Maragsakankami koma ta inaldaw nga adu dagiti maaw-awatmi a mensahe iti E-lokano Mail iti inaldaw ngem saan ta makauma met ti agpugas kadagitoy. Agasem ta saan metten a sumardeng ti e-mail a maawatmi gapu iti inkabilmi iti ruangan ti website a mangkalap iti opinion dagiti readers maipanggep iti ayat: (Para kenka, Patgenmi nga Agbasbasa, ania ti depinisionmo iti sao nga AYAT?) No asinoda man, naayatanda met la unayen!

Kuna ni Reader iti AYAT, daytoy man ti inaramidmi a subject ti e-mail a maawatmi. Ngem saan metten nga agsardeng daytoy. Inaldaw a 'Kuna ni Reader iti AYAT.'  Kuna ni Reader iti AYAT. Kuna ni Reader iti AYAT. Kuna ni Reader iti AYAT. Kuna ni Reader iti AYAT. Kuna ni Reader iti AYAT. Kuna ni Reader iti AYAT. Kuna ni Reader iti AYAT. Kuna ni Reader iti AYAT. Sikami pay ketdin ti mauma. Naimbag koma no ti naguneg ti Kuna ni Reader iti AYAT a mensahe ket maipanggep iti kunaen ni Reader iti AYAT ngem saan met. Ti la addan a maaw-awatmi.

Naisangrat laeng koma ti rfaafil@hotmail.com para iti mensahe mainaig iti pasalip wenno iti website ngem naduktalan metten dagiti spammers. Namin-adu nga inyakarmin ti e-mail nga agawat iti KUNA NI READER ITI AYAT ngem kaskasdi a sumrekda iti rfaafil@hotmail.com. Nakarehistron kadakuada daytoy nga address. Nakaprogram sa pay ketdin ta agasem metten ti agsingkuenta nga e-mail a maawatmi iti uneg ti maysa nga aldaw. Kabutengmi payen a lukatan dagitoy a mensahe ta saanmi nga ammon no ania ti opisial nga e-mail ken saan. Awan serserbi ti alad a pangserrami kadagiti mangurkuriro. Nasiglatda a sukatan ti paggappuan ti e-mail tapno nawayada manen a sumrek.

Naimbag ketdi ta dida pay naduktalan ti admin@rfaafil.com. Isudanto ketdi pay a pasalsali. Narigat pay no addanto ketdi entry a malibtawanmi. Daytoy la unay ti ipangpangruna nga an-annadanmi. Imbag ta saanmi nga ar-aramaten daytoy nga e-mail nga agkalap kadagiti kapanunotan no di laeng eksklusibo para iti pasalip wenno maipanggep iti RFAAFIL.

Naannadkami a kankanayon a manglukat iti e-mail a dimi ammo ti naggapgapuanna. No masinunuomi a naggapu iti maysa a mannurat wenno am-mmomi, isu laeng ti pananglukatmi. No saanda a mauma nga agipatulod iti awan kaes-eskanna a mensahe, saankami met a mauma a mangilaksid kadakuada. Ngem nasigsiglattayo latta ta saanda a maawatan ti bukodtayo a sao. Daytoy ti pakaarusanda. Saanda a maaw-awatan ti rirriribukenda.

Dagiti laeng padatayo nga Ilokano ti makaawat kadagiti naimaldit. Bay-anmi a maumanto dagitoy sabali a puli a sumengsenggat iti annayas ti panagnami. Iti sabali a bangir, pakaragsakanmi met nga iturong dagiti madaydayaw a bisitami tapno saanda a mayaw-awan iti nanumo a pagtaenganmi iti Internet. Kas koma no simrekda iti biddut a dalan a kas itoy. (www.rfaafil.com/nayaw-awanak. I-klik daytoy kas pagarigan nayaw-awanka tapno iturongkayo iti ruangan ti pagtaengantayo iti Internet.)

Kayatmi met ti agyaman kadagiti agbasbasa nga agipatpatulod iti e-mail a naglaon iti makapatibker ken makainspirar a mensahe. Saan a mailaksid kadakami ti kinapategyo nga agbasbasa. Saankami a makapagna no awan mangkibin kadakami. Saankami nga agbiag no awan mangbiag kadakami. Awankami no awankayo.

Kuna ni Reader iti AYAT, sungbatanmi iti 'Ti kunami nga Ayat ken ni Reader' - isu ti rfaafil.com nga ikarigatanmi a biagen agingga a sibibiagkami.

Posted by rfaafil at 5:28 AM EST

Updated: Fri, Feb 23 2007 5:39 AM EST

Share This Post

Post Comment | Permalink

KALPASAN ti sarita maipanggep iti pamilia, panagsakripisio, kinatan-ok ti maysa a pagsapulan, panaggayyem ken ayat, maipanggep iti tao ken ayup ti sumaruno a matratar iti Maika-6 a Tawen (2007-2008) a panagpasalip ti RFAAFIL iti sarita.

Iti met daniw, nawaya ni mannaniw a mangpili iti temana ngem nasaysayaat no ti daniw ket maipanggep iti tao ken ayup. Daniw a mairuknoy iti www.rfaafil.com, panaggayyem ken ayat ti tema a natratar kadagiti napalabas a pasalip iti daniw.

Basaen ti pagannurotan ditoy para iti sarita ken daniw. Mabalin met ti mangi-print iti kopia ti pagannurotan iti sarita ken daniw ditoy.

Naragsak nga Aldaw Dagiti Puso kadakayo amin! 

Posted by rfaafil at 6:01 AM EST

Share This Post

Post Comment | Permalink

Pangngaasim koma, Patgenmi a Mannurat, iti likudan ti sarita a "Ti Siled Dagiti Lagip" a suratandakami.  Nabayagen a nangipatulodkami iti e-mail kenka. Pangngaasim ta no mabasam daytoy blogmi, suratannakami a dagus.

Kadagiti met maseknan a nakisalip, basaen ditoy ti agdama a listaan dagiti naisalip para iti sarita ken daniw. Dagitoy dagiti naisalip a naipatulod babaen ti e-mail. Saan pay a nainayon ditoy dagiti naikoreo a naka-address iti Bannawag.

Padaananyo laeng ti pannakairuar ti kompleto a listaan dagiti naisalip. Padaanan pay ti tema para iti 6th RFAAFIL (2007-2008.)

Agdama a listaan dagiti naisalip a sarita: Mabasa ditoy

Agdama a listaan dagiti naisalip a daniw: Mabasa ditoy

Posted by rfaafil at 5:54 AM EST

Updated: Fri, Feb 2 2007 4:36 PM EST

Share This Post

Post Comment | Permalink

NO malagip ita, sangapulo idi ti mapadayawan iti pasalip ti RFAAFIL. Napasamak dayta iti umuna a panagpasalip. Sangapulo dagiti napadayawan a pakaibilanganen ti 'Sumasayyo' ni Fernando B. Sanchez, ti "Kanta iti Sab-ok ti Agpakadan a Malem" ni Agustin DC. Rubin nga isu pay ti kaunaan a Reader's Choice Award, ti "Ti Sagu ni Ama Beren" ni Julio V. Belmes, ken dagiti gapuanan da Jaime G. Raras, Ariel S. Tabag, Marcelino A. Tablizo, Arnold Pascual Jose, Danilo B. Antalan, Jeremias A. Calixto ken Clarito G. De Francia. Ngem nagbalin a lima laengen ti mapadayawan.

No apay a lima, gapu ngata iti napasamak iti maika-2 a pasalip. Saan a nakapatar wenno manmano dagiti sarita a simmurot iti tema ti pasalip. Nalabit, baro ngata a wagas ti pagannurotan wenno baro a desdes a suroten dagiti mannurat.

Madamami a dalusan ti FORUM DAGITI HURADO nga isagsaganami iti panaghurado iti maika-5 a tawen. Napanunotmi a napintas met nga iburay kadagiti agngayangay a makisalipto iti RFAAFIL. (Bareng a, no mapagtutugmokmi manen dagiti hurado iti pagtaengantayo iti Internet.)

Kastoy man ti impaskil ti maysa a hurado iti forum kalpasan a mabasana amin dagiti sarita. Napauluan iti LIMA LAENG KOMA.

Hurado UNO: 

Kaduak a Hurado, Kalpasan a mabasak amin dagiti sarita a naisalip, kaniak a biang, manmano dagiti sarita a nakagaw-at iti pagrukodan. Padayawantayo koma ngarud ni mannurat base iti merito ti saritana.

Basaen ditoy ti tuloyna

Posted by rfaafil at 5:50 AM EST

Share This Post

Post Comment | Permalink

Naawatmi kadi met laengen ti pakisalipmo, Patgenmi a Mannurat?

Nupay an-anusan ti RFAAFIL Secretariat a subalitan amin nga e-mail dagiti mannurat a nakaipatuloden iti pakisalipna, nasayaat met no kitaen iti agdama a listaan dagiti naisalip no nairaman met laengen ti entry nga impatulodmo tapno maliklikan ti ania man a parikut.

Kaaduan kadagiti nairaman iti agdama a listaan dagiti sinurat a naipatulod babaen ti e-mail. Maud-udi a mainayon dagiti naikoreo.

Adtoy man ti sumagmamano a naisalip iti sarita ken daniw:

Sarita:

• Yna – ni Nana
• Umok ti Puso – ni Ef Fe
• Apay a Binaybay-annak? – ni Mara B. Utit
• Dadduma pay nga entries (basaen ditoy)

Agyamankami kadagiti mannurat iti ayatyo a makiparpartisipar iti pasalipmi. Ti regta ken kiredmi iti panangitultuloymi daytoy a proyekto ket agubbog kadagiti gapuananyo, Patgenmi a Mannurat!

Posted by rfaafil at 6:16 AM EST

Updated: Sat, Jan 20 2007 6:28 AM EST

Share This Post

Post Comment | Permalink

Agpatinga laeng iti Enero 31, 2007 ti 5th RFAAFIL. Ipatulodyon dagiti pakisalip tapno saan a maladaw iti pannakaawatmi.

Kadagiti met mannurat a nakaipatuloden kadagiti pakisalipna, saankayo a madanagan ta naawatmin dagiti pakisalipyo uray no saan a nairakurak ditoy blogtayo. Mailistanto amin dagiti naisalip kalpasan a malpas ti deadline.

Agyamankami unay.

Posted by rfaafil at 1:32 AM EST

Share This Post

Post Comment | Permalink

Adtoy pay tallo nga entries para iti Salip iti Daniw ni AYAT:

Umuna a Sabong ni Flora Flower

Kasano ti Manglipat ni Eric Ora

Sipsiputak Dagiti Tumatayab ni Bill Late

Dios ti Agngina kadakayo amin a patpatgenmi a mamannurat. Goodluck!

Posted by rfaafil at 5:10 AM EST

Updated: Mon, Jan 8 2007 1:31 AM EST

Share This Post

Post Comment | Permalink

KADAGITI MAKISALIP: Wen, talaga a saanmi a dawdawaten ti ladawan ni mannurat a makisalip tapno di pay isu a pagparikutanna. Makaammonton ti RFAAFIL a mangdawat iti ladawan ti mannurat a mapili ti saritana aglalo no mailibronto dagitoy a sarita wenno maikabil iti website. Agpatingga ti pasalip iti tema nga ayat inton Enero 31, 2007.

KENKA MANNURAT ITI SARITA: Naawatmi ti sarita a pakisalipmo, Patgenmi a Mannurat, a naglinged iti nagan a Jethro. Naawatmin ti saritam a napauluan iti "Iti Rigat ken Nam-ay..."  Maysa ti saritam kadagiti kasapaan a naawatmi babaen ti e-mail. Agyamankami unay!

KENKA MANNURAT ITI DANIW: Nailistan ti "Biktima ken Ayat" a daniw a pakisalipmo, Patgenmi a Mannurat, a naglemmeng iti parbo a nagan a Kritiko Sibil. Saanmi a masubalitan ti e-mailmo a mangipakaammo koma iti pannakaawatmin ti entrym kasta metten ti panagyamanmi koma kenka agsipud ta saanmi a maitugotan ti nagipatulod iti pakasipmo. Madlawmi a sabali a tao ti nagipatulod iti entrym. Dika agdanag ta nakalistan ti entrym kasta metten ti pudno a naganmo.

KADAGITI AGBASBASA: Agawat latta ti Secretariat ti RFAAFIL kadagiti suhestion no ania ti sumaruno a tema ti pasalip kasta metten kadagiti rekomendasion no asino dagiti sumaruno a hurado iti pasalip. Aramaten laeng ti E-lokano Mail wenno ipatulod babaen ti e-mail iti admin@rfaafil.com wenno rfaafil@hotmail.com. Dakkel a tulong kadakami ti panangiburaymo iti napintas a kapanunotam.

KADAGITI NINONG KEN NINANG TI A.N.A.K.: Agyamankami kadakayo, Kim Sukinaw ken Agustin DC. Rubin, iti ayatyo a manganak iti delegado iti sumaruno a kombension ti GUMIL Filipinas inton Kalgaw 2007. Ni Apo Dios koma ti mangtarabay a kankanayon kadakayo. Kadagiti mayat a tumulong iti agdadamo a mannurat tapno maparaburan iti libre a registration fee iti kombension ti GUMIL Filipinas Annual Convention, kontakendakami laeng. Napateg unay ti ayatyo tapno agtultuloy ti proyektotayo nga A.N.A.K. (Addang Nga Agayab Kamannurat: Awis Nga Agpaay Kailokuan.)

Posted by rfaafil at 5:07 AM EST

Share This Post

Post Comment | Permalink

* Saan a managimbubukod ni ayat.

* Love is like war. Easy to begin but hard to end.

* Saan a matay ti ayat. Dayta ti ammok.

* Ti biag nga awanan ti ayat ket kasla maysa a kayo, awan sabong ken bungana.

* True love doesn't have a happy ending. True love doesn't have an ending.

* Nadarisay ti ayat no ipaay daytoy a saan a birbiroken ti supapakna.

* Ayatem ti padam a tao a kas panagayatmo iti bagim.

* Love has nothing to do with what you are expecting to get – only what you are expecting to give.

* Saanmo a magatang ti ayat.

* Naubing a kankanayon ti puso a managayat.

* No ayat ti immulam, ayat met laeng ti apitem.

* Masursurom laeng ti ayat, no agayatka.

Posted by rfaafil at 4:37 AM EST

Updated: Sat, Dec 9 2006 5:00 AM EST

Share This Post

Post Comment | Permalink