen, saanmi nga inun-unaan wenno inimpluensiaan ida ta isu met dagitoy ti mapilimi. No ania man ti wagas a maaramat iti panagpili, makabaruanan man wenno sumursurot iti kadaanan a wagas, saankami a nakibiang iti pangngeddengda. Kabaelanmi a takderan dayta, iti nagan ni Apo a Namarsua. Ken saankaminto pulos a makibiang iti pangngeddengda. 

Ket kas iti nakunami pay iti immun-una a blogmi a napetsaan iti Marso 19: Sapay koma ta saan nga agkudkod iti ulo dagiti hurado gapu ta marigatanda nga agpili wenno marigatanda nga awan mapilida kadagiti naisalip iti 7th RFAAFIL. Gapu iti daytoy a pasalip, naisingasing kadakami a baliwanmi ti pagannurotanmi para iti sumaruno a pasalip – 8^th RFAAFIL. Maipanggep daytoy iti gunggona a maited. Mainayon dagitoy a balikas: “Mabalin a manayonan wenno maksayan dagiti gunggona depende iti pangngeddeng dagiti hurado.”  

Malagipmi, idi un-unana, a sangapulo dagiti mapadayawan ngem bimmassit iti lima gapu iti pangngeddeng dagidi hurado. Kasano kano a pangabakenda ti sarita a saan a makapatar iti pagrukodan? Dida kano kayat a dadaelen ti kalidad dagiti mangab-abak iti pasalip ta dagitoyto ti pagtuladan dagiti sumarsaruno a mannurat. Kunada pay: Ti pasalip ket saan nga ang-angaw agsipud ta ti panagem ti tao a naayat nga agpasalip ket ti mangpapintas ken mangpabaknang iti Literatura Ilokana. No saan a maragpat dayta a panagem, siasinonto pay ti mayat a mangesponsor iti pasalip? 

Bay-anyo man, Patgenmi a Reader, nga iburaymi manen ti kapanunotanmi kadagiti napilin a lima a sarita iti tao kontra nakaparsuaan. 

[Tapno maliklikan ti mabalin a pannakaimpluensia ni hurado. Pagbalinenmi a fill-in-the blank dagiti sumaruno a parapo nga imalditmi. Tapno awan ti riri. J] 

Naidumduma ti _____ ta iti biangmi, ita laeng a makabasakami iti kastoy iti uneg iti adun a tawen a panagbasbasami iti Bannawag. Iti sabali a pannao, saan a nadudog ti topiko a trinatar ti autor. Madlaw met nga am-ammo ti autor dagiti karakterna, isu a napintas ti karakterisasion. Saan a napilpilit ti panagsisinnukat iti kapanunotan. Ken makita la unay ti kina-Ilokano dagiti agbibiag. Makaanayen daytoy a sarita nga agas ti bannogmi ita a panagpasalip. Napintas ti simbolismo nga inaramat ti autor. 

Ti _____ ket isu daytoy ti pudno a tao kontra nakaparsuaan. Isuna laeng ta saanmi unay pintasen ti karakterisasion. Daydiay kababalin ti maysa nga Ilokano, saanmi a naanninawan iti daytoy a sarita.

 Ti _____ ken ti _____, nadudogen a topiko ken awan man laeng ti baro a maibinglayda kadagiti readers. Awanen ti baro nga ibagbagada. No pelikula koma, makatuoken daytoy. Ti _____ no apay a mapilimi, gapu iti panangipakita ti autor a masterna ti lengnguahena. Nasayud ti panagestoriana, awan sagursorna. Sumarsaruno met ti _____ gapu man laeng ta inkarigatanna ti nangsurat iti sarita iti baro a porma. Ti met _____, agtatapaw dagiti karakters (awanan iti depth), ket awan pay ketdin bibiang ti reader no makalasat wenno saan ti bida iti sarita. Diak pay makita ti kina-Ilokano iti _____, _____ ken _____. No maipadas a maipatarus dagitoy iti Ingles ket mabasa dagiti Amerikano, diak la namnamaen a makitada ti identidad ni Ilokano ditoy. 

Iti umuna a gundaway, adtoy nga ipabasami a dagus dagiti opisial a NAPILI A LIMA A SARITA ITI TAO KONTRA NAKAPARSUAAN tapno maiburayyo met dagiti paniriganyo ken pagur-urayan iti resulta ti pasalip: 

Sangapulo ket Tallo a Lagip iti Sakaanan ti Kapitakan a Tanem – ni Aoanan Penem

Ni Kanor ken Siak iti Taaw – ni Mangngalapak

Pannubok iti Usok – ni Fely T. Pinili

Troso – ni Roman Antonio Dignos 

Lapat – ni Amante A. Almirante  

Asino ngarud ita ti mangabak iti umuna a gunggona? Daydiay kadi nangabak ti tao iti nakaparsuaan? Wenno daydiay kadi nangabak ti nakaparsuaan iti tao? Magustuanmi daydiay nangabak ti nakaparsuaan iti tao ngem mangabakto ti tao iti nakaparsuaan. 

Patgenmi nga Agbasbasa, basaenyon dagiti sarita ta pilienyo no ania kadagitoy ti magustuan a mapadayawan iti umuna a gunggona. 

Ala, iti laksid dagiti parikut a sangsanguenmi, dimi kayat nga abakennakami ti pannakaupay. Ituloymi latta ti pagrebbenganmi gapu iti ayat dagiti naanus a hurado, gapu iti ayat dagiti mannurat a sisasagana latta a makisalip, gapu iti ayat dagiti managtulong nga sponsor iti proyektomi, gapu iti ayat dagiti agbasbasa a sumarungkar iti pagtaenganmi, ken, gapu iti ayatmi a mangpabaknang iti Literatura Ilokana. 

[MENSAHE: KADAGITI TOP 5 A MANNURAT – Pangngaasiyo man, Patgenmi a Mannurat, ta patulodandakami man iti nayat-atiddog a pakasaritaanyo iti biag. 

KADAGITI READERS – Adtoy a mangtedkami iti clue iti kinasiasino dagiti autor dagiti lima a sarita. Maysa ti damona pay laeng ti mapadayawan idinto nga uppat dagiti napadayawanen iti pasalip ti RFAAFIL. Kadagiti uppat, maysa kadakuada ti napadayawan iti 6th RFAAFIL.]

Posted by rfaafil at 12:01 AM EDT

Updated: Wed, Apr 1 2009 3:28 AM EDT

Share This Post

Post Comment | Permalink

[MENSAHE: Dagitoy ket bukodmi a paliiw kas maysa nga esponsor, nanumo a mannurat ken gagangay nga agbasbasa kadagiti naisalip ita a tawen. Awan sabali a panggepmi no di laeng mangted iti sangkapirgis nga impormasion kadagiti naisalip ken mangted iti pagliwliwaanyo bayat iti panaguray iti resulta ti pasalip.

No adda man dagiti nagkamtudanmi, pagpaspasensiaandakami. Awan sabali a pampanunotenmi no di ti pagragsakan dagiti agbasbasa a sumangbay ditoy pagtaenganmi iti Internet, kangrunaanna daytoy blogmi. - RFAAFIL]

22 A SARITA

Sangapulo ket siam dagiti naipatulod iti e-mail idinto a tallo laeng ti naikoreo. Saan sa a napanunot dagiti dadduma a nakisalip nga adda tema a matratar - tao kontra nakaparsuaan.

1. Dagiti Wallages iti Panagdaliasat ni Ama Dario – ni Ped Sinar
2. Dalluyon – ni Igid T. Baybay
3. Dagiti Suni – ni Sony A. Sunni
4. Inton Umbaas ti Sipnget – ni Raniag T. Laoag
5. Ti Dallang, ti Pakkong ken ti Tallak – ni Bucloc Alilem
6. Dagiti Naamitan – ni Rob Rabii
7. Sangapulo ket Tallo a Lagip iti Sakaanan ti Kapitakan a Tanem – ni Aoanan Penem
8. Bantay Gidday – ni Sika T. Gapuna
9. Ni Kanor ken Siak iti Taaw – ni Mangngalapak
10. Isla Sta Cruz – ni Nali T. Aw
11. Dagiti Naitanem a Kinadayag – ni Rayania
12. Alimunmon – ni Salucag T. Mangngalap
13. Parola – ni Napateg A. Linglingay
14. Pannubok iti Usok – ni Fely T. Pinili
15. Dagiti Espiritu iti Bakir-Bato – ni XL
16. Troso – ni Roman Antonio Dignos 
17. Lapat – ni Amante A. Almirante
18. Ti Pangen – ni Agaton Bisaya 
19. Kuko ti Sawi iti Barukong ti Rabii – ni Gabriel de la Cruz
20. Princess Cruises – ni Pasa H. Ero
21. Bannuar – ni Salba T. Biag
22. Disierto – ni Dolly Asat 

Ita la a tawen a saanmi pulos nga inammo no asino dagiti autor kadagitoy a sarita. Adda ngamin dagiti nagipatulod iti Internet cafe. No saanmi a lukatan ti attachment maipanggep iti kinasiasino ni autor, saanmi nga ammo ti pudno a naganda.  Iti panagbasbasami, kas pagliwliwaanmi met, naduktalanmi a nayaw-awan dagiti dadduma. Adda met paglintegan nga inwayatmi a nasken a tao kontra nakaparsuaan ti isalip ni mannurat. Gapu iti tema, no koma ta sikami ti agpili, 14 laeng dagiti palusotenmi iti umuna a panagpilimi.

14 A SARITA

No apay a sangapulo ket uppat dagiti mapilimi, gapu ta simmurot dagitoy iti tema. Saanmi pay a naimutektekan ti kalidad daytoy a sarita. Basta ammomi a naagsawna uray bassit ti tema. Ta apay koma a pangabaken ti sarita a di met simmurot iti pagannurotan.

1. Dagiti Wallages iti Panagdaliasat ni Ama Dario – ni Ped Sinar
2. Dagiti Suni – ni Sony A. Sunni
3. Ti Dallang, ti Pakkong ken ti Tallak – ni Bucloc Alilem
4. Sangapulo ket Tallo a Lagip iti Sakaanan ti Kapitakan a Tanem – ni Aoanan Penem
5. Ni Kanor ken Siak iti Taaw – ni Mangngalapak
6. Dagiti Naitanem a Kinadayag – ni Rayania
7. Alimunmon – ni Salucag T. Mangngalap
8. Parola – ni Napateg A. Linglingay
9. Pannubok iti Usok – ni Fely T. Pinili
10. Dagiti Espiritu iti Bakir-Bato – ni XL
11. Troso – ni Roman Antonio Dignos 
12. Lapat – ni Amante A. Almirante
13. Ti Pangen – ni Agaton Bisaya 
14. Kuko ti Sawi iti Barukong ti Rabii – ni Gabriel de la Cruz 

Kasano kadi a diskusionenmi dagitoy 14 a sarita. Napintas koma ti Wallages ta nagustuanmi ti rugina ngem agsasabali a buya ti tao kontra nakaparsuaan ti naiparang. Saan ngata a napimpintas no maymaysa laeng ti trinatar ni mannurat. Mayat met ti panagpapatang iti Dagiti Suni ngem ad-adda napigpigsa ti gutad dagiti dadduma. Uray pay ti Dagiti Naitanem nga awan iti entablado ti tao kontra nakaparsuaan, kasta metten ti Kuko ti Sawi nga uray napintas iti pannakaisuratna, nakapsut a makilaban gapu iti wagasna. Ti Sangapulo ket tallo a lagip, uray manglaglagip, napimpintas nga amang iti Dagiti Naitanem. Sayang ti sarita nga adda kapadpadana ta mabantilan no kua. Mapagkompara dagiti dua.

Ti Pangen, ti Alimunmon ken ti Ni Kanor ken Siak iti Taaw ken, uray pay sa ti Parola, maipanggep iti taaw ti trinatarda. Napintas metten ti Alimunmon ngem kasanon ti tema? Kasta met ti Ti Pangen, maarus iti tema. [Ulitenmi, kas nakunamin, maipablaak daytoy a sarita no maipatulod iti magasin.] Ti Kanor ken Siak ti mangatiw amin kadagitoy. Ti Troso, ti Lapat, naannayas ti pannakaisuratda. Nakapasada iti tema. Uray ti Pannubok iti Usok, nga uray agtatapaw dagiti karakter, adda daytoy a sarita iti entablado ti tao kontra nakaparsuaan.

Ket kadagitoy a sangapulo ket uppat, umanay ngata metten a pakapidutan iti lima a sarita a mapadayawan.

5 A SARITA

Adtoy, wen, naturedkami a mangibaga, a dagitoy dagiti lima a sarita a magustuanmi.

No apay a magustuanmi dagitoy? Isarunominto nga iblog. Padaananyo! Ngem kas nakunamin, saanmi nga im-impluensiaan ti pangngeddeng dagiti hurado. Immalditmi daytoy a blog kas nadakamatmin iti mensahemi iti ngato.

Posted by rfaafil at 7:39 PM EDT

Share This Post

Post Comment | Permalink

GAPU iti napalabas a blogmi, adu dagiti reaksion a naawatmi. Ah, ngem kas kunami a kankanayon ken immalditmi manen iti baba daytoy a blogmi: "Dagitoy ket bukodmi a paliiw....."

Tunggal tawen a panagpasalip, adda dagiti bambanag nga imutektekanmi. Kas ita a tawen, naidumduma manen ti tema. Maysa pay daytoy a mainayon iti sirigenmi. Ket wen, nakapasa kadi met laeng dagiti naisalip iti tema? Daytoy ngamin ti kangrunaan a basehan dagiti hurado [ken basehanmi a mangipudos] kadagiti naisalip. Addayta pay ti pagannurotan: Nasken nga ipakitana ti kultura ni Ilokano. Ta apay pay la nga agpaspasalipkami no saan met a tumulong a mangbiag iti kulturatayo.

Ket wen, sublianmi man ti tema - tao kontra nakaparsuaan. Kadagiti nabasami, nagduduma ti panangtratarna. Kasano ti pannakaiparangna iti sarita. Nasurot kadi met laeng? Adda daydiay napintas a sarita iti panagkunami a mabalin a maipablaak a dagus. Ah ngem, tao kontra taon sa met daytoy a sarita. Naidetalye ti wagas ti panagdaklis ngem maatiw gapu iti tema. Patgenmi a Mannurat iti likudan ti sarita a PANGEN, napintas ti saritam. No ipatulodmo iti Bannawag, namnamaem a maipablaak.

Adda met daydiay saan met a nakaparsuaan ti kalabanna. Kas koma natay daydiay mangngalap gapu iti dinamita. Adda met daydiay awan pulos risiris iti nagbaetan ti tao ken nakaparsuaan.

No naglaban ti tao ken nakaparsuaan, asino ti mangabak? Ala ket depende daytan ken ni mannurat no asino ti pinangabakna. Ngem sabali metten ti nagturongan daytoy a blogmi. Ituloyminto iti sabali a blog.

DAGITI magusttuanmi a daniw iti 7th RFAAFIL. Kitaemon, Patgenmi a Mannurat, no napilimi ti daniwmo

MENSAHE: Dagitoy ket bukodmi a paliiw kas maysa nga esponsor, nanumo a mannurat ken gagangay nga agbasbasa kadagiti naisalip ita a tawen. Awan sabali a pinanggepmi no di laeng mangted iti sangkapirgis nga impormasion kadagiti naisalip ken mangted iti pagliwliwaanyo bayat iti panaguray iti resulta ti pasalip.

No adda man dagiti nagkamtudanmi, pagpaspasensiaandakami. Awan sabali a pampanunotenmi no di ti pagragsakan dagiti agbasbasa a sumangbay ditoy pagtaenganmi iti Internet. 

Posted by rfaafil at 6:25 AM EDT

Updated: Thu, Mar 26 2009 6:27 AM EDT

Share This Post

Post Comment | Permalink

AGTAPOS iti Enero a nagpatingga ti panagawatmi kadagiti maisalip.  Agasem ta dimtengen ti Enero 1, awan pay laeng naawatmi nga entry. Ket husto ti atapmi. Bassit dagiti nakisalip.

Mabalin a narigatan dagiti mannurat a nagputar iti sarita a mangtratar iti naidiaya a tema - tao kontra nakaparsuaan. Apay ngata? Saan kadi a makigubgubal ti tao iti nakaparsuaan iti inaldaw? Iti kasta, nalaka koma laeng nga ikur-it ni mannurat daytoy. Mabilbilang kadi pay laeng dagiti sarita a nasurat maipanggep iti tao kontra nakaparsuaan? Ta uray dakami, awan nasapulanmi a sarita a naaramat koma a modelo para iti daytoy a pasalip.

Adda met apaglabes duapulo a naisalip. Umanayen a bilang a pakaarisitan dagiti lima a mapadayawan a sarita. Ah, ngem kasano met ti linaon dagiti naisalip. Nasayaat no adda makapasa iti pagrukodan dagiti hurado. Iti bukodmi a paliiw, mabingaymin a dagus dagiti naisalip iti dua a grupo: passive (dagiti nangsurat iti saritana a manglaglagip wenno napalabasen ti sarsaritaenna) wenno active (dagiti nangsurat iti saritana iti agdama. Madama a mapaspasamak dagiti eksena.) 

Nasisiaat nga amang no nasurat ti sarita iti agdama a pasamak. Kayatmi a sawen, mapaspasamak dagiti eksena iti sarita bayat iti panangbasam. Matiliw a dagus ti essem ti agbasbasa. Saan ket a kas iti sarita a napasamaken dagiti eksena. Nakapsut no kuan ti kidagna. Nakapsut payen a mangsilo iti puso dagiti readers.

Manmano dagiti sarita a nakatiliw a dagus iti interesmi. Daydiay sarita maipanggep iti troso, daydiay mangngalap iti taaw, ken daydiay agminmina. [Apo Hurado, daytoy ket bukodmi laeng a paliiw. Saanmi nga im-impluensiaan no ania man ti pangngeddengyo.] Kaaduan ngata kadagiti sarita ti inibbatanmi ta dimi mapugtuan ti kayat nga ibuksilan ni mannurat. Kayatmi a sawen, kasla saanmi a maanninawan no agirig met laeng ti sarita iti naidiaya a tema. Isu nga ibatimi a pagrebbengan dagiti hurado no ania dagiti sarita a mapilida. Ken mangkutkot ti kaipapanan ti sarita no simmurot met laeng iti tema: maipanggep iti tao kontra nakaparsuaan ken ipakitana ti kultura ni Ilokano."

Ita, pampanunotenmi manen no ania ti topiko wenno tema a mausar iti 8th RFAAFIL. Addan napilimi ngem amangan ta ad-addanto manen a marigatan dagiti mannurat a mangsangal kadagiti saritada. Malagipmi la ket ngarud daydi tema a panagsakripisio. Kasla nakibur dagiti mannurat idi.

Nupay makunami a nakisang wenno naeppes dagiti naisalip iti sarita, maigiddiat ketdi dagiti naisalip iti daniw. Adu dagiti napipintas a pagpilian. Adu dagiti magustuanmi. Maibilangen ditoy ti daniw nga inaramatmi kadagiti panid ti pagtaenganmi.

Sapay koma ta saan nga agkudkod iti ulo dagiti hurado gapu ta marigatanda nga agpili wenno marigatanda nga awan mapilida kadagiti naisalip iti 7th RFAAFIL. Ngem ala, paset daytoyen iti pakasaritaan ti RFAAFIL. Mabalin a makuna a naabak dagiti mannurat a nakilaban iti nakaparsuaan. Wenno apektadoda iti krisis nga agdama a mapaspasamak.

Iti sabali a bangir, naragsakkami ketdi gapu iti ayat nga it-ited latta dagiti mannurat iti pasalipmi. Makapatibker pakinakem dagiti komento a maaw-awatmi. Kas kuna ti maysa a nakisalip: "Makisalipak iti RFAAFIL gapu ta daytoy ket patienmi...." Saanmin nga ituloy ti nayonna.

Good luck kadagiti mannurat a nakisalip. Agyamankami unay kadakayo!

[Daytoy ket bukodmi laeng a paliiw a kas esponsor ken kas maysa a reader. Naikur-itmi dagitoy para kadagiti agbasbasa. Pagliwliwaan para iti panaguray iti resulta ti pasalip.]

Posted by rfaafil at 11:37 PM EDT

Updated: Sat, Mar 21 2009 10:28 PM EDT

Share This Post

Post Comment | Permalink

NAGASAT dagiti kasapaan a sarita ken daniw iti 7th RFAAFIL. Makunami a napnek ken kuntento unayen ni mannurat iti gapuananna ta impatulodnan ti pakisalipna. Saanen nga agkarkarintar wenno agikamkamakam iti pakisalipna.

Kaaduan sa ngamin nga iyur-uray dagiti makisalip ti deadline nangruna ket, iti pasalipmi, mabalin nga ipatulod ti entry babaen ti e-mail uray pay iti maudi nga aldaw. Kasla pay ket no kua iyur-urayda daytoy nga aldaw sa ipatulodda ti pakisalipda.

Dagiti kasapaan nga entry iti sarita:

1. Dagiti Wallages iti Panagdaliasat ni Ama Dario – ni Ped Sinar
2. Dalluyon – ni Igid T. Baybay
3. Dagiti Suni – ni Sony A. Sunni
4. [Dadduma pay a naisalip a sarita. Basaen ditoy.]

Dagiti kasapaan nga entry iti daniw:

Baribari Kontra Bisin, Tig-ab Kontra Gawat: Dallang iti Nakaparsuaan ti Bagas – ni Desaparecido
1. Allawig – ni Tengnga T. Daga
2. Saluadantay' 'Toy Pagtaengan nga Impaay ti Namarsua – ni Ozone L. Ayer
3. [Dadduma pay a naisalip a sarita. Basaen ditoy.]

Kadagiti kallabes a tawen, adu metten kadagiti nasapa a naawat iti Secretariat ti nangiyalat kadagiti pammadayaw. Adda ngata met gundaway dagitoy nasapa a naawat ita a tawen?

Iti sabali a bangir, no bilang man adda malibtawanmi a subalitan nga e-mail dagiti makisalip a mangibagbaga a naawatmin ti pakisalipyo, dawatenmi a kitaenyo koma laengen ti listaan dagiti naisalip no nairamanen ti impatulodyo a pakisalip.

[Tema ita a tawen: TAO KONTRA NAKAPARSUAAN. Sumaruno a mapagsasalipan: Mangipatulod.]

Posted by rfaafil at 7:09 PM EST

Share This Post

Post Comment | Permalink

"Manipud iti tukot ti pusok, agyamanak," kinuna ni Joel B. Manuel iti pannakapili manen dagiti agbasbasa iti sinuratna a sarita a napauluan ti Ken ni Pidut: Dagiti Daton iti Angep tapno mapadayawan iti RFAAFIL 2008 Reader's Choice Award. "Kunaek a dakkel manen a balligi para kaniak ti pannakapili ti saritak iti maikatlo a gundaway a maikari iti Readers' Choice Award."

"Maysa a sarita a kunaek a pinarbok manipud kadagiti pudpudno a pasamak kabayatan ti gubat. Ngem nupay agpaypayso a nagbibiag da Apo Llanes, Sagad, Pacifico Guillen ken dadduma pay, awan iti pakasaritaan ti pannakadakamat ti maysa nga ayup nga agnagan iti Pidut-ngarud, daytoy a paset ti simrekan ti piksion iti saritak. Ti kinasinged ti pannakilangen ti tao iti ayup, ken ti ayup iti tao, ti kayatko a palbogen iti daytoy a sinuratko. Saanko a gamden a pinagparang a puro a historical fiction daytoy, ket no adda man kinahistoriko daytoy nga obra, inusarko ti pakasaritaan a kas kambas, kas pundasion no panagmake-up koma daytoy."

"No pintor ti maysa a mannurat ket mangala iti maysa a retrato, ket ipintana daytoy, saanen a maysa a retrato ti inobrana no di ket maysa a painting/ naipinta a ladawan nupay naibasar iti retrato. Saan a kunaen ti maysa a mangbuya iti painting nga aramid ti maysa a retratista ti painting, maysa daytoy nga aramid ti pintor."

"Ti Pidut ti kunaek a 'painting' a naibasar iti 'retrato', retrato ti gubat. Nupay adda agkuna a naglakan nga aramiden no ti saritam adda pagpadronam, kunaek met a pudno, no awan la uray ania a binaliwam iti taray ti historia. Adda kadi ti pakasaritaan ti maysa nga aso a pinidpidut laeng ken ti pannakilangenna kadagiti soldado iti gubat? Adda kadi kasta a pakasaritaan kadagiti pinanid ti historia? No awan, nalawag a pinarbo ti autor ti kasta a sarita ket no nakadar-aw iti agpang, saan koma a mamenus daytoy no maiyatar kadagiti makuna a 'puro' a pinataud ti managparnuay nga utek ni mannurat."

"Agyamanak!"

Posted by rfaafil at 9:38 PM EST

Updated: Sun, Dec 28 2008 9:48 PM EST

Share This Post

Post Comment | Permalink

ASINO dagiti mannurat iti likudan dagiti kapintasan a sarita iti 6th RFAAFIL? Kas nadakamatmin, tallo dagiti taga-Ilocos Norte, maysa ti taga-Baguio City, ken maysa ti taga-La Union.

Dagitoyda man:

RESIBO - Sarita ni Clarita A. Sumahit ti Baguio City.

NI APO TACIO, NI LAMPANGOG, KEN NI MANOLING - Sarita ni Arnold P. Jose ti Laoag City, IN.

KEN NI PIDUT: DAGITI DATON ITI ANGEP - Sarita ni Joel B. Manuel ti Banna, Ilocos Norte.

MANIPUD KEN NI PROAILURUS AGINGGANA KEN NI DANTE - Sarita ni Errol L. Abrew ti Caba, La Union.

TAOKAYO LA NGA AGPAYSO - Sarita ni Efren A. Inocencio ti Batac, Ilocos Norte.

Madama pay laeng a kedngan dagiti hurado no ania a puesto ti gun-oden a pammadayaw dagitoy a sarita. Ngem uray no asino kadagitoy ti mangabak, maragsakankami unay. Agsusupadi dagitoy a sarita iti ramen. Napintas unay ti pannakaubonda iti 6th RFAAFIL. Pugtomi a naiget a paglalabanan dagiti taga-Ilocos Norte ti umuna a puesto.

Asino met ti pugtoyo a mangabak: ti kabalio, ti nuang, ti aso wenno dagiti dua a pusa?

Idanonmi ti nairut nga abrasami kadakayo a mamannurat. :-)

Posted by rfaafil at 5:06 AM EDT

Share This Post

Post Comment | Permalink

PAGUR-URAYAN iti resulta ti Salip iti Sarita ti 6th RFAAFIL, adtoy man nga iburaymi ti bukodmi a paliiw kadagiti napili a kapintasan a sarita. Kas nakunami, pagliwliwaan laeng daytoy dagiti agbasbasa a maganatan kadagiti sarita. Saanmi a panggepen nga impluwensiaan ti pangngeddeng dagiti hurado.

Dagiti trinatar nga ayup dagiti sarita. 1. Manipud ken ni Proailurus Aginggana ken ni Dante - Pusa, 2. Ken ni Pidut: Dagiti Daton iti Angep - Aso, 3. Ni Apo Tacio, ni Lampangog, ken ni Manoling - Nuang, 4. Taokayo La Nga Agpayso - Pusa, ken 5. Resibo - Kabalio.

Dagiti nagustuanmi a paset ti sarita:

Kastoy man ti kuna ti hurado: Balitok a kapanunotan mainaig iti beddeng ti tao ken ayup nangruna iti impakitana a kasasaad ni Angkel Edgar a kayat dagiti annakna nga agnaed iti pagtaraknan dagiti lallakay iti Amerika. Adu dagiti nakakaasi a nataengan nga awan ti wayawayada kadagiti pagtaraknan nga ur-urayenda lattan ti panangala ti Dios iti binulodda a biagda. Ngem sabali ni Angkel Edgar ta nagawid iti timmaudanna a daga ket ditoy a ninanamna ti wayawayana - ti daga a timmaudan ken pakaitabonanna.  

Saluduak ti autor daytoy a sarita iti pannakaipateg ti ayup - ti pusa. Realistiko para kadakami 'tay pannakaitinnag ti pusa iti nangato a rangtay. Naipupok iti uneg ti maysa a sako ngem nagbiag pay laeng. 9 lives, kunadan sa itay iti pusa.    

KEN NI PIDUT: DAGITI DATON ITI ANGEP 

Siak ti maysa kadagidi paraisursor idi. Iligpitko latta kadagiti bautek idin no awan ti madanonmi ita balay. Kadagiti kasta nga aramidmi ti nakadanonak idi purok dita asideg ti Sidiran. Bassit a purok, lima, innem, pito ngata a balbalay. Kunam kadi, Barok, ket nauram daydi purok. Nagatapak a kapampanaw dagidi Hapon ta adda met nagnaan ti ligay indi tapok. Tssk, tssk, Barok, mapaluaak pay idi makitak. Agkaraibalangtad dagidi bangkayen, indi asideg dagidiay umas-asuk pay laeng a balay. Adda maysa a kamarin nay, indi asideg ti kadakkelan a balay a tinabla. Inasitgak ta amangan kunak no adda pay sibibiag.

Nii, ta adda agal-alang-ang indi sirok, ammom ti kamarin idi adda sirokna a pagaponan ti manok. Aya kunam, Barok, ta adda bangkay ti labang nga aso indi asideg ti ruangan. Daradara man. Ammom dagidi Sakang ken uray dagidi gerilia, pakipatpatayda ta asom idi ta naringgor ken agiyukom, kunada. Idi sumiripak, addada pay uk-uken a daradara sadiay. Inada ngata ti aso iti ruangan. Immad-adda di alang-ang indi rimmuok ti natnatay a nangingisit nga uk-uken. Titit, kunak, a, ta paruarek di uken a sibibiag.

Rimkuas di uken manipud indi ayanna kunam, sumari koma idi nalapsi a balatbat a kawayan a ngem di imsek. Nagal-alang-ang latta. Titit, kunak, latta, isu di, nasurotanna di ridaw, immay kaniak, agpilpilay ngem agkalkalawikiw ni loko.

Naan-anoka, aya, apo, kunak, sa inaprosak di ulona. Dinildilanna di dapanko Teddanaka met ti gubat, aya, apo, kunkunak a, ap-aprosak. Teddanatayo amin ti gubat, apo, kunkunak. Nalungpo, mayat ti panagkombinasion ti nangisit ken purawna. Kadayta koma darangidongna, naiban-uyat ti purawna. Adda pay puraw ita ngatuen ta matana, puraw pay ta gurongna ken pungto di ipusna. 

Kaasika met, no awan mangpakan kenka, kunak, sa kinitak dagiti bangkay. Dagitan dagiti apom, bangkaydan, apo. Simmiplot iti isipko a patayek sa laengen ta di kakaasi. A ngem ana komat pangpatayak ket nabiag met, Barok? Pada a nabiag. Haan a gapu ta gubat, mangkettelak met iti biag ti awanan gaway iti pammatik a saanna a malasat ti gubat? Madi, di ngamin, Barok? Limmikudakon ta no patayek, kunak, di pay narangranggasak metten ngem dagiti Hapon, Barok? Makaammoka ketdin no kanemto dagiti bangkay kunak, a, ngem napaaligaggetak, Barok. Wen, a, no awan mangitabon kadagitoy, pagbiagton daytoy nga uken ida. Agbibinnadangdanto kadagiti sawi ken uwak sa sarunuento dagiti igges. Nagalang-ang lattan idi lumikudak. Nataliawko. Kitkitaennak, naliday di matana. Nakatugaw indi tapok ket agkalkalawikiw, uray la lugit-lugit di ipusnan. Diak naala ti immaddang, Barok. Ala, umayka ngaruden, kunak sa pinayapayak. Nii, timmaray di uken, Barok, kastaunay paragsitna a nanguli iti imak.   

Ay, ket rugina pay laeng, ginuyodnan ti riknami. Rugi pay laeng ti sarita, nariknamin ti pannakaipateg ti maysa nga ayup, ti aso, ditoy. Limmikudakon ngem diak naala ti immaddang, Barok. Ala, umayka ngaruden. Napidpidut laeng ti aso, isu a napanaganan iti PIDUT. Ala, ket mabasayo dita ngato ti ibagbagami.

Daytoy ti sarita a nangiluges amin kadagiti sarita a nangtratar iti aso. Mabalin met a mangiluges amin kadagiti kinabalubalna. Naragsakkami amin kadagiti lima a napili a sarita ngem no adda man maysa a sarita a mangagas iti bannogmi, daytoyen. Ken ni Pidut: Dagiti Daton iti Angep. Kuna ni hurado: Ad-adda manen a bumaknang ti Literatura Ilokana babaen ti RFAAFIL gapu iti daytoy a sarita.    

TAOKAYO LA NGA AGPAYSO 

“Ne, da Sheryl ken ni Myan dagidiay, a,” nakunak iti kaunggak ket lalo a pinatademko ti panagdengngegko. Adda maysa a pasdek a nagbaetan ti Science Room nga ayanmi kadagiti padak nga ayup ken ti auditorium a pakaang-angayan ti programa dagiti agturpos iti maikanem. Nalawag unay a mangngegmi dagiti sasawenda iti programa. Saanmi laeng unay a maawatan dagiti dadduma a sasawenda agsipud ta paspasig met nga Ingles.

“Ngiawww, ngiawww,” insangitko. Agraduaren da Myan ken Sheryl. Saankonto idan a makitkita. Ni la unay Myan a nangtartaraken kaniak manipud pay kutingak.

Nalpasen ti programa idi immasideg ni Myan iti nakaipupokak. Umay ngatan agpakada, naisipko. 

“Tagtagari, Angngingiw,” inyarasaas ni Myan idinto ta linukatanna ti serra ti tangkalko. Kinautnak nga inruar. Inubbanak ket napandagak dagiti medalia iti barukongna. Immudumodko met ti rupak iti puraw a kawesna a nagraduar.

“Uray second honors laeng ti naalak no agsublika la ketdin kaniak, Angngingiw,” intalangkiawna.

Nagtalangkiaw pay naminsan sakbay nga impisoknak iti backpackna. Nagtaltalnaak iti uneg ti bag iti agarup sangapulo ngata a minuto nga arintarayen a pannagna ni Myan.

Posted by rfaafil at 3:42 AM EST

Updated: Sun, Mar 9 2008 6:40 AM EST

Share This Post

Post Comment | Permalink