Topic: Pasalip
NAGASAT dagiti kasapaan a sarita ken daniw iti 7th RFAAFIL. Makunami a napnek ken kuntento unayen ni mannurat iti gapuananna ta impatulodnan ti pakisalipna. Saanen nga agkarkarintar wenno agikamkamakam iti pakisalipna.
Kaaduan sa ngamin nga iyur-uray dagiti makisalip ti deadline nangruna ket, iti pasalipmi, mabalin nga ipatulod ti entry babaen ti e-mail uray pay iti maudi nga aldaw. Kasla pay ket no kua iyur-urayda daytoy nga aldaw sa ipatulodda ti pakisalipda.
Dagiti kasapaan nga entry iti sarita:
- Dagiti Wallages iti Panagdaliasat ni Ama Dario – ni Ped Sinar
- Dalluyon – ni Igid T. Baybay
- Dagiti Suni – ni Sony A. Sunni
Dagiti kasapaan nga entry iti daniw:
- Baribari Kontra Bisin, Tig-ab Kontra Gawat: Dallang iti Nakaparsuaan ti Bagas – ni Desaparecido
- Allawig – ni Tengnga T. Daga
- Saluadantay' 'Toy Pagtaengan nga Impaay ti Namarsua – ni Ozone L. Ayer
Kadagiti kallabes a tawen, adu metten kadagiti nasapa a naawat iti Secretariat ti nangiyalat kadagiti pammadayaw. Adda ngata met gundaway dagitoy nasapa a naawat ita a tawen?
Iti sabali a bangir, no bilang man adda malibtawanmi a subalitan nga e-mail dagiti makisalip a mangibagbaga a naawatmin ti pakisalipyo, dawatenmi a kitaenyo koma laengen ti listaan dagiti naisalip no nairamanen ti impatulodyo a pakisalip.
[Tema ita a tawen: TAO KONTRA NAKAPARSUAAN. Sumaruno a mapagsasalipan: Mangipatulod.]
