HURADO KORNER
No mabalin koma, kayatko dagitoy sumaganad nga aghurado kadagiti sumaruno a pasalipyo:
     a. daniw: Ariel Agcaoili, Prodie Gar. Padios, ken Reynaldo Duque
     b. sarita: Cles Rambaud, Juan S.P. Hidalgo, Jr., ken Fernando Sanchez.
Agyamanak no maikkan iti importansia daytoy a singasingko. Komustakayo amin dita, apo. - Mindo 

[Agyamankami iti rekomendasionmo, Mindo. Bay-am ta padasenmi a pagtutugmoken dagitoy a hurado ita a tawen ngem saanmi a maipanamnama dayta, wen! Nabayagen a kayatmi nga agsasarak koma dagiti hurado iti Internet kas inrusatmi a gagem. Tinawen nga isaganami iti websitetayo ti pagadadanonan dagiti hurado ngem lima a tawenen ti napalabas, saanmi pay a nagun-od ti kayatmi koma a mapasamak. Ala ket, padasen latta a padasen. Isu ngarud a naiyanak ti RFAAFIL tapno agusar iti Internet.] 

PAGGATANGAN ONLINE
Ania, apo, ti napasamaken ti SAGUT 2. Nairuar kadi met laengen daytoy? Kayatmi koma ti gumatang. – Dex 

[Naipaigid bassit daytoy a proyekto, Dex. Adda laeng nakataktakanna.]  

PASALIP – 6^th RFAAFIL
Namindua nga impatulodko babaen ti e-mail ti pakisalipko iti address nga admin@rfaafil.com, kayatko koma laeng a maammuan no naawatyo daytoyen no adda pannakabalinna. - Tiktik R. Ubong 

[Nupay kasano ti ayatmi nga agsubalit kadagiti adu nga e-mail a maaw-awatmi, napaidam dagiti gundaway no dadduma. Ngem saanka a madanagan, Tiktik R. Ubong, ta naawatmin ti pakaisalipmo. Kadagiti nakaipatulod metten iti pakisalipna, kitaen laeng iti listaan dagiti naisalip a sarita iti 6^th RFAAFIL. Naawatmi metten ti pakisalipmo, Basa Metro; ken Laong Laan T. Padsan.  Iti sabali a bangir, kayatmi man a dakamaten ditoy ti kanayon a kunami a saanminto nga ibunannag ti kinasiasino ti mannurat iti likudan ti parbo a nagan malaksid no napili a mapadayawan ti sinuratna wenno adda pammalubos nga aggapu a mismo kenkuana. Saanmi metten a biang no ti mismo a mannurat ti mangibutaktak iti pannakisalipna.]   

MENSAHE
1.
Panagtamed daytoy iti saan a MALPAAG a panagayatmo iti patgentayo a literatura. Agasem, di pay naipudosan dagiti agdama a naisalip, adda manen sumaruno a pasalipmo. Ammok a daytoy binangonmo a TEDDEK ti literatura ket mataginayonto kadagiti panid ti pakasaritaan ti inatayo a Literatura Iluko. Sapay la koma ngarud ta agbiag nga agnanayon ti impasdekmo a monumentom. Agbiagka! Agbiag ti pamiliam a mangsupsuporta kenka. Agbiag ti RFAAFIL! Agbiag ti Literatura Ilokana! – Freddie

[Agyamankami, kabsat! Dakkel a banag ti tulongmo tapno agbiagkami!]

2.
Napintas unay daytoy websiteyo. Ngem di kad’ napimpintas no mabasa koma dagiti daniw a naipalaon ditoy, nangabak ken saan. Iti kasta mabasa ket mairaman met iti pagpilian iti readers choice ta sabali me’ ti taste ti agbasbasa kadagiti hurado. – Gregorio M.

[Awan karbenganmi kadagiti daniw a saan a napili, Gregorio M., isu a saanmi mabalin nga ipablaak.] 

3.
Would it be possible for someone to contact the writer Edilberto H. Angco to tell that his old friend and colleague Nic Sommer would like to renew contact. We worked together in the Philippines 1984-86. Please provide him my contact info. Thanks a lot!  – N. Sommer 

[Sapay koma ta mabasa ti maseknan daytoy mensahem, N. Sommer, tapno makontakmo isuna.]

 4.
Nastrekmi ti dadapilan.com babaen ditoy websiteyo, sir!. Maysa kadi pay daytoy kadagiti partuatyo? Lugayankayo iti nasayaat a panggepyo. Ad-adu koma pay ti kas kadakayo a sisasagana a mangipateg iti pagsasaotayo. – Nick 

[Saanmi nga aramid ti dadapilan.com, Nick. Kukua ken imatonan daytoy ni Apo Roy V. Aragon, mabigbig ken nalaing a mannurat.] 

TEMA TI 7^th RFAAFIL
Adtoy dagiti nairekomenda a tema para iti sumaruno a pasalip – 7^th RFAAFIL: 

Pakasaritaan ti panagballigi – Danny
Sarita para kadagiti ubbing – D. Laguesma
Kabibiag ti bannuar (soldado) – Jeff S.
Panagdappat – Leo
Pakpakatawa a sarita – Rosellette P.
Dagiti sabsabong – Vj
Dagiti mapaspasamak iti uneg ti pagadalan – Rilobedo
Pammateg iti pagilian – Simon

[Agsasabali ken adu dagiti nairekomenda a tema ngem dagitoy laeng ti daras a naukaganmi. Agtultuloy latta nga agawat ti secretariat ti RFAAFIL kadagiti suhestionyo. Iti man hurado, iti tema wenno iti ania man a kapanunotanyo.]

Posted by rfaafil at 7:25 AM EST

Updated: Sun, Jan 13 2008 6:36 AM EST

Share This Post

Post Comment | Permalink

2007 READER’S CHOICE AWARD

Paggugustok ti agbasa kadagiti daniw. Magustuak amin dagiti pagpilian iti Reader’s Choice  2007 ngem kaykayatko ti Kudos iti Ayatmo iti Bukodtayo a Dila kasta metten ti Sapulem iti Kulluong. Asino kadi ti nangabak? No rummuar man ti Essem, mabalin met latta. Di kadi nagmayat koma no mabasami a kas readers dagiti dadduma pay a naisalip. Apay a saanyo nga ipablaak ida iti rfaafil.com? - Mark C.

[Asidegen a rummuar ti resulta ti RCA 2007. Abangam laeng ti iruruarna ditoy rfaafil.com.] 

TEMA TI 6^th RFAAFIL – SARITA MAIPANGGEP ITI TAO KEN AYUP

Kuna ni reader: Tapno agbiag, kasapulan ti tao ti pammateg ti ayup ket kasapulan met ti ayup ti pammateg ti tao. Nalablabes pay ti it’den a pammateg ti ayup ngem ti pammateg ti tao. 

PERSONAL SITE

Naukagak ti aglemlemmeng a personal sitemo, kabsat! Nasayaat unay ta nasukainak daytoy tapno adda met pamalpalatpatak iti kinasiasino ti mangimatmaton iti RFAAFIL. Panagkunak, naubingka pay laeng no ibasarko kadagiti ladawan malaksid no daanen dagitoy. Makais-isemak idi basbasaek dagiti padasmo iti biag ken ti in-the-making pay laeng a prinsesam, uray pay ti eye contact. Maitugotak nga adda sense of humormo. Nakandaduan ketdin dagiti sinuratmo ta kayatko koma ida a basaen. – RMP 

[Talaga a managsukisokka, RMP. Nasangal dayta a site para kadakami ken ti pamiliami. Pagipempenan ken pagidulinanmi kadagiti bambanag a nakasagana a malukatan uray sadino iti ayanmi. Daytoy ita ti pagpintasan ti Internet. Saanen a kasapulan ti agitugot kadagiti records wenno dagiti naikur-it iti papel. Isu a panunoten a naimbag wenno pilien ketdi a nasayaat dagiti ipisok ta awanen ti privacy wenno confidentiality no naikabilen iti website.] 

BENNEG TI AGDADAMO

Nabasakon ti pagannurotan ti Benneg ti Agdadamo ngem amadek man no mano kadi ti panid ti aramiden a sarita. Napintas pay koma no adda retrato ti agdadamo a mannurat a maipaskil iti umokyo. Agyamanak unay. Happy New Year!  - MIB 

[Dika madanagan, MIB, ta no adda la ket isubmitir ti mannurat a ladawanna, inayonmi nga i-upload. No maipanggep met iti bilang ti panid ti sarita nga idatag, awan ti detaliado nga impanmi iti pagannurotan. Mabalin ti ababa a sarita. Happy new year met kenka!] 

A.N.A.K. TI RFAAFIL

Addaak ditoy Jeddah, K.S.A., nabayagen a kayatko ti agatendar iti GUMIL Filipinas kombension ngem saanko pay a naaramid dayta. Naragsak ngata ti makitabuno wenno makidinnakulap kadagiti pada a taga-Ilocos. Kayatko koma ti agbalin nga sponsor uray maysa laeng a mannurat para iti A.N.A.K. ti RFAAFIL (Addang Nga Agayab Kamannurat: Awis Nga Agpaay Kailokuan). Kasano kadi a mayawatko ti pagrebbengak no kas pagarigan?  - J. Bugarin 

[Ita pay laeng, idanonmi kenkan ti naimpapusuan a panagyamanmi, Mr. Bugarin. Ti PAYPAL ti ar-aramatenmi nga agkalap kadagiti donasion para iti proyektomi kangrunaanna ti A.N.A.K.. Mabalinmo nga aramaten dagiti link ti PAYPAL iti websitemi. Nasayaat met no subaybayam ti kallukat a Benneg ti Agdadamo tapno mapili wenno mabasam ti gapuanan ti mannurat a kayatmo nga esponsoran. Ni Apo Dios ti mangtarabay kenka!]

Posted by rfaafil at 4:43 PM EST

Updated: Fri, Jan 11 2008 9:55 PM EST

Share This Post

Post Comment | Permalink

Maragsakankami koma ta inaldaw nga adu dagiti maaw-awatmi a mensahe iti E-lokano Mail iti inaldaw ngem saan ta makauma met ti agpugas kadagitoy. Agasem ta saan metten a sumardeng ti e-mail a maawatmi gapu iti inkabilmi iti ruangan ti website a mangkalap iti opinion dagiti readers maipanggep iti ayat: (Para kenka, Patgenmi nga Agbasbasa, ania ti depinisionmo iti sao nga AYAT?) No asinoda man, naayatanda met la unayen!

Kuna ni Reader iti AYAT, daytoy man ti inaramidmi a subject ti e-mail a maawatmi. Ngem saan metten nga agsardeng daytoy. Inaldaw a 'Kuna ni Reader iti AYAT.'  Kuna ni Reader iti AYAT. Kuna ni Reader iti AYAT. Kuna ni Reader iti AYAT. Kuna ni Reader iti AYAT. Kuna ni Reader iti AYAT. Kuna ni Reader iti AYAT. Kuna ni Reader iti AYAT. Kuna ni Reader iti AYAT. Sikami pay ketdin ti mauma. Naimbag koma no ti naguneg ti Kuna ni Reader iti AYAT a mensahe ket maipanggep iti kunaen ni Reader iti AYAT ngem saan met. Ti la addan a maaw-awatmi.

Naisangrat laeng koma ti rfaafil@hotmail.com para iti mensahe mainaig iti pasalip wenno iti website ngem naduktalan metten dagiti spammers. Namin-adu nga inyakarmin ti e-mail nga agawat iti KUNA NI READER ITI AYAT ngem kaskasdi a sumrekda iti rfaafil@hotmail.com. Nakarehistron kadakuada daytoy nga address. Nakaprogram sa pay ketdin ta agasem metten ti agsingkuenta nga e-mail a maawatmi iti uneg ti maysa nga aldaw. Kabutengmi payen a lukatan dagitoy a mensahe ta saanmi nga ammon no ania ti opisial nga e-mail ken saan. Awan serserbi ti alad a pangserrami kadagiti mangurkuriro. Nasiglatda a sukatan ti paggappuan ti e-mail tapno nawayada manen a sumrek.

Naimbag ketdi ta dida pay naduktalan ti admin@rfaafil.com. Isudanto ketdi pay a pasalsali. Narigat pay no addanto ketdi entry a malibtawanmi. Daytoy la unay ti ipangpangruna nga an-annadanmi. Imbag ta saanmi nga ar-aramaten daytoy nga e-mail nga agkalap kadagiti kapanunotan no di laeng eksklusibo para iti pasalip wenno maipanggep iti RFAAFIL.

Naannadkami a kankanayon a manglukat iti e-mail a dimi ammo ti naggapgapuanna. No masinunuomi a naggapu iti maysa a mannurat wenno am-mmomi, isu laeng ti pananglukatmi. No saanda a mauma nga agipatulod iti awan kaes-eskanna a mensahe, saankami met a mauma a mangilaksid kadakuada. Ngem nasigsiglattayo latta ta saanda a maawatan ti bukodtayo a sao. Daytoy ti pakaarusanda. Saanda a maaw-awatan ti rirriribukenda.

Dagiti laeng padatayo nga Ilokano ti makaawat kadagiti naimaldit. Bay-anmi a maumanto dagitoy sabali a puli a sumengsenggat iti annayas ti panagnami. Iti sabali a bangir, pakaragsakanmi met nga iturong dagiti madaydayaw a bisitami tapno saanda a mayaw-awan iti nanumo a pagtaenganmi iti Internet. Kas koma no simrekda iti biddut a dalan a kas itoy. (www.rfaafil.com/nayaw-awanak. I-klik daytoy kas pagarigan nayaw-awanka tapno iturongkayo iti ruangan ti pagtaengantayo iti Internet.)

Kayatmi met ti agyaman kadagiti agbasbasa nga agipatpatulod iti e-mail a naglaon iti makapatibker ken makainspirar a mensahe. Saan a mailaksid kadakami ti kinapategyo nga agbasbasa. Saankami a makapagna no awan mangkibin kadakami. Saankami nga agbiag no awan mangbiag kadakami. Awankami no awankayo.

Kuna ni Reader iti AYAT, sungbatanmi iti 'Ti kunami nga Ayat ken ni Reader' - isu ti rfaafil.com nga ikarigatanmi a biagen agingga a sibibiagkami.

Posted by rfaafil at 5:28 AM EST

Updated: Fri, Feb 23 2007 5:39 AM EST

Share This Post

Post Comment | Permalink

Mood:  a-ok

Komustakan, RFAAFIL?
Ur-urayek man a maipablaak daydiay sarita nga "Ay Maniyo'ta, Ding." Naimula iti isip ko daytoy ta nai-feature iti damdamag a napintas ken makaparay-aw. Agbiagtayo amin nga Ilokano!

--0--

Komustakan, RFAAFIL?
Yamanek unay iti panangpasangbayyo 'toy numo 'toy biang. Adtoy man, Apo, ti ladawan a pagpilianyo iti sangsangalenyo a libro. Bareng maikari a buya ti birbirokenyo para iti akkub ti SAGUT part 2.

Bay-anyo ta padasenmi man met ti sumurat iti sarita ti panagpagayam. Dios ti agngina...!

--0--

Komustakan, RFAAFIL?
Adtoy man nga irekomendami ti tema a matratarto koma iti pasalipyo: Pateg ti sakramento ti kallaysa.

--0--

Komustakan, RFAAFIL?
Naawatkon ti SAGUT nga inorderko iti Paggatangan Online ti websiteyo. Dinak nagkibaltang iti pananggatangko iti daytoy a libro. Diak impagarup nga adda gayam met lubong ni Ilokano iti literatura. Nagustuak ti nabasakon a Maysa a Linabag iti Biag ni Segundina, sa ti Sumasayyo, ken uray pay ti sarita a Kanta iti Sab-ok....

Makursunadaak met ti Dagiti Proverbio iti Biag ni Maestro Modesto iti kalleppas a pasalip.

--0--

Komustakan, RFAAFIL?
Anian a nagpintas ken nagmayat ti pannakaikabil iti websiteyo ti sarita a sinuratko! Agyamanak unay kadakayo!

Dakkel ti panagyamanko ta dakkel a pammadayaw para kaniak, uray no kaskasano, ti pannakairaman ti saritak a kas maysa a modelo kadagiti modelo a sarita a sinurat dagiti nalatak a mannurattayo iti literaturatayo nga Ilokano a kas kada Apo Agustin DC. Rubin, Apo Jimmy M. Agpalo, Jr. ken Apo Linda T. Lingbaoan.

--0--

Komustakan, RFAAFIL?
Naimbag a damag. Nagturpos a magna cum laude 'tay A.N.A.K. ti RFAAFIL nga iskolaryo (babaen iti libre a registration feena) a taga GUMIL La Union iti napalabas a GUMIL kombension nasional. Nangabak pay iti Filipino Feature Writing iti Regional Press Congress a naangay iti Sea and Sky Hotel, San Fernando City itay nabiit. Madama nga agad-adal iti Iluko. Nangabak metten iti maikadua a gunggona iti on-the-spot Iluko Poetry writing contest a naaramid iti La Union. Pagyamananmi unay iti suportayo kenkuana.

Pagmimitinganminto iti GLU Board ti sumaruno nga agbalin nga anaken ti RFAAFIL iti umay a kombension nasional ti GUMIL. Wen, bareng addanton maallukoymi a young blood a sumango iti sumaruno a pasalip ti RFAAFIL.

Posted by rfaafil at 12:45 AM EDT

Updated: Tue, Oct 4 2005 1:25 AM EDT

Share This Post

Post Comment | Permalink

Mood:  surprised

Pagyamananmi unay iti maysa a panid nga inreserba kadakami ti GUMIL La Union para iti Pamaskua a Bilang ti GLU Newsletter. Sapay koma ta adda taga-GLU a misar-ong ditoy tapno masalawna daytoy nga imapanablaagmi. No adda man, sapay la koma ta adda pannakaikarkari daytoy inlanadmi iti baba tapno maimalditto iti newsletteryo. .

REYNALD F. ANTONIO AWARDS FOR ILUKO LITERATURE
www.rfaafil.com
Ti Umuna a Website ni Ilokano iti Salip iti Sarita ken Daniw iti Internet
_____________________________________________________________________________________

READER'S CHOICE AWARD

Pammadayaw iti sarita a magustuan dagiti agbasbasa iti bukodda a panagraman.

Ti "Kanta iti Sab-ok ti Agpakadan a Malem" a sarita ni AGUSTIN DC. RUBIN ken ti "Maysa a Linabag ti Biag ni Segundina De Dios" a sinurat ni FRANCISCO T. PONCE dagiti nangabak iti 2003 ken 2004 RFAAFIL Reader's Choice Award. Maawis amin a makisalip. Amangan no sikayonto met ti mangabak iti 2005 RFAAFIL READER'S CHOICE AWARD iti Salip iti Sarita ti 3rd Reynald F. Antonio Awards for Iluko Literature.

Panagtultuloy a pannakaputar dagiti de-kalidad a sarita ken panagrang-ay ni mannurat ti GUMIL ken ti Literatura Ilokana ti panggep a ragpaten ti RFAAFIL babaen ti ayat ken tulong dagiti agbasbasa.


PAGGATANGAN ONLINE

Nalukatan a pakaiwaragawagan ken pakagatangan iti libro, a kas ti SAGUT ken daddumanto pay a libro, nga iruar ti rfaafil.com kadagiti masungad a panawen. Narugian daytoy para kadagiti donasion, magasin, libro ken dadduma pay a produkto ni Ilokano nga adda pakainaiganna iti literatura. Pamuspusan tapno umasideg kadagiti naayat a tumulong a mangtaginayon iti bukodtayo a pagsasao.


RFAAFIL POLL

Dagiti madakamat, makuna, maisingasing wenno mapanunot iti ania man a banag. Dagiti mensahe ken kapanunotan ti tunggal maysa ken maysa kadatayo ket nabileg a tumulong a mangragpat iti ania man a panggep.

Adtoy ngarud nga ipulsuanmi ti kapanunotanyo: Asino ti irekomendam nga aghurado iti pasalip ti RFAAFIL? Ania ti kayatmo a tema ti sarita a matratar iti sumaruno a pasalip? Ipatulod ti rekomendasion ken kapanunotanyo iti admin@rfaafil.com wenno iti rfaafil@hotmail.com wenno usaren ti e-lokano mail iti website ti RFAAFIL.


PASALIP ITI RFAAFIL 2004-2005

Agpaay ti salip kadagiti amin a mannurat iti Iluko. Salip iti Sarita: Kinatan-ok ti maysa a pagsapulan ti tema a suraten ken ipakitana ti kultura ni Ilokano. Agatiddog ti sarita iti 10-20 a panid. Salip iti Daniw: Masurat ti daniw iti estilo a tradisional wenno kombensional. Agatiddog ti daniw iti maysa a panid. Nawaya ni mannaniw a mangpili iti temana ngem nasaysayaat no ti daniw ket mairuknoy iti www.rfaafil.com, ti pagtaengan ti RFAAFIL iti Internet.

Ipatulod ti pakisalip babaen ti e-mail iti rfaafil@hotmail.com wenno admin@rfaafil.com, babaen ti koreo iti: SALIP ITI SARITA 2004-2005 wenno SALIP ITI DANIW 2004-2005, c/o Cles B. Rambaud, Bannawag, Liwayway Publishing, Inc., 2249 Chino Roces Avenue, 1231 Makati City.

Agpatingga ti salip iti Enero 31, 2005. Para iti ad-adu pay nga impormasion, basaen ti kompleto a pagannurotan ti salip iti Bannawag wenno iti www.rfaafil.com.


MENSAHE

Kablaawanmi dagiti opisial ken kameng ti GUMIL La Union iti likudan ti GLU Newsletter ken ti Iluko Creative Writing Forum a naangay iti DMMMSU itay Nobiembre 27, 2004. Saluduanmi iti anep ken regta ti sibubukel a gungloyo. Agbiag ti GUMIL La Union! Agbiag ti Literatura Ilokana!

Naragsak a Paskua ken Nagasat a Baro a Tawenyo Amin!

Posted by rfaafil at 12:01 AM EST

Updated: Mon, Nov 22 2004 3:26 AM EST

Share This Post

Post Comment | View Comments (2) | Permalink

Mood:  don't ask

WEN, maysa a penomenal ti blaging, kablag. No adda man blaging iti internet, adda met blaging iti isipmi. Dagiti bambanag a sumrek iti utekmi, main-inutda met. Saan a daytay mammaminsan laeng a maipisok.

Kinapudnona, blaging iti isip ti us-usarenmi idi agbasbasakami ken uray pay ita. Saantayo a sumardeng nga agsursuro agingga a sibibiagtayo, kunada man. Ngem nasisiaat kano no pisokam iti adu a bambanag ti utekmo iti kaub-ubingam pay laeng. Kadagiti agbasbasa ita a tiempo, adtoy man maysa a balakadmi. Dimi ammo no dakami laeng ti mangar-aramid iti kastoy wenno adu met ketdi dita.

No madama a mangisursuro ti titser wenno adda madama nga aglektiur, saankami nga agsursurat. Dumdumngegkami a naimbag. Saanmi a kadanag no dimi man maisurat dagiti maisawsawang, ta patienmi a ti ibagbagada ket nakasuraten iti libro wenno iti nakasaganan a papel nga ibunongto ti aglektiur. Inton nalpasen ti klase wenno lektiur, kas koma no addakamin iti biahe wenno iti balaymi nga agin-inana wenno awanen ar-aramidenmi, lagipenmi no ania ti naadalmi iti kalkalpas a klase wenno lektiur. No malagipmi, naimbag unay. No dimi met malagip, ukradenmi a dagus ti libro. Saanminton a kasapulan ti agrepaso no adda eksam, ta nakatataken iti panunotmi. Dimi itulok a lumabes ti maysa a leksion a dimi naaw-awatan wenno awan man laeng uray maysa a malagipmi. Daytoy a sistemami ket imalditna met iti isipmi ti nagan dagiti mannursuro kadakami. Uray ti pakpakatawa ti titser wenno ania la ditan a nabanggitna iti uneg ti klase wenno lektiur, malagipmi pay no kasta a sublianmi a lagipen dagiti pasamak.

Ania kadi ti nasursurok ken ni Mrs. A ita nga aldaw?, amadenmi iti bagimi. Ah, nagsersermon laeng ni ma'am, ta adda ngamin matmaturog a kaklasemi. Saanmin a naituloy ti leksionmi ta nagdiskurson iti maipanggep iti kinapateg ti adal. Nupay kasta, saan a nasakit ti nakemmi ta nabagbagaankami met iti umno a sursuro.

Ania met ti naadalko ken ni Mr. Z?, saludsodmi met iti isipmi. Ah, nagistoria kadagiti adu a nanobiana idi baro pay. Makais-isemkami a makalagip ta bilbilangenmi ken ti kaabayko no mamin-ano nga isawang ni sir ti balikas a "Perhaps!" Nupay kasta, saan met a nasakit ti nakemmi ta uray ket dimngegkami met. (Saan ket a 'tay matmaturogkami wenno agar-arapaap iti tengngat' aldaw.) Wen, naaramatmi met iti biag dagiti padas iti biag ni sir.

Wen, adda met blag iti isipmi. No awanen napatpateg no di daytoy a blag, kablag. Patienmi ngamin a ti naikur-it iti kuaderno ket mapukaw, uray payen ti naikur-it iti blag ti internet. Ngem ti naikur-it iti isip, kablag, dinto mabura. Malaksid la ngatan inton agkabawen datao.

Posted by rfaafil at 12:01 AM EDT

Updated: Sat, Oct 23 2004 6:22 AM EDT

Share This Post

Post Comment | Permalink