Mood:
specialTopic: Dadduma Pay
PAKDAAR: Nakaam-amak nga arapaap, nakaam-amak nga imaldit. Agtalinaed koma lattan iti isipblagmi ngem agsipud ta kayatyo met kablag ti agarapaap, adtoy ngarud nga ipanablaagmi.
************
NAPATEG kadakami ti nariingan ken bukodmi a pagsasao. Saanmi nga ibain, ipagpannakkelmi pay ketdi. No saan man a naisuro kadakami iti pagadalan, saanmi met a pinukaw ti gundawaymi a mangadal iti daytoy a lenguahe. Isu pay ti kanayon nga aramatenmi iti panagsursuratmi.
Ket malagipko man ita ti panagsaritami iti napalabas a panagturpos dagiti estudiante iti Sta Ana High School a naggraduaranmi, nakasaysayud ti panagbalikas ti maestra iti gangannaet a pagsasao a kinunana: As much as I would like to introduce our guest speaker in English, he prefers to be introduced in Iluko. Ngem nagtabbed ti dilana idi isarunonan ti panagsaritana iti bukodna a pagsasao.
Kalpasan ti panagbitlami, napintas ken makapadakkel iti puso ti nagbalin a reaksion dagiti mannursuro iti dayta a pagadalan. Kinunada nga iti kano umuna a gundaway, adda guest speaker a nag-Ilokano. Ket umuna kano a gundaway a nakaul-ulimek ken napasnek a dimngeg dagiti estudiante. Agyamanak met ngarud kadagiti kinonsultami, a dimin inaganan, no ania dagiti napateg a sawenmi kadagiti agturpos.
Wen gayam, kablag, naputarmi pay ti maysa a sarita a napauluan iti MEDALIA kas pananglagipmi iti kinahaiskulmi. Ah, ipatulodminto iti Bannawag, kablag, ta arapaapmi a maimalditto iti masungad a panagturpos manen dagiti agbasbasa.
Wen, kablag, idi pay laeng, napategen kadakami ti bukodmi a pagsasao. Ngem ad-adda a napaneknekanmi ti kinapategna iti pannakayadayomi iti daga a nakayanakanmi. Nayanak ngarud ti RFAAFIL kas paset ti panangtaliaw, panagyaman ken panangipateg iti nagtaudanmi a puli. Ti RFAAFIL kas maysa a bukel a naitukit, sakbay nga intukitmi, arapaapmi nga agrusing, agtubo, dumakkel, agrangpaya agingga nga agbunga tapno maaddaan iti baro a bukel. Bukel nga agbalin manen a bin-i tapno maitukit.
Iti masungad a tawen, daytoy man ti arapaapmi nga inayon nga aramiden para iti RFAAFIL 2005 Reader's Choice Award: Dawatenmi ti komento wenno opinion dagiti agbasbasa, a mayat a mangted iti kapanunotanda, kadagiti sarita a magustuanda. Adda gunggona dagiti reader a mapilimi dagiti komentoda. Saanminto metten nga aladan dagiti sarita, a nawayanto a mabasa dagitoy, iti rfaafil.com ta addan napimpintas a pamuspusanmi iti pannakabilang dagiti opisial a butos dagiti readers iti internet.
Dagiti kano mannurat idi, kablag, nagagagetda ket dagiti mannurat ita, masadsadutdan nga agsurat. Saan kano payen nga aktibo dagiti dadduma a tsapter ti GUMIL Filipinas. Nalabit mabalin a pudno daytoy ken mabalin met a saan. Ngem adda man pampanunotenmi tapno medio masulosionan daytoy a banag uray no pangrugrugian laeng. Arapaap nga iwayat, tapno ad-adda pay nga aggaggaget ni mannurat a makisalip.
Sabali pay a parmatami ti pannakayalnagto manen ti sabali a SAGUT. Sagut a nakaurnongan dagiti 10 a kapintasan a sarita iti RFAAFIL 2005-2006. Mabalin a mairamanto metten ditoy dagiti 10 a daniw.
Personal nga arapaapmi ti makapatanor iti agbalin a Miss GUMIL Filipinas. Kasano ngatan a matungpal daytoy nga arapaapmi ket bin-ig met amin a lallaki dagiti bungami. Ania ngata, kablag, no isayangkatto met ti GUMIL Filipinas ti makunkuna a Mr GF? Wenno umannugot ngata ti GUMIL Filipinas no adda representative nga aggapu iti RFAAFIL a makibalubal iti nasao a pakontes? Ah, bay-am kadi nga agarapaapkami, kablag!
Adayo, wen, adayo pay ti tawen 2012 ngem arapaapmi a maimalditto ti libro a nakaurnongan dagiti sangapulo a modelo a sarita nga inaramat ti RFAAFIL iti pasalipna iti uneg ti maysa a dekada. Libro a sagut ken panagyamanmi kadagiti mannurat a nangted iti ayat iti pannakausar dagiti saritada a kas pagtuladan dagiti makisalip.
Ad-adayo manen ti tawen 2020, sangapulo ket lima a tawen manipud ita, ngem kasta met ti kaadayo ti imahinasionmi: arapaap ti RFAAFIL nga isu ti mangsangaili iti kombension nasional ti GUMIL Filipinas. Nakaam-amak nga arapaap. Ni laeng Apo Dios ti makaibaga no sibibiagto pay ti RFAAFIL iti dayta a panawen. Isu laeng ti makaibaga no matungpal daytoy nakaam-amak a tagainepmi.
Matungpal dagiti arapaap, no buyogan iti aramid. Ngem dagiti arapaapmi, kablag, maragpatda laeng babaen ti tulongmo kasta metten kadagiti mannurat ken agbasbasa a naayat a makipagmuli iti panagrang-ay ti bukodtayo a pagsasaotayo.
