Pakauna: Basaen ti kompleto a listaan dagiti naisalip a sarita ken daniw iti RFAAFIL 2004-2005 iti www.rfaafil.com ken iti Marso 14 nga isyu ti Bannawag.

Duapulo ket dua (22) amin dagiti naisalip a sarita iti RFAAFIL 2004-2005. Husto daydiay pugtomi maipanggep iti bilang dagiti nakisalip iti sarita ita a tawen. Kinunami a basbassit ti bilang dagiti maisalip ita a tawen kompara iti napalabas a dua a tawen.

Iti met biang ti daniw, tallupulo ket siam (39) amin dagiti naisalip.

Iti panangbukitkitmi kadagiti amin a naisalip, makunami nga awanen naglabsing iti pagannurotan a kas itay napalabas a tawen. Nababaked ken napinpintas dagiti naisalip. Dagitoy ket bukodmi laeng a paliiw. Urayentayo ti makuna dagiti hurado kangrunaanna ti resulta ti pasalip.

Agyamankami kadagiti amin a nakisalip. Ken goodluck kadakayo amin!

Posted by rfaafil at 3:31 AM EST

Updated: Thu, Mar 3 2005 3:51 AM EST

Share This Post

Post Comment | Permalink

Adtoy man nga irugimi iti maysa a pakpakatawa ti panangsirigmi iti sabali manen a sarita a naisalip iti Sarita 2004-2005.

Iti maysa a kalye iti siudad, ipukpukkaw ti magmagna a tindero ti "Balot, ballot, baloootttt!" Idi adda malabsanna a balasitang, nagsardeng ta immasideg daytoy kenkuana.

"Adda kadi lakom a penoy, manong?" sinaludsod ti balasitang.

"Adda a, `ding!" insungbat ti tindero ket imbabana a dagus ti bay-onna. Napartak a nangiruar iti itlog a penoy.

Ngem nagwingiwing ti balasitang ta saan met a gumatang. "Adda gayam lakom a penoy, manong," kinunana, "apay ngarud a dim' ipukkaw ti `Balooootttttt..... penooyyyyy!"

Nakudkod ti tindero iti saan met a nagatel a teltelna.

Ngek! Korni! Ngem no apay a rinugianmi daytoy panangsirigmi iti daytoy a sarita agsipud ta kastoy ti wagas nga inaramat ni naragsak a mannurat nga agkubkubukob iti sinsinan nagan a Manny Pinat iti saritana a "Ay, Maniyo'ta, `Ding!" Makapakatawa, makapaellek, makaparungiit, makapagarakgak ken no ania la ditan a mangpabukar iti bibig. Wen kabaelanna nga ited kenka ti nasam-it, a kas diro, a bangbangir nga isemmo.

Idi rugianmi a basaen ti sarita, nasaludsodmi a dagus ti bagimi no nayaw-awan kadi manen daytoy a sarita iti pasalip. Ngem napaneknekanmi a saan ta makitami met a tratarenna ti maysa a pagsapulan. Paulo pay laeng ti sarita ket mapugtuamon a pagsapulan ti ipaspasimudaagna. "Ay, maniyo dita, ading!" Agaw-awis ti aglaklako a gumatangka iti tagilakona a mani.

Kastoy man ti panaglako ni Pilo, ti bida, iti sarita.

"Ay, ading, maniyo'ta! Maniyo'ta!" Pinayapayan ni Pilo dagiti uppat a seksi nga agtutubo nga agpapada ti badoda: nakamaong iti nakipet ken nakabadoda iti nalabaga a venus cut a hanging ken nakasapatosda iti puraw a goma. "Mani, `ding, gumatankayon, kalluto! Naimas ken nalaka!" Kinermakermanna dagiti agtutubo.

"Naimas met laeng `toy manim, manong? Ti ammok ket babai laeng ti aglako iti naimas a mani, hi-hi-hi!"

"Ay, nakaim-imas, ading biutipul, kasla kaimas `ta isemmo!"

Saanen a pagduduaan. Narigat a putaren ti kastoy a sarita. Kasano a paglaokem ti panangray-aw iti panangitan-okmo iti maysa a pagsapulan? Kayatmi a sawen, no kayatmo nga itan-ok ti maysa a pagsapulan, seriosoka koma, apay nga agpakatawaka? Patienda kadi ti ibagbagam a maysa a serioso a banag ket ti met wagasmo a mangibaga ket ang-angaw, katkatawa. Daytoy ita ti pagbilibanmi ken ni mannurat. Kadagiti amin a naisalip, naisabsabali unay a klase daytoy a sarita. Dimi ammo no talaga nga inranta ni mannurat daytoy a wagas wenno talaga nga abilidadna ti agsurat iti kakastoy a sarita.

Topiko pay laeng, maipanggepen iti panagkatawa. Kas koma iti daytoy: Adda maysa nga aglaklako. Isursursurna dagiti tagilakona iti kalsada. Ipukpukkawna ti produktona kadagiti amin a malabsanna. Normal, saan kadi. Awan nakakatkatawana. Ngem ania ngata no ibagami a ti tagilakona ket maysa a lungon. He-he-he! Saanka kadi nga agkatawa? Ania ngata, susuonen kadi ni tindero ti lungon nga ilasatlasatna iti kalsada? Adda ngata mayat a gumatang? Saan ngata a palapalendaka iti tsinelas? Ibagada ngata nga agmauyongka? Uppppssss! Ammok, umis-isemkayo la ketdi iti bangbangir. Narigat ti umisem no tuppolka. Dim' kabaelan ti close-up smile.

Kuna ni Pilo, ti kangrunaan nga agbibiag iti sarita: "Dimo laisen ti mani, baket. Gapu iti mani, naam-ammoka. Gapu iti mani a sinungbatam ti ayatko. Agtaud iti mani ti pagbiaganta. No bumaknangta, gapunto met laeng iti mani."

Bimmaknang kadi ti pamilia ni Pilo iti panaglaklakona iti mani? Adtoy ti paset ti sarita a mangsungbat iti dayta a saludsod:

Manipud iti bodega, lima a babbai ken pito a lallaki a trabahadorna ti agkikinnissiim ken mangis-isem iti kaipinpinta ni Pilo a marka ti dyip iti ngatuen ti windshield: AY, MANIYO'TA, `DING! Sabali pay ti immarkana iti kutit ti luganna a TUBBOG TI MANI.

Nabsogkami a nangbasa iti sarita. Naka-relatekami met kadagiti pasamak. Talaga a naray-awkami. Istoriaek met koma dagiti nakakatkatawa a kapadasanmi iti biag- kas koma ti dimi malapitan a date iti uneg ti pagsinean, ti pannakaripar ti gurongmi iti lamiis ti airconditioned nga elevator, ti panangpagatang kadakami ti maestrami iti mami, ti kinaturtur-ogmi, ti makagat iti alimatek, ti mabitin ti kamisetana iti nangato a sanga, ti matnag iti kulluong ti baboy, ti ipalned ti nadagsen a palpal, ken adu pay - ngem saanen. Por delikadesa. Nakababain, nakakatkatawa. Ngem bilibak a talaga met ken ni Pilo, ta buttaw la ngaruden ti siortsna ket agpaparangen dagiti agsumbangir a pingping, sumrek pay laeng iti uneg ti banko tapno matungpal laeng ti nalpasen nga inkarina. Kasta man dagiti Ilokano, addaan iti palabra de honor.

Pagrukbabanmi ni mannurat iti likudan ti parbo a nagan a Manny Pinat iti makapaellek a saritana nga "Ay, Maniyo'ta, 'Ding!" ta nupay nagpakatawa, siento porsiento a nagballigi a nangitag-ay iti maysa a pagsapulan.

Posted by rfaafil at 4:16 AM EST

Updated: Thu, Mar 3 2005 3:35 AM EST

Share This Post

Post Comment | View Comments (1) | Permalink

ADTOY TI ABABA A SALUDSOD:

Namin-adu ngatan a naawatmi daytoy iti E-lokano Mail. Kastoy man ti nagunegna.

Nasaysayaat koma a saan a maibutaktak ti pudno a nagan dagiti lima a mapili a sarita sakbay a mapili ti Reader's Choice. Ngamin, tapno saan a maimpluensaan dagiti mannurat dagiti readers a mangpili iti Reader's Choice wenno impluensiaan ni mannurat dagiti agbasbasa lalo no daytoy ket nalataken. Tapno patas ti labanan, ti koma pay la parbo a nagan ti maibaga agingga a mapilin ti umuna agingga iti maikalima a gunggona. Maipakat iti nalimed ken estrikto a komunikasion kadagiti lima a mapili tapno saan a sumngaw ti kinasiasinoda. Di kadi la mabalin apo a mapadayawan daytoy a suhestionmi?

DAYTOY TI ATIDDOG A SUNGBATMI:

Umuna unay, pagyamananmi dagiti kakabsat a nangiyarungaing iti daytoy a banag.

Sakbay pay nga impakatmi ti Reader's Choice Award, inadalmin a naimbag dagiti gannuatmi. Dayta a dalan ti sursurotenmi idi ken uray ita ken iti masakbayan. Malagipmi ita no kasano idi a napalapal daytoy a proyektomi. Ngem no saan a nabileg ti pundasionmi, nalabit natumba daytoyen a dagus iti umuna pay laeng nga addangna.

Confidentiality ti kasapulanmi tapno ad-adda nga agballigi ti RFAAFIL Reader's Choice Award. Isut' gapuna a kalpasan a mapili dagiti hurado dagiti lima a sarita, agbalin a nalimed ti isubmitirda a ranggo dagiti lima. Ideretsoda nga isubmitir dayta iti RFAAFIL. Isu pay a kaykayatmi a dida agsasarak iti personal tapno maaramid ti deliberasion ket iti laengen website ti RFAAFIL ti pagdadanonanda. Isu pay a kaykayatmi a saan a maibutaktak ti kinasiasino dagiti hurado agingga iti aldaw a pannakapadayaw dagiti mangabak. (Isut' gapuna a kunami pay, saanto a dakamaten ti RFAAFIL ti kinasiasino dagiti mannurat a nakisalip malaksid no napili ti saritana.) Iti sabali a bangir, uray estriktokami iti confidentiality, agbalin met a transparent dagiti pasamak a saan ketdi nga ilemlemmeng kadagiti agbasbasa kangrunaanna dagiti nakisalip.

Limmabankami metten iti Bannawag a dida koma ibunannag ti ranggo dagiti mangabak a sarita gapu iti Reader's Choice. Ngem paglinteganda kano ngamin, ken nakaisigudanen a mapaspasamak, nga iwaragawagda ti nagan ken puesto dagiti mangabak sakbay ti kombension tapno makapagsagana wenno agatendar kano ti nangabak a mannurat. Ammoyo no ania ti sungbatmi iti daytoy nga isyu? Kinunami a saanda la ngaruden nga iyar-aramidan iti press release dagiti nangabak, ta makaammon ti RFAAFIL a mangpakaammo kadagiti mannurat a mapadayawan. Ti inaramatmi iti kallabes a panaghurado ket nakabilbileg tapno maiggamanmi ti naan-anay a kontrol. Wen, awan makaibaga iti deretso no ania dagiti puesto dagiti sarita. Kadagiti hurado, adda laeng pamalpalatpatanda. Didanto met ammo ti kinasiasinno ti kaduada a hurado tapno damagenda no ania met ti nagbalin a ranggo daytoy. (Maragsakankami unay ta naaramid ti kallabes a press release a saan a nadakamat ti ranggo dagiti napili a sarita. Pagyamananmi ti coordinatortayo iti pasalip gapu iti daytoy a banag.)

Para iti pannakaammo ti publiko, adtoy a lukaisanmi ti maysa a banag maipapan iti Reader's Choice Award. Tinawen a no madanon ti awarding ceremonies, lima a sertipiko ti naiprinta para iti Reader's Choice. Nakasagana ti lima a sertipiko kadagiti lima a pagpilian a sarita. Dimi ngamin ammo no ania kadagiti lima ti mapadayawanto iti Reader's Choice. Agpatingga ngamin ti panagbutos iti kombension ket no close fight dagiti sarita, saganaanmi dagiti posibilidad. No asinonto ti mapili, alaenmi ti sertipiko para iti daytoy a sarita. Pigisenminto metten dagiti uppat a sertipiko a para kadagiti sarita a saan a napili dagiti readers. (Ngem kadagiti napalabas a dua a tawen, saan met a nagbaliw ti trend. Dagiti limmamang iti Internet voting, ad-adda pay a limmamangda idi maitipon ti bilang dagiti nagbutos nga awan aksesna iti kompiuter.)

Mapilpili dagiti sarita a mapadayawan iti Reader's Choice a nakawaragawagen ti pudno a nagan dagiti mannurat ngem nakalemmeng ti ranggoda. Ket no iti suhestion a nakalemmeng met koma ti kinasiasino dagiti autor dagitoy a sarita iti panawen ti panagpipili, narigat apo a patganmi daytoy a kiddawyo. Daytoy ti dakkel a rasonmi. Kadagiti agbasbasa nga awan aksesna iti Internet, usarenmi ti ipablaakmi a libro tapno daytoy ti aramatenda a mangpili iti magustuanda a sarita. Kayatna a sawen nga ilibromi a dagus dagiti sarita sakbay pay a mapadayawan ti sarita para iti Reader's Choice. No malagip, naipablaaken ti libro a SAGUT sakbay pay ti kombension. Kayatmi ditoy nga ilawlawag, a nasken a ti pudno a nagan ti mannurat ti maimaldit iti libro. Permanententon dagiti balikas a naikur-it iti libro ket dimi met ngarud kayat no parbo a nagan ti aramatenmi. (Ti tinawaen koma a panagilibromi ti gapuna no apay a 10 a sarita ti mapadayawan iti pasalip ngem napattog daytoy a banag gapu iti napalabas a tawen a lima laeng ti mapili dagiti hurado a maikari a mangabak. Nagtinnag a dua a tawen ti pasalip ti kasapulanmi tapno makairuar iti libro.)

Napintas koma ita a tawen nga aramiden daytoy a singasingyo ta awan met mairuar a libro. Mairamanto laeng dagitoy a sarita iti libro nga iruar inton sumaruno a tawen. Ngem, no aramiden daytoy, mapukaw ngamin ti consistency. Ad-addanton a makatikaw kadagiti agbasbasa a mayat a makipartisipar iti panangpadayaw ken ni mannurat.

Dagitoy dagiti rason no apay a saanmi a mapatgan ti kiddawyo ket sapay koma ta maawatandakami. Sapay koma ta nasamayen a wagas ti pannakailemmeng ti ranggo ti sarita tapno pilien ni agbasbasa iti sarita a magustuanna iti bukodna a panagraman. (Saan ket a kas iti pagam-amkan idi dagiti teddek iti literatura nga apay kano a kayatmi a pagdasigen ti pili dagiti hurado iti pili dagiti readers.)

Ipalagipmi manen kakabsat nga adda kontrol ti panagbutos nga isaysayangkatmi. Laglagipen nga adda bayad tunggal butos. Gundaway nga it-itedmi kadagiti naayat nga agbasbasa a makipartisipar ken tapno tumulong metten iti panagdur-as ti literaturatayo. Dagiti pagannurotan ken bambanag maipanggep iti Reader's Choice, urayen ti isagsaganami a pannakapili iti RFAAFIL 2005 Reader's Choice Award, wenno bisitaen laeng dagiti napalabas a dua a Reader's Choice.

Kadagiti napalabas a Reader's Choice Award (a nangabakan ti sarita a Kanta iti Sab-ok ti Agpakadan a Malen ni Agustin DC. Rubin ken ti Maysa a Linabag ti Biag ni Segundina De Dios ni Francisco T. Ponce), nagbalin met a naannayas dagiti pasamak. Sapay koma ta kastanto manen ita a tawen ken sapay koma ta adu manen nga agbasbasa ti makipartisipar ita a tawen. Namnamaenmi ti panagbutosyo iti RFAAFIL 2005 Reader's Choice Award.


PAKAAMMO: Padaananyo ti panangbukitkitmi iti sabali manen a napintas a sarita. Ti makapaellek nga "Ay, Maniyo'ta, 'Ding!" Amangan ta daytoyto a sarita ti sumaruno a mapadayawan iti RFAAFIL Reader's Choice Award. Padaananyo!

Posted by rfaafil at 6:39 AM EST

Updated: Sat, Feb 26 2005 6:30 AM EST

Share This Post

Post Comment | Permalink

Adtoy manen nga isarunomi ti sabali pay a sarita a lumaban iti salip iti sarita.

ADTOYAK, NI TRANQUILINO TACNENG: ITI 28 KADSAARAN A LUBONG

Asino kadi ni Tranquilino Tacneng?

Immadayo tapno birokenna ti kaibatoganna iti sabali a lugar nga iti unos ti tallupulo a tawen a pannakaiyadayona, nagbalin a ganggannaet iti nakayanakanna a daga.

Kunana: "Nagsagabaak iti nakaro nga iliw iti pannakaipusingko iti daga a nakayanakak ngem gapu iti bilbilin ti naasi nga inak a nagramut iti panunotko, saan a nabaelan ti tallopulo a tawen a pinukaw ti anag ti kina-Ilokanok. Uray no maysaakon a makipagili iti ganggannaet a lugar, Ilokanoak a naipasngay, Ilokanoakto pay laeng nga agsubli iti tapok a naggapuak..."

Dayta ni Tranqulino Tacneng. Napaneknekanna a ti kinatan-ok ket adda iti sadino man a yan no ammo la ketdi nga ipateg ti bukod a kinatao...

9:15 ti Rabii, Pebrero 23, 2005

Wen, kaniak la a maysa, ti natan-ok a makipagili isu daytay saan a mangisukat iti kinasiasiona iti ania man a banag--kinabaknang, dayaw... Ania koma dagiti plake no saanka met a napudno iti bagim? Gabsuonandaka man iti plake wenno sertipiko no dimo ammo ti kinasiasinom, ken no dimo ammo ti agserbi iti amin a kabaelam uray nangato wenno awan naragpatmo nga adal, ania ti mamaayna?

9:17 ti Rabii, Pebrero 23, 2005

Napateg ti relo kadakami. Kasla dikami makatalna no awan relo iti takiagmi. Adda ngamin nangisagut kadakami iti relo ket kunana a tunggal mariknaminto ti pitik ti relo iti pulsomi, tunggal matmatanminto ti relo iti imami, panunotenmi kano a napategkami a tao kenkuana.

Kasta met ni Tranquilino Tacneng. Tunggal matmatanna ngata ita ti relona, maipalagip kenkuana dagiti adu a bambanag kangrunaanna ti de-oras a panagserbina iti kompania a nagtartrabahuanna. Maipalagip kenkuana a bigbigenda ti kinatan-okna.

Iti panangbasbasami iti sarita, makitami a matmatmatan ni Tranquilino Tacneng ti relo iti takiagna bayat ti panagurayna iti kangrunaan a pasetna iti programa- ti pannakaitan-okna.

9:25 ti Rabii, Pebrero 23, 2005

No napadasamon ti nagdiskurso, ammon nga iti panangur-uraymo iti batangmo, taldiapka la a taldiap iti oras. Bayat a matmatmatam ti relom, mabalin nga agsisimparat dagiti pampanunotem- napalabas, agdama wenno masangnguanan.

9:28 ti Rabii, Pebrero 23, 2005

Ti Adtoyak, ni Tranquilino Tacneng: Iti 28 Kadsaaran a Lubong ket maysa laeng iti dua a sarita a naisalip a mapnekkami iti panagtransisionna. Nabileg unay ti oras nga ipaspasimudaagna. Minatmatanmi met ti oras bayat ti panangbasbasami iti sarita.

9:32 ti Rabii, Pebrero 23, 2005

Ania kadi dayta 28 Kasaaran a Lubong iti paulo ti sarita? Dayta ti natan-ok a pagsapulan ni natakneng a Kilin (a.k.a. Tranquilino Tacneng). Umuli-umulog nga elebeytor iti duapulo ket walo kadsaaran a pasdek.

Maysa manen a nasiglat a mannurat a naglemmeng iti parbo a nagan a Sabas Rentiquiano ti akimputar iti sarita nga "Adtoyak: Ni Tranquilino...." Pulido ti pannakasangalna. Nisupsupadi iti kaaduan kadagiti sarita.

Napigsa daytoy a sarita a lumaban iti kinatan-ok ti maysa a pagsapulan.

Posted by rfaafil at 1:11 AM EST

Updated: Thu, Feb 24 2005 1:53 AM EST

Share This Post

Post Comment | Permalink

PAKAUNA: Awan sabali a panggepmi no di laeng mangted iti sangkabassit nga impormasion ken paglinglingayan dagiti nakisalip kasta metten kadagiti agbasbasa.

Adtoy ngarud nga idasarmi manen ti sabali pay a natan-ok a pagsapulan- panagdamili. Ti "Tapayan ken Bibilan" ken ti "Ti Pila ken Ti Bibilan" dagiti naisalip iti daytoy a kita ti pagsapulan. Ti naud-udi ti napilimi nga imaritan.

TI PILA KEN TI BIBILAN

BIBILAN.... nga iti laeng arapaap, iti telebision ken kadagiti laeng ladawan a nakitami daytoy. Ngem awan kas 'tay makitam a personal. Daydiay padas a maimaldit iti rikna ken isipmo tapno ammom ti sasawem. Daydiay masagid ken makitam nga agtaytayyek ti bibilan....

AGTAYTAYYEK TI BIBILAN.... tapno agtuloy ti pakasaritaan ti maysa a kaamaan, ti pagsapulan a pagbiagan ni Ilokano, ken ti ladawan ti kultura ti kina-Ilokano....

KULTURA TI KINA-ILOKANO.... ti panagdamili a mangsukog kadagiti putik, burnay, lusob, tiles, babassit a damili a maiwaras a souvenir iti kasar, babassit a plorera nga arkos dagiti lamisaan wenno dibision dagiti opisina wenno dagiti pasdek ti negosio, ken adu pay a bambabanag a maaramid babaen ti panagdamili....

PANAGDAMILI.... ti katan-okan a pagsapulan ken ni mannurat a naglinged iti partuat a nagan nga Alma "Rose" Amor. Ti pagsapulan a nangted biag iti kaamaanda ket agtultuloy a tawiden ti agdama a henerasion ti pamiliada.

-----------

Iti rugi ti sarita, saan nga agkutkuti ti bibilan. Iti gibusna, agtaytayyek ti bibilan. Patienmi a batido ti mannurat a nangsurat iti daytoy a pagsapulan.

Iti ngato, makita pay ti ehemplo ti pannakaisurat ti sarita a "Ti Pila ken Ti Bibilan." No agtransition ti sarita iti sabali a setting, usarenna dagiti naudi a balikas a pangrugi iti sabali a setting. Nagbileg ketdin daytoy nga inaramatna.

Ti "Ti Pila ken Ti Bibilan" ket maysa a sarita a naisangsangayan ti pannakasukogna. Nadamili dagiti pasamak ken wagas ti pannakaisuratna. Awanan uray maysa a dayalogo. Nupay pasig a narration, saan a napukaw ti interesmi a nangbasa iti tunggal pasetna.

Naisursurotkami kadagiti pasamak. Nagtedted ti ling-etmi ken nagkapuyo ti imami a nanggamay iti pila, pinatayyekmi ti bibilan babaen ti kanawan a sakami, sigagagar pay dagiti ramaymi a nangmuli iti daga. Napnuan ragsak met ti panangbagkatmi kadagiti nadamili a putik.

Anian a nagpintas ti sarita, ta dinamilina ti isipmi iti maysa a sursuro nga amin a banag a kayat a mapadakkel, mangrugi iti bassit.

Kablaawan ken pagyamanandaka, patgenmi a mannurat iti likudan ti nagan nga Alma "Rose" Amor, ta dinamilim ti sarita a "Ti Pila ken Ti Bibilan" tapno dinto maumag ti pagsapulan a panagdamili iti pakasaritaan ti biag dagiti Ilokano. Nagballigika a nangitan-ok iti dayta a pagsapulan. Maysa la ketdi ti saritam a mangkayaw iti rikna ken isip dagiti hurado.

Posted by rfaafil at 12:01 AM EST

Updated: Mon, Feb 21 2005 7:30 PM EST

Share This Post

Post Comment | Permalink

ARIGNA dandanin maysa a bulan ti napalabas kalpasan a naggibus ti pasalip, palubosandakami man ngarud a mangipakaammo kadakayo no ania itan dagiti mapaspasamak iti pasalip. Dagitoyda man:

DAGITI NAISALIP
Duapulo a sarita ken tallupulo ket pito met a daniw dagiti naiwaragawagen a naisalip iti RFAAFIL 2004-2005. Mabalin a manayonan pay dayta a bilang. Kuna ngamin ni Apo Cles Rambaud, coordinator ti pasalip, nga adda pay tartaraudi nga entries (addan sa lima pay kunana: dua a sarita ken tallo a daniw) a napasangpetna. Ngem iyur-uraymi laeng aminen tapno sangsangkamaysanton nga ipaskilmi dagiti naud-udi nga entries.

Malagipmi manen ti immuna a deadline ti pasalip nga Oktubre 31. Atiddog koma daytan a pawayway kadagiti sumaruno nga aramidenmi saan ket a kas ita a kanayon nga agkamkamat iti oras. Nupay kasta ar-aramidenmi met ti amin a kabaelanmi a mangsulnit iti bannog ken ayat dagiti mannurat a makisalsalip. Isut' gapuna nga impaskilmin dagiti immun-una nga entries ta ammomi no kasano ti regget dagiti nakisalip a mangammo kadagiti sarita ken daniw a naisalip.

Apaman a mapagtitiponmi amin dagiti entries, yawatmin a dagus dagitoy kadagiti mapilimi a hurado. Nasaysayaat met laeng no aggigiddan iti pannakaiyawat dagiti entries tapno addaanda iti agpapada a tsansa.

DAGITI HURADO
No agrigat man dagiti hurado nga agpili kadagiti sarita ken daniw a mapadayawan ita a tawen, kasta met ti panagrigatmi nga agpili no asino dagiti aghurado ita. Nalpasen a nakapilikami kadagiti hurado ngem napurnada met a namimpinsan. Narugianmi koma metten a napakaammuan dagitoy .

Madakamatmi ketdi ditoy ita ti maysa a sistema ti panagpilimi. Nasken nga adda agsubli a hurado iti napalabas a pasalip. Kayatmi ngamin nga adda `continuity' ti pasalip. Ta ti agdama ket naggapu iti napalabas. Wen, kasilpo ti napalabas nga anges.

Ngem amangan ta saanen a masurot dayta a sistema a kunami. Ngamin ket awan met maaramidanmi no saan met nga awaten ni hurado ti pakaasimi a no mabalin, isuna koma ti kayatmi nga aghurado.

Ala, no asinonto man dagiti aghurado, idawatmi koma ti pannakatungpal dagiti kiddawmi apo.

PANAGHURADO
Kangrunaan unay a pampanunotenmi iti panaghurado ket ti gundaway a maipadigominto, kadagiti nakisalip kasta metten kadagiti agbasbasa, dagiti pasamak ken wagas iti pannakapili dagiti mapadayawan a sarita. Uray no kaskasano ket maammuan met dagiti nakisalip no ania ti nagbanagan ti gapuananda.

Iti agdama, madamami pay laeng nga an-anagen ti maysa a suhestion a naawatmi iti E-lokano Mail a kastoy ti linaona: Napintas ken pagyamananmi unay no mailukat iti publiko dagiti pasamak kabayatan ti panaghurado ita a tawen, uray no iti salip iti daniw laeng. Naglaka ketdi koman a patganmi daytoy a kiddaw. No adda la koma ngamin karbengan a mangipaskil kadagitoy iti website nga awan sungsungbatanna kadagiti autor, agtaytayab koman a dagus dagiti binnatog ti daniw ket nakasaganan a mabasa iti Internet. Bay-am, kabsat a nagsurat, ta adalenmi a naimbag no kasano a mapatganmi ti singasingmo. Pagpampanunotanmi pay ketdin no kasano a mailut ti pagannurotanmi tapno mapasamak ti kalkalikagumam. Ngem ala, ti laeng maikarimi ket ipaaymi amin a kabaelanmi, uray no sabtendaka laeng iti tengnga ti kiddawmo.

DAGITI DANIW
Adu dagiti nakisalip iti daniw. Wen, ta al-alisto laeng a sangalen ti maysa a panid wenno ti agduapulo a panid. Nupay kunami a mabalin ti dua a daniw nga isalip ti kada mannurat, manmano met dagiti mannurat a nagisubmitir iti dua nga entry.

Kadagiti amin naisalip, nakurkurang bassit iti kagudua dagiti daniw a naputar a mairuknoy iti website ti RFAAFIL. Kas nadakamatmi iti pagannurotan: uray ania a tema ti suraten ngem nasaysayaat no ti daniw ket mairuknoy iti www.rfaafil.com, saan met ngata a parikut kadagiti nakisalip no maikkan bassit iti nayon a puntos ti daniw a nangsurot iti dayta a pagannurotan. Immun-una a naipakaammomin a dawatenmi kadagiti hurado a mangnayonda iti puntos manipud iti 5% agingga iti 10% iti daniw a nangsurot iti dayta a paglintegan. Pangngeddengton ni hurado no mano ti inayonna a puntos iti daniw.

Iti met E-lokano Mail, adda nagkuna a napintas met koma no adda Reader's Choice Award iti daniw a magustuan dagiti agbasbasa.

DAGITI SARITA
Kinatan-ok ti maysa pagsapulan. Tema nga iti immuna a panangipagarupmi, manmano dagiti mannurat a mayat a mangsurat iti daytoy. No apay a kasta ti panangipapanmi ket agsipud ta ti napalabas a tema a panagsakripisio, nga asideg iti puso ti asino man, nayaw-awan met dagiti nakisalip. Panagsakripisio, a patienmi a tunggal tao ket addaan sakripisio iti biag, a nakatikawan ngata dagiti nakisalip iti pudno a kaipapananna. Anianto la ketdin ti agdama a tema- ti kinatan-ok ti pagsapulan?

Ah, nagbiddutkami iti panangipagarup ta napuntaan a namimpinsan dagiti nakisalip ti tema a kayatmi a matratar. Madlaw ketdi a sumursurot latta ti balikas a sakripisio iti agdama a pasalip ta adtoy ita a managsakripisio dagiti bida dagiti sarita. Ad-adu pay ketdi itan dagiti sarita a nangdakamat iti balikas a sakripisio. Kayatna kadi a sawen a natantan-ok ti maysa a tao no agsakripisio?

Kadagiti amin nga naisalip, kaadduan kadagitoy dagiti sarita a ti kangrunaan nga agbibiagna ket mapadayawan iti rabaw ti entablado. Daytay mabigbig dagiti gapuananna. Nagsusurot kadi manen dagiti nakisalip? Ah, daytoy met ketdi ti kayatmi a mapasamak. Ti panagkakaarngi dagiti sarita. Ti pannakasurot iti tema ngem dependen ken ni mannurat no kasano nga ipakitana wenno aramatenna ti tema a naidasar kenkuana. Isu ngarud a kayatmi nga adda tema ti pasalip tapno mapagdadasig a naimbag dagiti hurado dagiti sarita.

Ngem nupay kunami a lumag-an ti naipabaklay ken ni apo hurado a mangdasig kadagiti sarita, mabalin a marigantanto met latta dagitoy nga agpili. Ngamin, agsusupadi met dagiti pagsapulan a naagapad dagiti mannurat. Nagduduma a pagsapulan ngem agkakatan-okda.

Kas nakunamin, natan-ok amin a pagsapulan. Asino ngamin ti mangibaga a saan a natan-ok dagiti mangay-aywan iti linak ken talna ti maysa a lugar? Asino ngamin ti mangibaga a saan a natan-ok ti agtagilako? Asino ngamin ti mangibaga a saan a natan-ok dagiti mannursuro? Asino ngamin ti mangibaga a saan a natan-ok ti gagangay laeng a trabahador? Asino ngamin ti mangibaga a saan a natan-ok ti propesion a doctor, maibilangen ti kinamammaltot? Asino ngamin ti mangibaga a ti maysa a pagsapulan ket nangato wenno nababa?

Wen, natan-ok amin a pagsapulan. Nagduduma dagiti pagsapulan a naidasar. Agkakalaing dagiti mannurat ken agkakapintas amin dagiti sarita. Panagriknami, ti sarita a mangabak ita a tawen, ket agdepende no kasano nga iparang wenno kasano nga ilaban ni mannurat a ti pagsapulan ti bidana ket isu ti katan-okan. Kasta metten no kasano nga mailadawanna wenno maagapadna ti kultura dagiti Ilokano.

READER'S CHOICE
Adda naawatmi iti E-lokano Mail nga agkunkuna a napintas koma no ti Reader's Choice ket maaramid ti pannakapilina kadagiti amin a sarita a naisalip a saan ketdi nga iti laeng lima a pili dagiti hurado. Kuna pay ti singasing a mailemmeng koma pay ti kinasiasino dagiti awtor tapno saan a bias ti panagpili ken adda koma met kontrolado a sistema ti panagpili.

Nagsaayat ketdin ti singasing ngem kas kanayonmi nga ibaga nga awan ngamin karbengan ti RFAAFIL a mangimaldit kadagiti sarita a saan a mapili iti pasalip. Wen, nagpintas ket koman nga aramiden daytoy ngem narigat nga aramiden.

Kuna ngamin ti pagannurotan kadagiti amin sa a pasalip ti kastoy: Nasken nga orihinal, di pay naipablaak, di naadaw iti ania man a sinurat ken di pay nangabak iti ania man a salip iti panagsurat ti mabalin nga isalip. Kayatna a sawen a no irakurak ti RFAAFIL dagiti sarita a naisalip, dinton maisalip ni mannurat dagitoy iti sabali pay a pakontes ta impablaak metten ti RFAAFIL iti Internet. Maysanton daytoy a rason a pakadiskualipikaanna.

Sapay koma patgenmi nga agbasbasa a nangisingasing iti daytoy a maawatam ti agdama a nagtakderanmi ita.

Ania ngata no inayonmi iti pagannurotan daytoy a binnatog: Adda pammalubos ni mannurat a maipablaak ti gapuananna iti www.rfaafil.com nga awan sungsungbatan ti RFAAFIL kenkuana.

PAGSARMINGAN
No rukoden ti kinatan-ok, awan ti nababa wenno nangato a pagsapulan.

Naggapu daytoy a kapanunotan kadagiti hurado iti Salip iti Sarita iti RFAAFIL 2004-2005.

Posted by rfaafil at 12:01 AM EST

Updated: Mon, Feb 21 2005 7:20 PM EST

Share This Post

Post Comment | Permalink

Adtoy ti sabali pay a natan-ok a pagsapulan a lumaban iti salip iti sarita ita a tawen- panagsana. Ania kadi ti panagsana?

PANAGSANA

Nasapa iti bigat a makaykayan ti kadaratan santo masuyatan iti danum-baybay. Urayen ti itatangkayag ti init tapno patangkenenna ti darat. Makaruy ti darat ket mabuntuon iti tengnga. Dagitoy a darat ti maipisok iti takuli nga adda buttaw iti tengngana ngem natappalan iti lupot. Maisaad ti takuli iti nasurok a maysa a metro manipud iti daga. Masibugan dagiti darat iti uneg ti takuli. Mataya ti danuw nga agaruyot iti sirokna. Ti danum isunto ti maluto ket agbalin nga asin. Daytoy ti panagsana- panagaramid ti asin.

Panagsana ti pagsapulan a nangbiag iti maysa a pamilia. Ngem kalpasan a dimmadakkel dagiti annak, awanen mayat a mangituloy iti dayta a pagsapulan. Natuok ken nakettang kano ngamin dayta a pagsapulan. Asino ngarud ti mangirupir iti pannakataginayon daytoy no di met laeng dagiti immun-una a mangipatpateg iti daytoy a pagsapulan? (Mabalin a maikompara ti situasion a trinatar ti sarita a Panagsana iti literaturatayo. No saan a maipasagepsep ti kinapateg ti pagsasaotayo kadagiti sumarsaruno nga annak, mabalin nga agpukawto met nga in-inut ti kina-Ilokanotayo.)

Kadakami a saan a nakakita wenno awan ammona iti daytoy a pagsapulan, very informative kadakami ti sarita a Panagsana. Malaksid nga adu ti nasursuromi, nagganaskami pay a nagna iti nalamuyot a kadaratan. Makapabang-ar iti rikna ti presko nga angin-baybay. Nakalaglag-an ti panagriknami iti danog dagiti agburak a dalluyon.

Agyamankami kenka, mannurat iti nagan a Man A. Gasin, ta pinutarmo ti sarita a Panagsana a mangimaldit iti maysa a kultura dagiti Ilokano. Dakkel la ketdi ti gunggona a gun-oden daytoy a saritam.

Posted by rfaafil at 5:42 PM EST

Updated: Fri, Feb 18 2005 8:59 PM EST

Share This Post

Post Comment | Permalink

Kadagiti duapulo a naisalip a sarita iti RFAAFIL 2004-2005 a naipaiman kadakami, dua a sarita ti nangtratar iti pagsapulan ti maysa a polis: ti "Serbi ti Parbangon" ken ti "Ti Nayaw-awan."

Pinilimi ti Serbi Ti Parbangon nga ibuksilan iti daytoy a pagsapulan.

SERBI TI PARBANGON

A good policeman is not a good father, kunada man. Mabalin a husto, mabalin met a saan. Mangmangegko ngamin no kua a kuna ti sabali: madaydayaw unay a polis ngem barumbado met ti putotna.... apay a dina maisuro mismo ti anakna. Iti bukodmi a panirigan, ti polis ket dua a dalan ti sursurotenna- dua ti pagrebbenganna: ti panagserbina a mangaywan iti linak ken talna iti komunidad, ken, ti pagrebbenganna a kas ama iti pagtaengan. Narigat a paggiddanen ti dua a banag.

Ken ni PO3 Libong Jr, ania ti ad-adda nga ipangpangrunana- ti kadi pamiliana wenno ti panagpaayna a kas polis? Wenno kabelanna kadi a paggiddanen ti dua a banag? Napukaw kadin ti nasin-aw a dayaw dagiti polis? Nagbalin kadi a karit ken ni mannurat ti mangputar iti sarita a mangitan-ok kadakuada? Masungbatan daytoy a saludsod iti sarita a napauluan iti Serbi Ti Parbangon.

Napnekkami a nangbasa iti sarita. Saan pulos a napukaw daydiay gagarmi a nangbasa iti tunggal pasetna. Kaskami la nagbuya iti sine nga adda suspense ken lablabanna. Maaksion ken kuldingenna ti pusom. Nagustuanmi unay ti endingna. Saan a basta insubo ni mannurat ti kayatna a paggibusan ti saritana. Depende a panunoten ti agbasbasa no ania ti kayatna a tuloy ti sarita.

Nagnaedkami met iti siudad ti Metro Manila isu nga asideg kadakami dagiti lugar ken pasamak. No saan a maysa a polis ti mannurat, kunaenmi a managsukisok. Widwidawidanna pay ngata met a kankanayon ti siudad ta ammona a saritaen ti kabibiag ken iladawan ti nagulo a lugar.

Iti imatang ken kapanunotan ti publiko, nabayagen a namansaan ti dayaw dagiti polis. Ngem saluduandaka man, kabsat a mannurat a naglemmeng iti alias a Remedios Gundran, ta naitag-aymo a namimpinsan ti dayaw dagitoy. Uray manmano koma ti bilangda no kapadpadada amin ti kababalin, kinalinis iti panagpuspuso ken kinapudno iti panagserbi ni PO3 Libong Jr, ti kangrunaan nga agbibiag iti saritam, nagtalna ket koman a kankanayon ti aglawlawtayo. Ni PO3 Libong Jr a natured, a saan a mabuteng a matay bayat ti panagserbina.

Saluduanka ngarud, Remedios Gundran. Nakasagana ken nakired a lumaban ti Serbi ti Parbangon kadagiti dadduma pay a naisalip iti 2004-2005. Amangan ta tumbaenna pay ketdi amin a naisalip.

Posted by rfaafil at 3:43 AM EST

Updated: Wed, Feb 16 2005 5:03 AM EST

Share This Post

Post Comment | Permalink

PAKAUNA: Ulitenmi, daytoy ket bukodmi a paliiw kas maysa nga esponsor, nanumo a mannurat ken gagangay nga agbasbasa kadagiti naisalip a sarita ita a tawen. Awan sabali a panggepmi no di laeng ti mangted iti sangkapirgis nga impormasion kadagiti naisalip ken mangted iti pagliwliwaan kadagiti mannurat kasta metten kadagiti agbasbasa. Naragsak nga Aldaw Dagiti Puso kadakayo amin!

Kadagiti nasukainanmin a naisalip, uppat dagiti naisalip a nangtratar iti pagsapulan ti maysa a titser. Maibilangen ditoy ti: Kasilpo ti Napalabas nga Anges, Maysakayo a Libro, Dagiti Proverbio iti Biag ni Maestro Modesto, ken, ti Ma'am!.

Pinilimi ti Dagiti Proverbio iti Biag ni Maestro Modesto nga aramaten iti daytoy a pagsapulan. No addanto pay naan-anay a panawenmi. Iburayminto met sangkabassit ti naguneg dagiti tallo pay a sarita.

Adtoy ngarud ti sangkailgap a paset ti sarita a naisalip iti 2004-2005 a mangitakder iti pagsapulan a panagisuro:

DAGITI PROVERBIO ITI BIAG NI MAESTRO MODESTO

No sibibiag ti maysa a tao, saan a makita dagiti nasayaat nga aramidna. Ngem no pimmusayen, isunto pay laeng ti pannakaitan-ok wenno pannakabigbig iti kinaimbag ken gapuananna. Daytoy ti anag ti biag ti maysa a mannursuro a kayat nga ipasagepsep ni mannurat iti sarita a "Dagiti Proverbio iti Biag ni Maestro Modesto."

Nagballigi unay ti autor a nangipakita iti kabibiag ti maysa a natan-ok a mannursuro. Nagtan-oken ni Maestro Moding. Nakaaapal ti kinataona. Kayatmi la ngarud a saludsoden no pudno kadi a pasamak daytoy iti biag ti maysa a mannursuro wenno bunga kadi laeng iti kinasariwawek ti panagpampanunot ti autor.

Maysa manen a nasirib a mannurat a naglinged iti nagan nga Isagani A. Montero ti naannad a nagpili kadagiti nagan dagiti agbibiagna. Maestro Modesto: pagraeman, pagtamdan, modelo, naisangsangayan!

No nabileg ti guyod ti rugi ti sarita, nabilbileg manen ti gibusna. Napigsa ti kidag nga ibatina iti isip ti reader. Paneknekan daytoy dagiti linia ni Maestro Moding a: Maysa a wagas ti panagbiag ti panangisuro, saan a propesion. Addaanak karbengan a mangibaga iti kasta, ta dayta ti panagbiagko.

Akuek, nangiruarak met iti panio ket indepdepko iti suli dagiti matak. Nakipagkapetak met iti nakaat-atiddog a nangisit a lupot. Nariknak met ti nakarao a pannakaulila ti pusok. Imbakalko met ti maysa a sabong ken bingkol iti lungon idi irugidan a gaburan. Nakitak pay ti panagampayag ti sawi sa nagapon iti saklot ti ulep. Agbiagka, Maestro Moding!

Nabagas daytoy a sarita. Naimalditen ti Dagiti Proverbio iti Biag ni Maestro Modesto a mangitan-ok iti maysa a mannursuro. Saankaminto a masdaaw no maitan-ok met daytoy a sarita.

Posted by rfaafil at 12:01 AM EST

Updated: Mon, Feb 14 2005 3:57 AM EST

Share This Post

Post Comment | Permalink

Adtoy nga isarunomi nga ibuksilan ti sabali a sarita a naisalip iti RFAAFIL 2004-2005.

APONG ILYAN, AGKALKALESA

Panagkalesa ti tugot ti progreso ita.
No awan daytoy idi, awan met dagiti tumatayab a lugan
wenno dagiti napapaspas a kotse ita.

No ibase iti paulo ti sarita, ammo a dagus ti kayat a waswasen ti autor a pagsapulan- panagkalesa. Iti agdama a panawen (2005), adda kadi pay makita wenno masarakam a kalesa iti aglawlawmo? No bilang adda, adda pay ngata mayat nga aglugan iti kalesa ita ta nagkaadu, agsasabali ken naparpartaken nga amang dagiti lugan nga agsasallupang iti kalsada? Ngem apay nga agkalkalesa pay laeng ni Apong Ilyan?

"No mangegko ti tanaktak dagiti saka ti kabaliok, isublina kaniak ti napalabas. Danggayan dagiti agrimpadek dagiti nasam-it a lagip. Indayonennak ti kalesa ket sumangbay kaniak ti sigud a buya ti lugarko. Dagiti buya nga in-inut a nagbaliw bayat ti panagkalkalesak." kinuna ni Apong Ilyan.

Kadagiti kanayon a makakita iti kalesa, maumada. Kadagiti met saan pay pulos a nakakita iti kalesa, inton damo a makakitada, masdaawda. Iti biang ni Apong Ilyan, ti kalesa nga ar-aramatenna a pagsapulan, napateg unay kenkuana. Pagsapulan a mangbibiag kenkuana idi, ita ken iti masakbayanna. Pagsapulan, a napateg ken natan-ok, a mangitag-ay metten iti kinataona a kas agkalkalesa.

Tumayabtayo man iti masakbayan, inton Tawen 2050, tapno masungbatan ti maysa a saludsod: Addanto kadi pay ngata kalesa? Mabalin nga awan ken mabalin met nga addanto pay ngem ti laeng panawen ti makaibaga. Ngem no dumtengto man dayta a tawen, ti sarita nga Apong Ilyan, Agkalkalesa ket saanto a mapukaw ta naitataken iti pakasaritaan ti Literatura Ilokana. Napintas la unay no mairaman daytoy a sarita iti libro a SAGUT (Vol. 2) ta mabasanto dagiti sumarsaruno nga annak ni Saluyot iti panagtulid ti adu a tawen.

Iti pakasaritaan ti biagmi, naipaidam kadakami ti padas a makalugan iti kalesa. Agyamankami ta iti panangbasbasami iti sarita, saanmi a nalapdan ket limmugankami iti kalesa ni Apong Ilyan. Lugayanmi ni mannurat a naglemmeng iti nagan a Juan Bautista ta daytoy ti sinuratna a pagsapulan.

Posted by rfaafil at 7:28 AM EST

Updated: Sun, Feb 13 2005 11:46 AM EST

Share This Post

Post Comment | Permalink