Topic: Pasalip
NAPIPINTAS dagiti duapulo ket pito (27) a sarita iti 6th RFAAFIL ngem ti adatna, adda ngamin tema ti pasalip - sarita a maipanggep iti tao ken ayup. Daytoy a tema ti gapuna no apay a manabtuog ti kaaduan kadagiti naisalip. Nupay kasta, adda met pagsayaatan ti kinaadda iti maymaysa a tema ta ditoy a mapagdadasig a naimbag dagiti naisalip. Ditoy a makita ti kinabaked wenno kinaisangsangayan ti mapili a sarita.
Saankami a hurado a kas kanayon nga ibagami ken saanmi met nga impluensiaan ti pangngeddeng dagiti hurado ngem adtoy man nga ibinsabinsami dagiti bambanag tapno mapaggigiddiat dagitoy a naisalip.
TOPIKO WENNO TEMA
Kadagupan kadagiti naisalip, kaaduan kadagitoy ti nangtratar iti aso. Aso kontra aso ti labanan. Napintas ti innangat. Ditoy a makita ti nagdudumaan dagiti sarita ta agpapadada iti ramen. Wen, mabantilan a husto dagiti dadduma a naisalip maipanggep iti aso ta adu dagiti kalabanda. Kasanon no adda napimpintas a sarita a nangtratar iti aso? Ket adtoy nga ehemplomi ti sarita a Ballatinaw, Ken ni Pidut: Dagiti Daton iti Angep ken ti Tagnawa. Agpada a masarsarita laeng ti aso iti Ballatinaw ken iti Ken ni Pidut: Dagiti Daton iti Angep, ngem saanen a nalaokan iti sabali a topiko ti naud-udi no di ni Pidut, napidpidut nga aso, ti madakdakamat iti sibubukel a sarita. Adda bassiten nangitarayan daytoy iti immun-una. Napigsa ti kidag ti aso iti Ken ni Pidut. Ad-adayo met ti nangitarayan dagitoy dua a sarita iti maikatlo a sarita, ti Tagnawa. Simple laeng ti Tagnawa.
Agpapada a bannuar dagitoy nga aso kadagiti tallo a sarita. Kitaentayo man ngarud ti kinabannuar dagiti aso. Iti Ballatinaw, bannuar ni Ballatinaw nga aso iti maysa a tao wenno iti sangaamaan; iti Ken ni Pidut..., bannuar ti aso iti adu a tattao wenno iti sibubukel a pagilian; ket, iti Tagnawa, bannuar ti aso iti pannakasolbar ti maysa a krimen iti maysa a bario. Asino ngarud ita ti nadagdagsen ti timbangna?
Nakapappapati kadi dagiti eksena iti sarita? Wen, mapaspasamak dagitoy iti pudno a biag. Natay amin dagitoy nga asino iti naggibusan ti sarita, isu ngarud a nagbalin a bannuarda. Ngem apay ngata no sibibiag koma latta dagitoy nga aso iti sarita. A, ngem nadagdagsen ti gutadna (kadagiti agbasbasa) no matay ti ayup iti ud-udina. Dimi ammo ngem mapugtuanmi a matay dagiti aso iti rugi pay laeng dagiti sarita.
Sayang, ta no aso met ti sinurat pay ti sabali a mannurat, no dina maartapan dagitoy tallo a sarita, adda pay ngata labanna?
AGBIBIAG ITI SARITA
Kas naagapad iti pagannurotan, salip daytoy iti tao ken ayup. Ania kadi ti birbiroken dagiti hurado? Daydiay maipakita ti relasyon ti tao iti ayup wenno ti ayup iti tao. Mabalin kadi a kunami, a agpada koma iti billing dagitoy dua nga agbibiag iti sarita, 50% koma ti akem ti tao ken 50% met koma ti akem ti ayup? Adu dagiti napipintas a sarita, a, ngem no koma maiparang a drama daytoy a sarita iti entablado, limmabas laengen nga ekstra ti ayup. Sayang, ta uray ngata dagiti agbuybuya ket sapulenda wenno amangan ta dida pay nadlaw nga adda gayam akem ti ayup.
Daytoy ti pagamkanmi kadagiti ima dagiti hurado. Ta magustuanmi man ti sarita a Dagiti Tumatayab iti Sallukob ken Ti Buridek a Bullilising ti Buridek nga Ubing. Iti Dagiti Tumatayab..., adda laeng sangapangen a billit a naiparang iti sarita. Ket iti met Ti Buridek a Bullilising..., naaramat kadi laeng a simbolo ti ayup? Anian, ta no pay napintasda koma, mapidut ngata dagitoy dagiti hurado?
Ket kasano payen, no ad-adu met dagiti ayup nga agbibiag iti sarita kompara iti tao? Saan met a detalyado a nadakamat dagitoy iti pagannurotan, ngem addan sa pagdaksanna no saan a pantay ti pannakaaramat dagitoy sapsapulen nga agakem iti sarita.
POINT OF VIEW
Iti pannakaisurat ti sarita, agpuligos kadi ti kamera iti mata ti tao wenno iti mata ti ayup. Wen, patienmi a narigat nga aramaten ti punto de bista ti ayup. No dikami agbiddut, adda laeng ngata dua a sarita a nagaramat iti point of view ti ayup. Nakaam-amak daytoy banag. Kasano nga iparang ni mannurat dagiti pasamak iti panagkita ti ayup?
Ditoy a saluduanmi ti sarita a Taokayo La nga Agpayso, ken ti sarita maipanggep iti sunggo a Chong (no saankami a nagbiddut a daytoy ti sarita). Ngem iti panangbasam iti sarita, mapugtuamon ti nagdumaanda. Iti umuna, agpampanunot ti ayup a pusa a kas ayup idinto a ti maikadua ket agpampanunot sa ti ayup a sunggo a kas tao. Panagkunami laeng, narigat a talaga a suraten dagiti kakastoy a sarita. Dagiti laeng bangolan a mannurat ti makabael nga agsurat iti kastoy.
Dakkel ti pangitarayan ti sarita a Taokayo La... ta ti pusa ket saanna a mapanunot ti kaipapanan dagiti makitana nga aramid dagiti tao. Sabali met a sarita iti pusa ti Manipud ken ni Proailurus Agingga ken ni Dante ngem iti point of view ti tao a naggaraw daytoy a sarita. Saluduak ketdi dagitoy a sarita ta agpada a sibibiag dagiti pusa iti gibus ti sarita. Makita ti ayat ken naiparikna ti panangipateg ti tao iti pusa nga ad-addan sa a mapapaidaman iti ayat kompara kadagiti dadduma nga ayup ta kanayonda a madugdugsak.
KINAPATEG TI AYUP
Saan a nalaka nga ipakita a patpatgen ti tao ti tarakenna wenno ayupna. Wenno iparikna ti tao a patpatgenna ti ayup. Mabalin a mapagbiddutan pay ti sabali a tao ti ayat nga iruknoy ti tao iti ayup. Kas iti sarita a Resibo ta makatkatawaan ti sangapamilia gapu iti panangipateg ti ama dayta a pamilia iti kabaliona. Bugbugtong a sarita a nangtratar iti kabalio.
Nagustuanmi daytoy a sarita, ta iti rugi pay laeng, nariknamin ti ayat ti tao iti ayup. Addad'ta payen a maburburtiaankami iti paulo ti sarita no apay a Resibo. Kas man la agbuybuyakami iti Maala-ala Mo Kaya a kasta ti estilo a panagaramat iti paulona. No malagipmo ti resibo, malagipmo a kankanayon ti napateg a kabaliom. Saluduak ti sarita ta kasla pudno a padas daytoy iti biag ta uray iti pannakaitanem ti kabalio ket napateg unay ti impaay ti tao a mangipatpateg kenkuana.
Sabali pay ti sarita a ni Apo Tacio, Ni Lampangog, ken ni Manoling a nangtratar iti nuang. Ay-ayaten ti kaamaan ni Apo Tacio ni Lampangog a nuang ta dakkel ti naitulongna iti panagbiagda.
Ti laeng makunami iti bugas a sapsapulenmi nga ayat kadagiti sarita ket ti ayat koma ti tao iti ayup nga awan kondisionna. Ket iti sarita a nadakamatmi iti ngato kas iti Resibo, ay-ayaten kadi laeng ti ama ti pagtaengan daytoy kabalio gapu iti kinabannuar a naaramid ti kabalio kadakuada? Apay nga ayatenen ti anak dayta a pagtaengan daytoy a kabalio gapu iti naduktalanna a kinabannuar ti ayup kadakuada? Kasta kadi met ti kinaespesyal ni Lampangog iti pamilia ni Apo Tacio gapu kadagiti maitultulong daytoy?
Dudua wenno mabilbilang sa dagiti sarita a naipakita ti ayat ti tao iti ayup nga awan naipaay ti ayup a kinaimbag wenno kinabannuar iti tao. Daytoy ti Taokayo La... ken ti Manipud ken ni Proailurus... (no saankami a nagbiddut) nga agpada a nangtratar iti pusa.
Ala, ta adtoy man a dakamatenmi dagiti pattapattami a sarita a magustuan dagiti hurado iti tunggal ayup:
Aso - Ballatinaw, Tagnawa, Ken ni Pidut: Dagiti Daton iti Angep
Pusa - Taokayo La Nga Agpayso, Manipud ken ni Proailurus....
Baka - Lakan
Kabalio - Resibo
Nuang - Ni Apo Tacio, Ni Lampangog ken Ni Manoling
Billit - Dagiti Tumatayab iti Sallukob, Ti Buridek a Bullilising....
Pag-ong - Burabor
Sunggo - Ti Sunggo
No koma maysa laeng a sarita ti rummuar iti kada ayup, dagitoy ti magustuanmi nga ayup: Aso, Pusa, Kabalio, Nuang ken Billit. Padaananyo ti resulta ti pasalip iti sarita.
