Topic: Pasalip
"Manipud iti tukot ti pusok, agyamanak," kinuna ni Joel B. Manuel iti pannakapili manen dagiti agbasbasa iti sinuratna a sarita a napauluan ti Ken ni Pidut: Dagiti Daton iti Angep tapno mapadayawan iti RFAAFIL 2008 Reader's Choice Award. "Kunaek a dakkel manen a balligi para kaniak ti pannakapili ti saritak iti maikatlo a gundaway a maikari iti Readers' Choice Award."
"Maysa a sarita a kunaek a pinarbok manipud kadagiti pudpudno a pasamak kabayatan ti gubat. Ngem nupay agpaypayso a nagbibiag da Apo Llanes, Sagad, Pacifico Guillen ken dadduma pay, awan iti pakasaritaan ti pannakadakamat ti maysa nga ayup nga agnagan iti Pidut-ngarud, daytoy a paset ti simrekan ti piksion iti saritak. Ti kinasinged ti pannakilangen ti tao iti ayup, ken ti ayup iti tao, ti kayatko a palbogen iti daytoy a sinuratko. Saanko a gamden a pinagparang a puro a historical fiction daytoy, ket no adda man kinahistoriko daytoy nga obra, inusarko ti pakasaritaan a kas kambas, kas pundasion no panagmake-up koma daytoy."
"No pintor ti maysa a mannurat ket mangala iti maysa a retrato, ket ipintana daytoy, saanen a maysa a retrato ti inobrana no di ket maysa a painting/ naipinta a ladawan nupay naibasar iti retrato. Saan a kunaen ti maysa a mangbuya iti painting nga aramid ti maysa a retratista ti painting, maysa daytoy nga aramid ti pintor."
"Ti Pidut ti kunaek a 'painting' a naibasar iti 'retrato', retrato ti gubat. Nupay adda agkuna a naglakan nga aramiden no ti saritam adda pagpadronam, kunaek met a pudno, no awan la uray ania a binaliwam iti taray ti historia. Adda kadi ti pakasaritaan ti maysa nga aso a pinidpidut laeng ken ti pannakilangenna kadagiti soldado iti gubat? Adda kadi kasta a pakasaritaan kadagiti pinanid ti historia? No awan, nalawag a pinarbo ti autor ti kasta a sarita ket no nakadar-aw iti agpang, saan koma a mamenus daytoy no maiyatar kadagiti makuna a 'puro' a pinataud ti managparnuay nga utek ni mannurat."
"Agyamanak!"