Mood:
not sureTopic: RFAAFIL Blog
Idi maipasngay ti rfaafil.com, adda metten inrugimi a blog ta libre la ngarud dayta a serbisio ti server providermi. (Kasta met ti libre a pannakaisarusar dagiti ladladawan.) Ngem gapu ta ammomi nga agkamtudkami iti oras ken ad-adu pay ti nasisita a tamingenmi nangruna iti panagrugi a panagtayab ti rfaafil, talaga a naikupinen dayta kadagiti agendami.
Ngem nakulding sa, (sa kunak ta agpangngaduakami latta a mangirugi gapu iti kinangednged ti orasmi,) ti riknami iti maysa nga awis nga agkunkuna: isingasingko man kadagiti ilokano a mannurat nga agaramidda met koma iti blogda. Mayat man no adda koma bukod a blogsite ti tunggal maysa kadatayo. Ania ta baka addanto pay mabuangay a gumil blog?"
Awis daytoy ni pagayam Roy a mangtartarawidwid iti mannurat.com a website a pakasarakan kadagiti gapuananna a kas mannurat. Maysakami kadagiti pinukkawanna tapno sumurot iti desdes a rinugianna tapno sumurot met ti ipatpateg a literatura iti panagdur-as ti teknolohia.
Kasano kadi ti agblag? Kasapulan a nagaget, naanus ken napartakka nga agsurat. Kasanon ket siak san daydiay kasasadutan iti panagsuratan? Idi awan pay ti kompiuter iti sanguanak, an-anusak ti agusar iti bolpen ken papel, ngem idi addan, binay-akon ti bolpen ken papel. Iti panagarem, diak kayat ti agaramid iti love letter tapno dumanon iti ar-armek, ad-adda a kaykayatko nga isawang iti sanguananna dagiti sawek. Narigaten no usarennanto ketdi ti sinuratko tapno iwaragawagna iti sapasap ti inruknoyko nga ayatko, he-he-he! Kayatmo ngata a basaenna ti love lettermo iti sanguanam nga adu ti dumdumngek? Ah, sabalin san ti nagturturongan ti sasawek? Kastan sa ti panagrasrasonko no diak a talaga kayat ti agsurat. Akuek, talaga a nasadutak nga agsurat. Dagiti kuadernok idi haiskulak ken uray pay idi kolehioak, awan sa pulos karkargana. No adda man nagunegda, agsasabali dagiti nausar a penmanship. Ania ngarud ti maaramidak no dawatenda met ti notebookko ta isuda kanon ti agsurat para kaniak? Ngem tapno dimo met ibagbaga nga awan serserbik nga agblag, apay pay la a rugrugiak, tapno ibagak kenka, maysaak sa kadagiti nagaget, naanus ken naalibtakak nga agsurat no dadduma. No magagetak ken makaanusak. Kastan sa a talaga.
Subliak manen ti kinahaiskulko. Gayyemko idi ti tisa ken pisara ta naanus ken napartakak nga agsurat. Kanayondak a mandaran dagiti maestro ken maestrak. Tallo a lawanit a nagaabay, napnokton a suratan, addanto pay la agreklamo a kaklasek no rugiakon ti agbura ta dinanto pay gayam nalpas a kopiaen dagiti immuna a sinuratko ket makagura no makamakamko a buraen ti saksakarenna. (Sikretok daytoy, isu a saanmo nga ibagbaga.) Masdaawda no apay a kayatko a kankanayon ti agsurat iti blackboard. Dida la ammo, a ginalgalkon dagiti balikas ket naisarusaren iti utekko. Agasem ngamin ta basaem nga umuna ti isuratmo samonto isurat iti blackboard samonto manen basaen a mamindua no husto met laeng ti insuratmo. Pabasolendakanto pay ketdi dagiti kaklasem no ti la addan nga insursuratmo.
Ngem no pagpiliennak ita no ania ti kaykayatko: ti agsurat wenno ti agbasa? No agsurat ti piliem, pinilim ida a dua. Kasapulam ti agbasa no agsuratka ngem dim' kasapulan ti agsurat no agbasaka. Ania ngarud ita ti narigrigat? Ti agsurat wenno agbasa? Uray ania ti sungbatmo, ti napateg isu ti panagrasonmo. Narigat ti agsurat no puted dagiti imam, no awan tinta ti bolpenmo ket gudugodkanto a gudugok ta paruarem ti tintana, ken, no panunotem pay laeng nga umuna ti isuratmo agingga nga awan met mapanunotmo. Narigat met ti agbasa kunam sa. Kasanon no awan ti anteohosmo, no blackout ket nakasipsipnget, no ipilitmo a basaen ti pampanunoten ti maysa a tao, ken, no dim' met magustuan ti basaem wenno dim' met maawatan ti basbasaem?
Adda idi nakatugawko a balasang. Sinaludsodko no ammona ti agbasa. Nadlawko a immalsem ti rupana ket kinunana: Aniat' pangipagarupam kaniak, laglag? Saanak a nagtagtagari ngem impasangok kenkuana ti Chinese Magazine sako kinuna: Basaem man ngarud daytoy. Intudok dagiti ekis-ekis wenno kasla kaykayo a nagsasanga. Itan mamatika, narigat ti agbasa no dim' met maawatan dagiti letra.
Ah, diak sa kabaelan ti agblag? Awan sa orasko. Madin sat' panagrasrasonko. Ah ngem, ala, ket padasen a, ti magna no saan a kabaelan ti tumaray, uray saggabassit wenno saggaysa laeng ti askaw, tapno adda met pagturongan ti panagblag. Narigat met ti tumaray a bigla no agsursuroka a magna ta dikanto ket matumba. Blag-blag-blag-blog! kunanto ketdi dagiti masalaponmo a labba a matnag iti daga.
