UMUNA A SARIBLAG (MAIKA-2 A PASET)
Mood:  energetic
Topic: Sariblag

PAULO TI SARITA: ______________
Sarita ni: RFAAFIL BLOG

"TANDAANAM daytoy sawek kenka, Erwin," kinuna kenka ni nanangmo a nakalablabbaga dagiti matana. "Ti ibagbagak a pamilia ti amam, umayda la ketdi agpakita ditoy!"

Gapu ta nasemsemka ken dimo kayat a denggen dagiti sumaruno pay a sawen ti inam ken dimo kayat a denggen ti dung-aw ni lolam, rimmuarka manipud iti agdua kadsaaran a balayyo. Nagderetsoka iti pagtutugawan iti sirok ti mangga nga asideg ti lalaktawan a lumas-ud iti arubayanyo.

Umuna a rabii ita a pannakaimassayag ni tatangmo. Nakalawlawag iti uneg ken ruar ti pagtaenganyo a parnuayen dagiti bombilia ken flourescent. Adu dagiti tao a makipagrikna iti kellaat nga ipupusay ti amam.
.....MAITULOY ITI BABA.....

Pagyamanan ti pammakired a komento ti mannurat iti mannurat.com. Kasapulanmi a talaga ti inspirasion tapno makasuratkami. Ta no dimi leppasen ti sursuratenmi iti kabiitan a panawen, agtalinaedto lattan a pangted. Ti sariblag ti napanunotmi a solusion ti parikutmi tapno makaasangalkami iti sarita uray no mabayag. Sapay koma ta saankami a nagkibaltang iti sariblag ta patienmi a pagsasaipennanto ti panawen, kanito, panunot, ayat ken reggetmi (wenno reggetmo) a kas mannurat.

Adda met dimmanon kadakami a saludsod a nasken a masungbatan. Wen nga agpayso, apay a natay ti ama iti sariblag? Aniat' gapuna a simmina? Manot' tawenna?

Nasisiaat sa no biglaan ti ipupusay ti ama iti sariblag. Ta talaga met a saantayo a mapakpakadaan ti ipapanawtayo ditoy lubong. Apagduklawit. (Diak pay kayat ti agpailista iti GUMIL Langit, Kablag! He-he-he! Forever memberka laengen iti GUMIL Blog, napipia pay! Maymayat a denggen!) No biglabiglaan a pimmusay ti ama, mabalin a saan pay unay nga isu ti lakay tapno ad-adda a nakapapati. Ania ngarud ti makaigapu a sumina ti tao a saan a mapakpakadaan? Saan ngarud a mabalin nga dakamaten nga adda nabayagen nga ag-agalen a sakit ti ama.

Pagpiaanna ngarud ta iti probinsia ti rinugiantayo a setting ti sarita. Mas kontrobersial pay laeng siguro no agsasarak ti dua a pamilia iti bario ngem daytay agkikitada iti maysa a lugar iti siudad.

Adtoy ngaruden ti tuloy ti sariblag:

"Uppat a pulo ket limana laeng, nakaub-ubing pay. Kaasi met dagiti mapanawanna," insennaay ti maysa a lakay. Nalawag a mangegmo ti saritaan dagiti lallakay.

"Wen piman met. Ngem ala, ania ngarud, kasta la ti biag."

"No dina kano kinabig nga imbangga ti manmanehuenna iti pader iti bangir ti kalsada, natnag kano koma ti bus iti nakangatngato a derraas. Nasugatan kano met dagiti akinsangsango a pasahero ngem nakalasatda. Daksanggasat ta isuna laeng ti awanen angesna a dimteng iti ospital," kinuna ti sabali a lakay. "Maysa a pagwadan a tao ni Roman. Inlisina iti didigra dagiti pasaherona."

Pagwadan? naisipmo. Pagwadan kadi ti amak? Sipud pay adda puotmo, saanmo man la pulos nangegan iti inam a sawen daytoy a maysa a pagwadan ti amam. Awan sa aldaw a di agsubang dagiti nagannakmo. Ubingka pay ngem naimulan iti naganus nga isipmo nga adda babai ti amam. Adda sabali a pamiliana. Pagwadan kadi ti kasta nga ama?

Maituloyto.....

(Ituloyyo ngaruden, kablag, ti sariblag!)

___________________
PABLAGPLAG: Blag! Salbag ketdi a blog! (Sorry!) Kasla itay danum a nagaruyot iti isipmi dagiti balikas nga inkur-itmi ngem bimmalagbag met a di napakadaan ti koneksionmi iti internet, ania pay, kasla met laeng danum a nagayus dagiti balikas iti monitormi. Imbag koma no agsubli pay nga agaruyot ti danum iti panunotmi. Ania metten, Kablag? Tsk! Blag!

PREMIO ANDEL
Mood:  bright
Topic: Literatura

No lagipenmi ti napalabas, nakatataken iti isipmi a ti Iluko.com ti immuna a timmulong kadakami tapno dumanon ti pasalipmi kadagiti mannurat nga adda aksesna iti internet. Sayang ta dimi man laeng naiprint daydi a parupa ti nalatak itan a website dagiti Ilokano.

Adu dagiti agsalsaludsod wenno mayat a mangammo kadagiti pagannurotan ti maikadua a pasalip ti Premio Andel. Ket napanunotmi nga iburay ti kanitomi a mangipaskil daytoy ditoy blogtayo tapno maidanon kadagiti mannurat a maseknan.

Saanmi a dinawat ti pammalubos daytoy nga aramidenmi. Ta awan ngata met dakesna no ipablaakmi ita ditoy ti pagannurotan. Malaksid no agkedked dagiti maseknan. Sisasaganakaminto nga agtallugod iti kayatda a mapasamak.

Ti Premio Andel ket nairusat a pammadayaw a maipaay kadagiti naidumduma a sarita ni ayat, sarita maipanggep iti masakbayan, sarita a nakabutbuteng, ken dadduma pay a kita ti sarita. Esponsoran daytoy ni Andel Barroga nga mangimatmaton iti Iluko.com a nakabase iti Seattle, Washington, U.S.A.. ken mannurat iti Bannawag. Ti Bannawag ti mangimaton itoy a pammadayaw. (Isu ngata a saanda nga ipablaak ti pagannurotan iti mismo a kutada gapu iti daytoy a rason. Pugtomi laeng, apo!)

Dagitoy dagiti pagannurotan:

1. Maluktan 'toy maikadua a Premio Andel kadagiti makapakatawa a sarita wenno humurous story. Maluktan ti salip iti Abril 16, 2004 ket aggibus iti Enero 31, 2005.

2. Silulukat ti salip kadagiti amin a mannurat iti Iluko malaksid kadagiti empleado ti Liwayway Publishing, Inc. a mangipabpablaak iti Bannawag.

3. Maysa laeng a sarita ti mabalin nga idatag ti asino man a makisalip. Nasken nga orihinal, di naipatarus manipud iti ania man a lenguahe, di pay naipablaak ken di pay nangabak iti ania man a salip iti panagsurat iti isalip a sarita. Idatag ti isalip iti uppat a nadalus ken nalawag a mabasa a kopia.

4. Mabalin a makiniliado wenno computer-typed ti pakisalip. Masapul a doble espasio ti kaaddayo dagiti binatog. No mai-type iti computer, agusar iti Times New Roman medium 12 font wenno Arial medium 12 font. Agatiddog ti sarita iti 10-25 a panid. Ti met parbo a nagan ti autor ti agparang a kas autor ti sarita.

5. Idatag ti pakisalip agraman ti narikpan a sobre a nakailaoan ti paulo ti sarita, parbo ken pudno a nagan ti autor, adres ti autor agraman e-mail address ken numero ti telepono ken/wenno cellphone, no adda; ababa a pakasaritaan ti biag; ken maysa a kaudian a ladawan. Iti rabaw ti sobre, ilanad ti paulo ti sarita ken parbo a nagan ti awtor.

6. Mabalin nga ikoreo wenno personal nga idatag ti pakisalip itoy nga adres: Premio Andel, c/o Bannawag, 2249 Chino Roces Ave., 1231 Makati City. Masapul a maawat ti Bannawag ti pakisalip iti di naladladaw ngem Enero 31, 2005.

7. Mapadayawanto dagiti mangabak bayat ti komperensia nasional ti GUMIL Filipinas iti Kalgaw 2005. Maibabawi ketdi ti premio ti mangabak a mangsalungasing iti Pagannurotan Blng. 3.

8. Maipaayan dagiti mangabak iti premio a kuarta ken sertipiko a pammadayaw. Umuna, P7,500.00; Maikadua, P5,000.00; Maikatlo, P3,500.00; Maikapat, P2,500; ken Maikalima, P1,500.00.

9. Adda karbengan ti esponsor a mangipablaak kadagiti mangabak a sarita iti ania man a magasin a pilina agraman ti panangiruarna kadagitoy iti Iluko.com ken panangipablaakna kadagitoy a kas libro nga awan ti sungsungbatanna iti autor. Agtalinaed ketdi ti panagtagikua ti autor iti saritana.

Sapay koma, kakabsat, ta maragsakankayo iti daytoy impostemi. Nawayakayo a mangiprint iti daytoy a pagannurotan. Awan sabali a panggepmi no di ti tumulong a mangpadur-as iti bukod a pagsasaotayo.

Kadagiti mannurat a nalaing nga agpakatawa, daytoy a pasalip ket para kadakayo. Dagitoy a klase ti kasapulan tapno umisemtayo iti baet krisis ken adu a problema iti biag nga intay' sarangten iti inaldaw.

Agbiagka, Premio ANDEL!

UMUNA A SARIBLAG
Mood:  energetic
Topic: Sariblag

Rugiantayo ngaruden ti sariblag. No dim' pay ammo ti agsariblag, masursurom ditoy. Ti sariblag ket naadaw iti balikas a sarita ken blog (Sarita + Blog = Sariblag.) Bukodmi a panunot dayta. Kas met iti naparnuayen a saribitniw (Sarita + Bitla + Daniw = Saribitniw.) Naaramid payen ti umuna a Saribitniw iti kallabes a kombension ti GF. Ket ti daniw a ma-blog? Mabalinmo met a kunaen a blagniw wenno daniblag (Daniw + Blog.) Kas naikarimin, adtoyen ti umuna a sarita a putarentayo babaen ti SARIBLAG.

Ti panagaramid iti sarita, mabalin nga addan paulona a dagus, mabalin met nga awan. Santo la maikkan iti paulona inton malpasen ti sarita. Rugiantayo ngarud ti sarita nga awan pay la paulona. Manglukatkamto met iti sabali a thread para iti maikadua a sarita nga adda siguden paulona.

Bayat ti panangisursuratmi daytoy, isu met ti kanito a panangpanunotmi no ania ti tema a suratentayo. Wen gayam, asidegen ti piestat' natay. Ania ngata no dayta a sarita ti suratentayo? Maysa a panglagip. Ngem napintas sa no saan a manglaglagip ti sarita. Saan a panay flashback.

Kunada a nasken nga adda problema a maipakita iti sarita. Ania ngata no ti simmina (kas koma ina wenno ama. Nasisiaat sa no ama lattan. Gagangayen no babaero ti lalaki. Awan sa pay nangnangegko a lalakero a babai) ket adda dua a pamiliana? Saan kadi a parikuten daytoy? No sibibiag ti ama, agiinnangat ti dua a panig. Sumardeng ngata ti riri no pimmusayen ti ama? Aniat' panagkunayo?

Sapay koma ta tulongandakami nga agsariblag. Amangan ta rummuarto daytoy a sarita iti panid ti maysa a magasin.

-o0o-

PAULO TI SARITA: ______________
Sarita ni: RFAAFIL BLOG

"TANDAANAM daytoy sawek kenka, Erwin," kinuna kenka ni nanangmo a nakalablabbaga dagiti matana. "Ti ibagbagak a pamilia ti amam, umayda la ketdi agpakita ditoy!"

Gapu ta nasemsemka ken dimo kayat a denggen dagiti sumaruno pay a sawen ti inam ken dimo kayat a denggen ti dung-aw ni lolam, rimmuarka manipud iti agdua kadsaaran a balayyo. Nagderetsoka iti pagtutugawan iti sirok ti mangga nga asideg ti lalaktawan a lumas-ud iti arubayanyo.

Umuna a rabii ita a pannakaimassayag ni tatangmo. Nakalawlawag iti uneg ken ruar ti pagtaenganyo a parnuayen dagiti bombilia ken flourescent. Adu dagiti tao a makipagrikna iti kellaat nga ipupusay ti amam.
.....MAITULOYTO.....

-o0o-


Ituloyyo ngaruden ti sariblag, kakabsat! Wenno mangilanadkayo man laengen iti opinion no kasano a maituloy ti sarita. Mangirekomendakayo man ngarud kakadua iti paulo ti sarita a rugiantayo a sariblagen iti sabali a thread.

Sapay koma ta tulongandakami nga AGSARIBLAG....

___________________
PABLAGPLAG (Patalastas): Blag! Nupay awan pammalubos dagiti maseknan, innayonmin ti link dagiti kablag iti listaan ti Blogmates. Aniat' makunam, Asseng ken Anib? Awan ngata metten problema ken ni Mannurat no nainayonen iti listaan ta isu la ngarud ti orihinal (no koma nabangonen wenno nabukelen ti GUMIL BLOG, isu ti adigi wenno presidente.) Blag!

AGSARIBLAGTAYO!
Mood:  caffeinated
Topic: Sariblag

Malagipmi pay laeng daydi immuna a sarita a naipablaakmi iti Bannawag. "SAYANG" ti paulona. Daydiay ti immuna a sarita a sinuratmi ket anian ta napagasatan ket nakapasa iti pagrukodan ti nalatak a magasin. Saan ngarud a nasayang daydiay a bannogmi ta nagbalin nga inspirasionmi tapno makaipablaakkami pay ti dadduma a sarita. Nabayagen daydi naudi a naipablaakmi iti Bannawag a sarita. Dimi pay ketdin malagip. Dimi pay ketdi ammo no adda pay naipaspasarak manen a naipablaak kadagiti tiempo a naipaidam kadakami ti agbasa iti Bannawag.

Babaen kadaytoy kaluklukat a blog, nalabit maseggedan manen ti essemmi nga agsurat iti sarita. Pauluanmi ngarud daytoy a topiko iti SARIBLAG. (Bukodmi a panunot ti Sariblag.) Ania ti sariblag? Panagaramid iti sarita babaen ti blog. Naadaw iti dua a balikas: Sarita ken Blog. No agputarka iti sarita, kaska met la agbla-blog. In-inut ti pannakaaramid ti sarita. Mapasenpaset dagiti maikur-itmo. Malaksid ngata no nasiglatka a talaga ta kabaelam a leppasen ti maysa a sarita iti maysa a tugawan.

Iti sumaruno nga aldaw, rugiantayo man ti SARIBLAG. Tulongandakami a mangputar iti sarita. Rugianmi ti sarita, satayto ituloy kalpasanna. No agpalpallailangkayo iti Iluko.com, nalabit nakita ken nabasayo ngata metten daydiay maysa a thread iti nalatak a dap-ayanda. Ti thread ket napauluan sa iti "Sukdipam, Lakay!" no dikami mariro. Kastoy met laeng ti konsepto ti SARIBLAG nga iruartayo.

Awisenmi ngarud dagiti mannurat, agbasbasa, buma-blog ken kadagiti aminen nga umiinternet. Mabalinyo ti makipartisipar. Ilanadyonto laeng dagiti eksena wenno balikas a kayatyo nga isaruno iti rugianmi a sarita. Dakaminto ti makaammo a mang-edit ken mangisilpo kadagiti ilanadyo iti comments.

Aniat' makunayo kakabsat ken gagayyem? Padaananyo ti SARIBLAG!

ANIBERSARIO TI BANNAWAG
Mood:  happy
Topic: Pasalip
Adtoy man nga iruarmi ti panangkablaawmi iti panagkasangay ti Bannawag. Nasapa pay ngem nasisiaat tay nasapsapa ngem tay naladaw. Impostemi man daytoy, baka masalaw dagiti taga-Bannawag ket iramanda iti anibersario nga isyu ti magasin nga iruarda iti umuna a lawas ti Nobiembre.

___________________________________________________
Naragsak ken nagasat a panangrambak
ti Bannawag iti Maika-70 nga Anibersariona!

Kablaaw manipud iti:

www.rfaafil.com
*
REYNALD F. ANTONIO AWARDS FOR ILUKO LITERATURE
*
ken kada
Reynald, Tess, Aldrey, Adrian ken Jathan

***
Nangabak iti 2003 RFAAFIL Reader's Choice Award:
"Kanta iti Sab-ok ti Agpakadan a Malem"
Sarita ni AGUSTIN DC. RUBIN

Nangabak iti 2004 RFAAFIL Reader's Choice Award:
"Maysa a Linabag ti Biag ni Segundina De Dios"
Sarita ni FRANCISCO T. PONCE
***

Amangan no sikanto met ti mangabak iti
2005 RFAAFIL READER'S CHOICE AWARD
iti Salip iti Sarita ti 3rd Reynald F. Antonio Awards for Iluko Literature!

Basaen dagiti pagannurotan ti salip iti Bannawag
wenno iti
www.rfaafil.com
The 1st Ilocano Website for Short Story and Poetry Writing Contest!
___________________________________________________

Iti met sabali a bangir, awisenmi amin dagiti mannurat iti Iluko tapno rugiandan a putaren ti sarita maipanggep iti kinatan-ok ti maysa a pagsapulan. Agbiag ti Bannawag! Agbiag ti Literatura Ilokana!

AGSURAT WENNO AGBASA?
Mood:  not sure
Topic: RFAAFIL Blog

Idi maipasngay ti rfaafil.com, adda metten inrugimi a blog ta libre la ngarud dayta a serbisio ti server providermi. (Kasta met ti libre a pannakaisarusar dagiti ladladawan.) Ngem gapu ta ammomi nga agkamtudkami iti oras ken ad-adu pay ti nasisita a tamingenmi nangruna iti panagrugi a panagtayab ti rfaafil, talaga a naikupinen dayta kadagiti agendami.

Ngem nakulding sa, (sa kunak ta agpangngaduakami latta a mangirugi gapu iti kinangednged ti orasmi,) ti riknami iti maysa nga awis nga agkunkuna: isingasingko man kadagiti ilokano a mannurat nga agaramidda met koma iti blogda. Mayat man no adda koma bukod a blogsite ti tunggal maysa kadatayo. Ania ta baka addanto pay mabuangay a gumil blog?"

Awis daytoy ni pagayam Roy a mangtartarawidwid iti mannurat.com a website a pakasarakan kadagiti gapuananna a kas mannurat. Maysakami kadagiti pinukkawanna tapno sumurot iti desdes a rinugianna tapno sumurot met ti ipatpateg a literatura iti panagdur-as ti teknolohia.

Kasano kadi ti agblag? Kasapulan a nagaget, naanus ken napartakka nga agsurat. Kasanon ket siak san daydiay kasasadutan iti panagsuratan? Idi awan pay ti kompiuter iti sanguanak, an-anusak ti agusar iti bolpen ken papel, ngem idi addan, binay-akon ti bolpen ken papel. Iti panagarem, diak kayat ti agaramid iti love letter tapno dumanon iti ar-armek, ad-adda a kaykayatko nga isawang iti sanguananna dagiti sawek. Narigaten no usarennanto ketdi ti sinuratko tapno iwaragawagna iti sapasap ti inruknoyko nga ayatko, he-he-he! Kayatmo ngata a basaenna ti love lettermo iti sanguanam nga adu ti dumdumngek? Ah, sabalin san ti nagturturongan ti sasawek? Kastan sa ti panagrasrasonko no diak a talaga kayat ti agsurat. Akuek, talaga a nasadutak nga agsurat. Dagiti kuadernok idi haiskulak ken uray pay idi kolehioak, awan sa pulos karkargana. No adda man nagunegda, agsasabali dagiti nausar a penmanship. Ania ngarud ti maaramidak no dawatenda met ti notebookko ta isuda kanon ti agsurat para kaniak? Ngem tapno dimo met ibagbaga nga awan serserbik nga agblag, apay pay la a rugrugiak, tapno ibagak kenka, maysaak sa kadagiti nagaget, naanus ken naalibtakak nga agsurat no dadduma. No magagetak ken makaanusak. Kastan sa a talaga.

Subliak manen ti kinahaiskulko. Gayyemko idi ti tisa ken pisara ta naanus ken napartakak nga agsurat. Kanayondak a mandaran dagiti maestro ken maestrak. Tallo a lawanit a nagaabay, napnokton a suratan, addanto pay la agreklamo a kaklasek no rugiakon ti agbura ta dinanto pay gayam nalpas a kopiaen dagiti immuna a sinuratko ket makagura no makamakamko a buraen ti saksakarenna. (Sikretok daytoy, isu a saanmo nga ibagbaga.) Masdaawda no apay a kayatko a kankanayon ti agsurat iti blackboard. Dida la ammo, a ginalgalkon dagiti balikas ket naisarusaren iti utekko. Agasem ngamin ta basaem nga umuna ti isuratmo samonto isurat iti blackboard samonto manen basaen a mamindua no husto met laeng ti insuratmo. Pabasolendakanto pay ketdi dagiti kaklasem no ti la addan nga insursuratmo.

Ngem no pagpiliennak ita no ania ti kaykayatko: ti agsurat wenno ti agbasa? No agsurat ti piliem, pinilim ida a dua. Kasapulam ti agbasa no agsuratka ngem dim' kasapulan ti agsurat no agbasaka. Ania ngarud ita ti narigrigat? Ti agsurat wenno agbasa? Uray ania ti sungbatmo, ti napateg isu ti panagrasonmo. Narigat ti agsurat no puted dagiti imam, no awan tinta ti bolpenmo ket gudugodkanto a gudugok ta paruarem ti tintana, ken, no panunotem pay laeng nga umuna ti isuratmo agingga nga awan met mapanunotmo. Narigat met ti agbasa kunam sa. Kasanon no awan ti anteohosmo, no blackout ket nakasipsipnget, no ipilitmo a basaen ti pampanunoten ti maysa a tao, ken, no dim' met magustuan ti basaem wenno dim' met maawatan ti basbasaem?

Adda idi nakatugawko a balasang. Sinaludsodko no ammona ti agbasa. Nadlawko a immalsem ti rupana ket kinunana: Aniat' pangipagarupam kaniak, laglag? Saanak a nagtagtagari ngem impasangok kenkuana ti Chinese Magazine sako kinuna: Basaem man ngarud daytoy. Intudok dagiti ekis-ekis wenno kasla kaykayo a nagsasanga. Itan mamatika, narigat ti agbasa no dim' met maawatan dagiti letra.

Ah, diak sa kabaelan ti agblag? Awan sa orasko. Madin sat' panagrasrasonko. Ah ngem, ala, ket padasen a, ti magna no saan a kabaelan ti tumaray, uray saggabassit wenno saggaysa laeng ti askaw, tapno adda met pagturongan ti panagblag. Narigat met ti tumaray a bigla no agsursuroka a magna ta dikanto ket matumba. Blag-blag-blag-blog! kunanto ketdi dagiti masalaponmo a labba a matnag iti daga.

PALIIW KADAGITI NAISALIP ITI 7TH RFAAFIL
null

DAGITI MAGUSTUANMI A DANIW ITI 7TH RFAAFIL
null

RESULTA TI PASALIP ITI SARITA
null