UMUNA A SARIBLAG (MAIKA-7 A PASET)
Mood:
energetic
Adtoy manen datao, kablag, a mangnayon iti sariblag. Naturog sa metten ti bagimi. Awan metten maisilpomi iti saritablag. Isu ngarud nga 'energetic' ti mode nga inusarmi tapno napigsa ti puersa a malpasmi daytoy a sarita.
Hmmm, napintas man ti "'Sa 'Yo" a kanta ni Janno Gibbs a sonatami.
Nagsardengantayo kadin? Ah, dimteng a di napakpakadaan ti maikadua a pamilia ti pimmusay. Ngem kas iti napasamak, adda naganawa iti eksena. Naalas unay no agpinnengnget dagiti dua nga inna.
Ti bidatayo nga anak, limmiklik met iti riribuk. Ngem no malagip daytay naudi a saludsodtayo, kablag, addanto latta iti murdong ti isipna ti adaywanna a situasion. Maitarayanna kadi?
DANDANIN agtindek ti init idi aglinongkayo nga aguliteg iti narukbos a narra iti tengnga ti kamposanto. Natibker daytoy a kayo iti sidiran ti patakder a pakaisardenganto ti bangkay kalpasan nga aggapu idiay simbaan tapno makararagan pay wenno kanito ti pamilia nga agpakada iti maudi a gundaway iti pimmusay sakbay a makaluban ti lungon ken maiserrek iti panteon. Nakapanawen dagiti dua a kaduayo a nagtrabaho kalpasan a makapagmeriendada iti binalonyo. Nagbatikayo pay ta pampamagaanyo ti palitada sayonto ikabil ti lapida.
"Dakkel gayamen ti putot ni manong," kinuna ni ulitegmo. Manong ti awagna ken ni tatangmo ta in-inaudi la bassit daytoy iti amam. Isu ti kadekketan a kasinsin ni tatangmo. "Kaing-ingasna la unay ni Aldwin."
Naisardengmo ti mangkagat iti tinapay a naguduamon a kanem. Aldwin gayam ti naganna! nakunam iti unegmo. Nailabegka.
"Naimbag ta pinakaammuan ni lolam dagitoy tapno makitana met ti amana." Nagsennaay ni ulitegmo. "Maysa nga aldaw laeng ti baetyo ngem immun-una a nayanak ni Aldwin isu a manongem. Apay itattam kadi laeng a makita ti kabsatmo?"
Apaggaraw laeng ti ulom a panagwingiwingmo koma.
"Saanmo kadi a nakitkita dagiti ladawanna `yanda lolam?"
Saanka a nagtimek ket bimmallaet ti kinaulimek. Natitilengka kadagiti uni iti aglawlawmo. Namatmatam ti panagkutikuti ti anniniwan dagiti bulong ti narra iti sanguanan ti nayaplag a sako a nagdalupisakam. Nagkakanayon ti panangsusopmo iti naibotelia a pagpalamiis.
Nakadlaw ni ulitegmo, nga agtugtugaw iti ramut a rimmuar iti daga, a liklikam ti sumungbat kadagiti saludsodna.
"Apay, barok, adda kadi guram iti amam?" dineretsonaka.
Saanka a nagtimek. Nakaemmo ketdi ti bibigmo.
"Ania kadit' panggurguraam iti amam? Gapu kadi ta adda maikadua a pamiliana?"
Saanka latta a nagtimek. No mabalin la koma a tumakderka ket layawlayawemon dagiti naintar a panteon iti masanguanam, inaramidmon, kayatmo laeng a liklikan dagiti saludsod ni ulitegmo.
"Ammom barok," nagsennaay ni ulitegmo. "Ti biag ti tao.... agsasabali, agsusupadi, nagduduma. Adda nabaknang, adda napanglaw. Adda nanam-ay, adda agrigrigat. Adda naragsak, adda naliday. Adda nagasat, adda daksanggasat. Ngem adda kadatayon no kasano a sanguentayo ti biagtayo, no kasano nga awatentayo dagiti pasamak ken no kasano a sangalentayo ti bukodtayo a pakasaritaan."
Nagtalinaedka latta a naulimek ket napasnekka a dimngeg kadagiti sawen ti ulitegmo.
Lima nga aldaw laengen sakbay ti kallaysa da nanang ken tatangmo idi agpakaasi ni tatangmo ken ni nanangmo, kinuna ni ulitegmo, ammom metten ti baro. Iti nadagaang a sardam, saan a makaanay nga agdigos laeng, sapulenna ti pariir ti arubayan tapno lang-abenna ti ayamuom ti sabong. Yantangay asidegen ti kasarda ken isunto kano met laeng ti pagturonganna, adda inud-odan ni tatangmo ken ni nanangmo. Ngem saan nga immannugot ni nanangmo uray no adu a pilit ti amam.
Daydi a sardam, inawisnak ni tatangmo a mapankami laengen iti maysa a beerhouse, intuloy ni ulitegmo. Ket nagpapas ni tatangmo iti lamiis ti serbesa ken ragsak iti uneg daydiay a pagpalpaliwaan. Naguapo ti amam ket asino ti babai a saan nga agkagusto kenkuana? Gapu ta nabarteken, impagarupnan a ti babai iti beerhouse ket isu ti ay-ayaten ken pakasaranna a babai.
Nagsikog ti babai ket impakaammona a dagus ken ni tatangmo ngem saan nga akuen ni tatangmo nga anakna ti imet daytoy. Ngem idi maitao ti ubing, ken makita ti amam a karuprupana la unay, namati nga anakna ti ubing. Tallo a tawen nga inlemmeng ni tatangmo daytoy a banag ken ni nanangmo ngem iti maysa nga aldaw, dimteng ti panagsinnango dagiti innayo ken Aldwin.
Nasapa iti bigat, dimteng ti maysa a babai iti balayyo a nakaubba iti ubing. Addaka idi iti arubayan a nakasakay iti bisekletam a regalo ni tatangmo iti kallabes a panagkasangaymo. Apaman a maibaba ti babai ti ubbana nga ubing iti arubayanyo, nakaal-aliston a sumrek iti pagtaenganyo a mangparparuar ken ni tatangmo a nairana met idi nga awan. Nakigtot ni nanangmo idi madlawna a karuprupa ti amam ti ubing ket iti apagdarikmat naawatanna dagiti pasamak. Nagpinnengnget dagiti innayo. Timmarayak idi nga immarayat tapno aganawa.
Idi mapagtalnak dagiti dua, inubba a dagus ti babai ti anakna a madama idi a kasarsaritam. Intudo idi ti ubing iti bisekletam sana kinuna: "'Nang, kapadpada `tay bisikletak nga inregalo ni tatang." Ammok, naganus pay idi ti isipyo ken Aldwin. Ngem diakammo no malagipyo a dua ken Aldwin daydi a pasamak.
Binalakadak ni tatangmo kalpasan daydi a pasamak. Imbagak nga iyadayona ti maikadua a pamiliana kadakayo tapno maliklikan ti riribuk ket tinungpalnak met. Pinagnaedna ngarud dagiti aginana idiay Manila. Ti bus a manmanehuenna ti nagbalin a rangtayna tapno mabisitana a kankanayon ti dua a pamiliana.
Dimmagsen ti barukongmo. Kasla adda agsullat iti karabukobmo.
"Dumtengto met ti panawen nga agbalinka a maysa nga ama. Inton dumteng dayta a kanito, nalabit, maawatamto met ti amam."
Saanka latta a nagtimek. Imbakalmo itan ti imatangmo iti panteon a kaar-aramid. Ammom lattan a timmangkenen ti pannakapalitadana babaen ti makasinit a darang ti nakatindeken nga init.
"Kaamaknaka ni tatangmo, barok. Kaamakna la unay ti kinaulimekmo. Kadakayo a dua ken Aldwin, kanayonna nga ibaga kaniak a sika kano ti nangtawid iti kababalinna. Kabutengna ti bukodna nga anniniwan. Dina kayat a maipadaka kenkuana. Amangan ta surotem met dagiti killo a tugotna."
Nalagipmo, maysakanto kadagiti estudiante a maukkoran iti medalia ti pammadayaw. Saanen a nauray ni tatangmo ti aldaw a panagturposmo. Ti kunam a tagiuraymo nga aldaw tapno ipaneknekmo kenkuana a makapagturposka iti kolehio a saan laeng nga iti sekundaria. Ti aldaw ti balligi nga ipagpannakkelmo iti amam a kabaelamto a sangalen ti maysa a naragsak ken natalinaay pagtaengan.
Simmallin iti isipmo da Aldwin ken ti inana a pinanawam iti balayyo. Ania ngatan ti napasamak? Napateg kadi pay ti makiriri kadagitoy itan ta pimmusayen ti ama ti pagtaengan? Nailansa ti imatangmo iti semento a krus ti panteon ni tatangmo.
Nakaul-ulimek ni ulitegmo a nagkallugong ket nagturongen iti panteon. Dinan inuray no ania ti reaksionmo kadagiti impudnona ta nagtalinaed met lattan a nakakaem dagiti bibigmo. Imparabawmo metten ti kallugong iti ulom. Timmakderka tapno surotemon ti ulitegmo.
Hmmm, napanunotmi man a lapdan ti panagarubos dagiti lua ti bida. Editenminto met nga umuna dagiti immun-una nga eksena no adda man nagarubos a luana. Bay-am ta inton maitabon ti amana, inton aggibus ti sarita a paruarenmi ti sangkaterba a sangsangitna. Pespesenmi amin a luana. He-he-he!
Uray lalaki, kablag, agsangit met kunayon sa! Wen dakami, kablag, agsangitkami met. Agsangit met ti pusomi. Agsangit met ti matami no kasdiay nga agiw-iwakami iti lasona, he-he!
Ala ngarud, kablag, padaananyo ti maisarunomi manen iti sariblag.
Posted by rfaafil
at 4:41 AM EDT
Updated: Mon, Nov 1 2004 4:19 PM EST