RESULTA TI SALIP ITI SARITA ITI TAO KONTRA NAKAPARSUAAN
Topic: Pasalip
MARSO 31, 2009. Dua a bulanen ti napalabas kalpasan a nagtapos ti pasalip, awan pay resultana ti pasalipmi. Ania ngarud ket kastoy met ti adda a situasionmi. Ammomi nga adda dagiti matuokan nga aguray iti resulta ti pasalip ngem ad-adda a sikami ita ti maburiboran, maringgoran ken madanagan. Sangapulo ket maysa nga aldaw pay, nasken a maited dagiti premio iti 41st GF Convention. Kasano itan ti panagikamakammi kadagiti sertipiko? No malagipmi, adda pay daydi tawen a madaman ti kombension, awan pay resulta ti pasalipmi. Malagipmi la ketdi ngarud, kasano idin nga insaganami dagiti sertipiko?
No ammo koma la ti kaaduan dagiti mapaspasamak iti likudan ti RFAAFIL, maanagda a natuok ti kasasaadmi. Kasla met laeng makiginginnubalkami iti nakaparsuaan. Sipud pay nangrugi nga agsangpet dagiti entry, nangrugi metten ti problemami. Adda dagiti sumagmamano nga e-mail a saanmi a dagus nalukatan dagiti attachmentna. Ania pay, no di aguray ken ni mannurat nga ipatulodna manen ti pakisalipna.
Idi damo, naragsakankami ta tallo laeng dagiti naikoreo nga entry. Ngem dandani maysa pay daytoy a pinarikutmi. Impagarupmi idi no saanmin a makita dagitoy nga entry. Ta adda simmabog nga eroplano ti FedEx. Naitantan ti panagtayab dagiti eroplano a magna iti nasion dagiti Hapon. Sa ninayonan pay ti panagputok ti bulkan iti asidegmi. Nadanagankami idi ta awan no kua pamalpalatpatanmi iti kinasiasino dagiti autor dagitoy a sarita. Awan met ngaminen ti matalekmi a runner ta immay metten iti sibaymi. Isu ti mangi-e-mail idi ket a dagus ti kinasiasino dagiti nakisalip.
Maragsakankami no kua no awan mapili dagiti hurado kadagiti naikoreo ta di pay isu a parikutmi ti pannakaitypena. Adda pay idi pinaitypemi a sarita iti mabaybayadan a typist ngem anian ta idi maawatmi ti naitype, saanmi metten a maawatan dagiti naitype. Kunami idi, ta uray no saan nga Ilokano ti nagtype, no surotenna koma laeng dagiti letra, awan koma parikut.
Padpadasenmi met nga iskanen dagitoy nga entries tapno napaspas a mayawatmi kadagiti hurado ngem no saan a nalawag a mabasa dagiti letra wenno balikas anusanmi no kua nga ikompiuter. Kaasi met ni mannurat a nakisalip no yawatmi ken ni hurado ti naiskan a pakisalipna ta amangan no daytoy ti pakaabakanna no saan a mabasa a naimbag ti sarita. No met ipatulodmi ti hard copy ti naimakinilia nga entry, ad-adda manen a bumuntog ti schedulemi.
Maibilang kadagiti tallo a naikoreo a sarita ita a tawen ti Troso, Lapat, ken, Pangen. Idi kunami, a manmano dagiti sarita a nakatiliw a dagus iti interesmi. Daydiay sarita maipanggep iti troso, daydiay mangngalap, ken daydiay agminmina, saanmi pay a nabasa dagitoy tallo a sarita. Daydiay nadakamatmi a maipanggep iti troso, saan a ti Troso a naikoreo ti nabasami. Saanmi met nga innaganan ti sarita a kunami a mangngalap ta adu met dagiti naisalip maipanggep iti taaw.
Nagustuanmi amin dagiti naisalip ngem ad-adda a nagustuanmi dagiti tallo a sarita a naikoreo. Ngem gapu iti tema – tao kontra nakaparsuaan – ken ti nasken a panangipakita iti kultura ni Ilokano, sabali iti panangsirigmi kadagiti naisalip.
Ti Pangen, maarus kadagiti dua gapu iti tema. Saanna a tinaming ti tema. Ti Lapat, baro iti panagramanmi. Ti Troso, awanen ti baro nga iburayna ngem naannayas ketdi ti pannakaisuratna.
Idi kunami a naturedkami a mangibaga a dagitoy dagiti mapilimi a sarita. Wen, gapu ta isu met ti immunan a napili dagiti hurado. Kayatmi a sawen, saanmi nga inun-unaan wenno inimpluensiaan ida ta isu met dagitoy ti mapilimi. No ania man ti wagas a maaramat iti panagpili, makabaruanan man wenno sumursurot iti kadaanan a wagas, saankami a nakibiang iti pangngeddengda. Kabaelanmi a takderan dayta, iti nagan ni Apo a Namarsua. Ken saankaminto pulos a makibiang iti pangngeddengda.
Ket kas iti nakunami pay iti immun-una a blogmi a napetsaan iti Marso 19: Sapay koma ta saan nga agkudkod iti ulo dagiti hurado gapu ta marigatanda nga agpili wenno marigatanda nga awan mapilida kadagiti naisalip iti 7th RFAAFIL. Gapu iti daytoy a pasalip, naisingasing kadakami a baliwanmi ti pagannurotanmi para iti sumaruno a pasalip – 8th RFAAFIL. Maipanggep daytoy iti gunggona a maited. Mainayon dagitoy a balikas: “Mabalin a manayonan wenno maksayan dagiti gunggona depende iti pangngeddeng dagiti hurado.”
Malagipmi, idi un-unana, a sangapulo dagiti mapadayawan ngem bimmassit iti lima gapu iti pangngeddeng dagidi hurado. Kasano kano a pangabakenda ti sarita a saan a makapatar iti pagrukodan? Dida kano kayat a dadaelen ti kalidad dagiti mangab-abak iti pasalip ta dagitoyto ti pagtuladan dagiti sumarsaruno a mannurat. Kunada pay: Ti pasalip ket saan nga ang-angaw agsipud ta ti panagem ti tao a naayat nga agpasalip ket ti mangpapintas ken mangpabaknang iti Literatura Ilokana. No saan a maragpat dayta a panagem, siasinonto pay ti mayat a mangesponsor iti pasalip?
Bay-anyo man, Patgenmi a Reader, nga iburaymi manen ti kapanunotanmi kadagiti napilin a lima a sarita iti tao kontra nakaparsuaan.
[Tapno maliklikan ti mabalin a pannakaimpluensia ni hurado. Pagbalinenmi a fill-in-the blank dagiti sumaruno a parapo nga imalditmi. Tapno awan ti riri. J]
Naidumduma ti _____ ta iti biangmi, ita laeng a makabasakami iti kastoy iti uneg iti adun a tawen a panagbasbasami iti Bannawag. Iti sabali a pannao, saan a nadudog ti topiko a trinatar ti autor. Madlaw met nga am-ammo ti autor dagiti karakterna, isu a napintas ti karakterisasion. Saan a napilpilit ti panagsisinnukat iti kapanunotan. Ken makita la unay ti kina-Ilokano dagiti agbibiag. Makaanayen daytoy a sarita nga agas ti bannogmi ita a panagpasalip. Napintas ti simbolismo nga inaramat ti autor.
Ti _____ ket isu daytoy ti pudno a tao kontra nakaparsuaan. Isuna laeng ta saanmi unay pintasen ti karakterisasion. Daydiay kababalin ti maysa nga Ilokano, saanmi a naanninawan iti daytoy a sarita.
Ti _____ ken ti _____, nadudogen a topiko ken awan man laeng ti baro a maibinglayda kadagiti readers. Awanen ti baro nga ibagbagada. No pelikula koma, makatuoken daytoy. Ti _____ no apay a mapilimi, gapu iti panangipakita ti autor a masterna ti lengnguahena. Nasayud ti panagestoriana, awan sagursorna. Sumarsaruno met ti _____ gapu man laeng ta inkarigatanna ti nangsurat iti sarita iti baro a porma. Ti met _____, agtatapaw dagiti karakters (awanan iti depth), ket awan pay ketdin bibiang ti reader no makalasat wenno saan ti bida iti sarita. Diak pay makita ti kina-Ilokano iti _____, _____ ken _____. No maipadas a maipatarus dagitoy iti Ingles ket mabasa dagiti Amerikano, diak la namnamaen a makitada ti identidad ni Ilokano ditoy.
Iti umuna a gundaway, adtoy nga ipabasami a dagus dagiti opisial a NAPILI A LIMA A SARITA ITI TAO KONTRA NAKAPARSUAAN tapno maiburayyo met dagiti paniriganyo ken pagur-urayan iti resulta ti pasalip:
Sangapulo ket Tallo a Lagip iti Sakaanan ti Kapitakan a Tanem – ni Aoanan Penem
Ni Kanor ken Siak iti Taaw – ni Mangngalapak
Pannubok iti Usok – ni Fely T. Pinili
Troso – ni Roman Antonio Dignos
Lapat – ni Amante A. Almirante
Asino ngarud ita ti mangabak iti umuna a gunggona? Daydiay kadi nangabak ti tao iti nakaparsuaan? Wenno daydiay kadi nangabak ti nakaparsuaan iti tao? Magustuanmi daydiay nangabak ti nakaparsuaan iti tao ngem mangabakto ti tao iti nakaparsuaan.
Patgenmi nga Agbasbasa, basaenyon dagiti sarita ta pilienyo no ania kadagitoy ti magustuan a mapadayawan iti umuna a gunggona.
Ala, iti laksid dagiti parikut a sangsanguenmi, dimi kayat nga abakennakami ti pannakaupay. Ituloymi latta ti pagrebbenganmi gapu iti ayat dagiti naanus a hurado, gapu iti ayat dagiti mannurat a sisasagana latta a makisalip, gapu iti ayat dagiti managtulong nga sponsor iti proyektomi, gapu iti ayat dagiti agbasbasa a sumarungkar iti pagtaenganmi, ken, gapu iti ayatmi a mangpabaknang iti Literatura Ilokana.
[MENSAHE: KADAGITI TOP 5 A MANNURAT – Pangngaasiyo man, Patgenmi a Mannurat, ta patulodandakami man iti nayat-atiddog a pakasaritaanyo iti biag.
KADAGITI READERS – Adtoy a mangtedkami iti clue iti kinasiasino dagiti autor dagiti lima a sarita. Maysa ti damona pay laeng ti mapadayawan idinto nga uppat dagiti napadayawanen iti pasalip ti RFAAFIL. Kadagiti uppat, maysa kadakuada ti napadayawan iti 6th RFAAFIL.]
Posted by rfaafil
at 12:01 AM EDT
Updated: Wed, Apr 1 2009 3:28 AM EDT