Mood: crushed out
Topic: Dadduma Pay
KARIRIGATAN a subject ti Math, kuna dagiti estudiante. Mabalin nga agpayso a narigat ngem adda dagiti pamuspusan wenno panglakagan tapno agbalin a nalaka. Ti matematika no saanmo a masursurotan, kablag, makatikaw ket pagsakitenna ti ulom. Isu a Matematikaw, kunamton!
Idi sumrekkami iti pagadalan, usarenmi dagiti ramaymi, dagiti babassit a batbato ken bukbukel, dagiti sticks ken no ania la ditan a maaramat. Pagbalinen idi ti titsermi a drill a kaslakam' agay-ayam kadagiti leksionmi. Insuroda ti matematika nga asignatura nga awan calculator. Ngem apay met itan, uray sangkabassit laengen a solbaren, agdependetayon iti calculator. Napukawen ti panagtalek iti kabaelan. Adda idi maestrak, nga agkunkuna, kababain iti utektayo no ditayo met usaren.
Ammom, kablag, idi agbasbasaak, adu dagiti chicks nga umabay ket agpaisuro kaniak. Pagiinnagawandak. Kaslaak la mapirsapirsay isu a makasursuronak. Nagsuplasupladoak kampay idi. Tagtagari, kablag, ta gayam ket kaykayatko met. He-he-he! Diakammo no ti maipanggep iti matematika ti kayatda nga ipaisuro kaniak wenno ti ketdi matematika ni ayat. He-he-he, manen!
Adtoy man nga iburaymi ti sumagmamano a teknikmi, kablag. Narigat met no ipadigomi amin baka nasigsiglatkayto ketdin ngem dakami. He-he! Mabalin nga interesadokayo met uray no ipapanmo laeng a mangtikawtikawkami.
Umuna a Problema: 1 - 2 x 3 = __?__. Naglaka kunam ngata? No sungbatam a dagus, nadarasudoska. Ngem no nasungbatam iti husto, sigurado a napartak ti panagpanunotmo ket inusarmo a naimbag ti isipmo. Inusarmo ti naadalmo. Ala man ngarud, isuratmo ti sungbatmo iti papel ta kitaemto ti sungbatna iti baba. Awan sinnauran, wen? Saan met ketdi a dakami ti suitsuitikem no kas pagarigan, ti met laeng bagim.
Maysa a teknikmi iti panagmultiply, aramatenmi ti division ken addition. Kas koma iti: 3.5 x 18. Kasapulam kadi pay laeng ti calculator wenno papel ken ballpen tapno masungbatam daytoy? Saanen ta dua a segundo, saluyotem daytoy. Sigurado la ketdi nga unaam a sumungbat ti agusar iti calculator.
Daytoy ti solusionna: Dobleem ti 3.5 (3.5 + 3.5) tapno agbalin a 7 ken guduaem ti 18 tapno agbalin a 9. Ngarud, ti (3.5 x 18) ket isu met laeng ti (7 x 9) nga agbanag a 63.
Iti met panagusar iti percentage (%) kas iti: 15% x 240. Nalaka manen daytoy a sungbatan. Saanmon a guyoden ti calculator wenno ballpen ken papel. Putdenta ti 15% tapno nalaklaka ti agmultiply. Pagbalinenta a 10% ken 5%. Ti (15% x 240) ket isu met laeng ti [(10% x 240) + (5% x 240)]. Ti 10% x 240 ket 24. Ket ti 5% ket kagudua ti 10% isu a guduaem met ti 24 isu nga agbalin a 12. Agbanag a 24 + 12 = 36.
Kitaen iti baba ti ad-adda pay a panangilawlawagmi:
A.) 30% x 240 = See solution below
= (10% x 240) + (10% x 240) + (10% x 240)
= 24 + 24 + 24
= 72
B.) 65% x 120 = See solution below
= pagtitiponen ti innem a 10% x 120 santo kagudua (daytoy tay 5% a matedda) ti 10% x 120.
= 12 + 12 + 12 + 12 + 12 + 12 + 6
= 78
Iti met addition, usarenmi ti grouping a kabuybuyog ti subtraction ken uray pay multiplication. Kas iti ehemplotayo iti ngato, adtoy ti panangilawlawag:
A.) 24 + 24 + 24
= 20 + 20 + 20 + 4 + 4 + 4 wenno
= 20 + 20 + 20 + 12
= 72
B.) 12 + 12 + 12 + 12 + 12 + 12 + 6
= 10 + 10 + 10 + 10 + 10 + 10 + 12 (12 daytoy 2+2+2+2+2+2 wenno 2x6) + 6
= 72 (12 x 6) + 6
= 78
Sapay koma ta nalawag, kablag, dagiti panangilawlawagmi. Isu a no pasanguandakanton iti solbarem iti aritmetik, laklakaemto metten.
Padasem man ngarud daytoy, kablag. Ipakitam man ti naadalmo iti impanablaagmi.
1. 15% x 250 =
2. 16 x 4.5 =
3. 38 + 54 + 18 =
4. 39 x 3 =
5. 85% x 240 =
Kas nadakamatmin, kablag, saanmi nga ipadigo amin ti ammomi. Saan a gapu ta ipaidammi no di ket gapu ta dayta ngata laeng ti ammomi. Ngata? (Dayta laeng ti maiblagmi ita.)
Ania ngarud, kablag? Narigat kadi ti aritmetik? Wen wenno saan? Maysa a gapu no apay nga ipapan a kasta ket agsipud ta saan ngamin a maus-usar a kankanayon iti inaldaw. Agmudel met ti panunot a kasla buneng a saan a maitagtagbat.
Dadduma no di man kaaduan kadagiti agad-adal, narigat kunada ngaminen iti maysa a banag a dida pay pinadas a solbaren wenno adalen. Ti matematika, no adalen a naimbag, no usaren dagiti teknik wenno panglakaan a pamuspusan, agbalin a nalaka. Salsaluyotemton a dagus.
-------------------------------------------------
Solusion ti Umuna a Parikut: 1 - 2 x 3 = -5
Usaren ti MDAS (Unaen ti Multiply ken Division santo ti Addition ken Subtraction.)
= 1 - 2 x 3
= 1 - 6
= -5
Solusion dagiti Simmaruno a Parikut:
15% x 250 =
= (10% x 250) + (5% x 250)
= 25 + 12.5
= 37.5
16 x 4.5 =
= 8 x 9
= 72
38 + 54 + 18 = (Teknik: Usaren ti grouping.)
= 40 + 50 + 20 (Nagbingayan ti dua nga 8 ti 4)
= 110
39 x 3 = (Saanen a nailawlawag ngem masurotam met ngata.)
= (40 x 3) - (1 X 3)
= 120 - 3
= 117
85% x 240 = (Saanko a parigaten ti bagik. Alaek ti 15% ti 240, saakto ikissay iti 240.)
= 15% x 240
= (10% x 240) + (5% x 240)
= 24 + 12
= 36
Ngarud, 240 - 36 = 204.
Solusion ti maudi a parikut: AYAT
Ammuen ti parikut, kablag, ngem kasapulak ita nga iruarmo ti kulkoleytormo. Daytoy ti parikut: 10 ti tawen ti babai, nakipagdenna iti 14 ti tawenna a lalaki, nagdennada iti 7 a tawen, sa idi kuan, nagsinada (divided by 2), aniat' gapuna?
Daytoy ti ipis-it iti calculator: 10147 divided by 2 = Adda rummuar a sungbat. Pusiposem ti calculator tapno ti akin-ngato isut' akimbaba tapno takuatem ti gaput' nagsinaanda.
___________________
PABLAGPLAG: Blag! Adda manen baro a blag, mangrugi nga agbannawag, 'kuat' maysa nga agkabannuag, ken nalaing a bumablag! Madin sa ti rhymingko? Blag!