SUNGBAT KADAGITI MENSAHE ITI E-LOKANO MAIL
Mood:  sad
Topic: Dadduma Pay

Adtoy man ti sungbatmi ken ni Ms. L. M. Tumaneng iti mensahena a naawatmi iti E-lokano Mail. Agbasbasa ni Ms. Tumaneng ket kayatna koma a basaen ti sarita ni Noling Victoria a Ti Bagyo... Ti Atang... Ti Anglem. Kasapulanna daytoy iti term paperna.

No matandaanan, ti Ti Bagyo... Ti Atang... Ti Anglem ket maysa kadagiti tallupulo ket pito a sarita a naisalip iti RFAAFIL 2002-2003.

Kenka, Ms. Tumaneng, ladingitenmi nga ipakaammo a saanmi a mapatgan ti kalikagummo.

Kayatmi man nga ilawlawag nga awan karbengan ti RFAAFIL a mangaramat, iti uray ania a wagas, iti daytoy a sarita agsipud ta saan a napili daytoy. Dagiti laeng nangabak a sarita ti adda karbenganmi a mangipablaak wenno mangusar kadagitoy.

Numan pay napnuan ayatmi koma ti makatulong kenka, awan ti maaramidanmi gapu iti limitasion a parnuayen ti makunkuna a copyright.

Ulitenmi, Ms. Tumaneng, ladingitenmi no dimi mapatgan ti kiddawmo.

Iti sabali a mensahe, kastoy met laeng ti dawat ni SCV. Kayatna a basaen dagiti sarita a saan a nangabak iti pasalip. Kayatna a maidasig dagiti sarita a nangabak kadagiti saan a nangabak.

Kadagiti dadduma pay nga agbasbasa nga agkalikagum iti kastoy a banag, sapay koma ta maawatandakami. Urayenyo ketdi dagiti sarita - maipanggep iti panaggayyem - a mangabak iti maika-4 a tawen a panagpasalip.

PANAWEN KEN ATAKAJ
Mood:  happy
Topic: Dadduma Pay

Umuna a lawas ti Marso idi dumteng ti pamiliami tapno agbakasion ken makadennami. Gundaway tapno makaduami ida iti napaut bassit a panawen iti las-ud ti naunday a lima a tawen. Wen, manmano a kanito, manmano a gundaway.

Panawen ken ATAKAJ ti gapuna no apay a dimi na-update daytoy websitetayo iti daras. Saan ketdi a gapu iti napasamak iti pasalip. Pagustuanmi ngamin dagiti ubbing no kasta a makiinnagawda kadakami tunggal sanguenmi ti kompiuter. Uray idi agbakasionkami iti bukod a pagilian, kaskasdi met latta a dimi masango ti kompiuter. Adu gayamen dagiti surat a naipatulod babaen ti E-lokano Mail. [Agyamankami amin kadagiti nagsurat.]

Adu dagiti kayatmi idi nga aramiden ngem nagpartak ketdin ti panaglabas ti oras iti panagriknami. Iti umuna a gundaway a panagwidmi, dimi nasarungkaran ti Bannawag. Dikami pay nakaiggem iti baro a kopia ti Bannawag. Adda luksawmi. Ngem adda met ragsakmi no panunotenmi a nairuknoy ti kanitomi ken ATAKAJ.

Napeklankami nga Ilokano. Ilokanokami a nayanak ket Ilokanokam'to latta ingganat' tungpal biag. Ti panangipategmi iti bukodmi a pagsasao ti maysa kadagiti kangrunaan a gagaemmi iti biag. Ti panawenmi a nangbangon iti RFAAFIL diminto baybay-an, kas met laeng iti panawenmi ken ATAKAJ!

TOP 7 a Sarita ken Daniw iti RFAAFIL 2004-2005
Mood:  sad

Dagitoy dagiti sarita ken daniw a natda iti yakayakan dagiti hurado:

SARITA:
* Kumokultap - ni Inya P. Apura
* Ay, Maniyo'ta, 'Ding! - ni Manny Pinat
* Ma'am - ni Justin Jurado III
* Dagiti Proverbio iti Biag ni Maestro Modesto - ni Isagani A. Montero
* Adtoyak, ni Tranquilino Tacneng: Iti 28 Kadsaaran a Lubong - ni Sabas Rentiquiano
* Panagtimbog - ni Super Woofer
* Gagan-ayan - ni Val Balugo

DANIW:
* Sagidek Latta ti Kiday, www.rfaafil.com - ni Sumasaludo
* Rebolusion - ni Karit T. Pluma
* Haiku: www.rfaafil.com - ni Kunit Siwa
* Sarabuenka a Kayaw ti Mariing a Parparmatak - ni Nimbreza Romano
* Dara ti Pluma iti Agamang - ni Noli Me Tangere
* Agmanoka iti Patneng nga iti Niebe Nagramuten - ni Alma Inos
* WWW - ni J. Wordstar

Agsipud ta nabuntog ti resulta ti pasalip, maisanud ti deadline ti panagbutos para iti Reader's Choice Award. Maiwaragawagto dagiti sumaruno a maaramid iti daytoy nga award.

PAKAAMMO ITI PASALIP
Mood:  rushed

Asidegen ti kombension a pannakaited dagiti pammadayaw iti pasalip 2004-2005. Ammomi a magagaran unayen dagiti readers kangrunaanna dagiti nakisalip. Ngem ad-adda a dakami ti magagaran iti resulta ti pasalip. Addaytan a parikutmi ti panagisagana kadagiti sertipiko ken kangrunaanna unay ti RFAAFIL 2005 Reader's Choice Award.

Nupay napalalo a reggetmi iti resulta ti pasalip, awan met maaramidanmi no di ti aguray iti pangngeddeng dagiti hurado. Ala, ket iyan-anustayo biit. Umababa ket umababa ti pannakapili ti Reader's Choice. Daytoy a talaga ti makitami a parikut no naladaw ti panaggibus ti pasalip. Kasano no agilibrokami ita a tawen, saan koman a maikamkamakam.

Ngem tapno saan met a matuokan dagiti agur-uray, adtoy man ngarud nga ipadigomi dagiti Top 10 a napili ti maysa a hurado. Ulitenmi, daytoy ket pili laeng ti maysa a hurado. Ipakaammomi metten a naurnos dagitoy a naibase iti alpabetiko a panagsaganad dagiti paulo ti sarita a saan ket a ti ranggo dagitoy.

* Adtoyak, ni Tranquilino Tacneng: Iti 28 Kadsaaran a Lubong - ni Sabas Rentiquiano
* Apong Ilyan, Agkalkalesa - ni Juan Bautista
* Dagiti Proverbio iti Biag ni Maestro Modesto - ni Isagani A. Montero
* Gagan-ayan - ni Val Balugo
* Kasilpo ti Napalabas nga Anges - ni Verbum Domini
* Kumokultap - ni Inya P. Apura
* Maysakayo a Libro - ni Pintas T. Anaraar
* Saan a Lapped ti Saem iti Panagayus ti Panagserbi - ni Liwliwa T. Calingayan
* Serbi ti Parbangon - ni Remedios Gundran
* Ti Pila ken Ti Bibilan - ni Alma "Rose" Amor

Kayatmi laeng nga ipalagip nga agbaliwto ngata daytoy no mairaman ti pangngeddeng dagiti dua pay a hurado.

Aganustayo koma nga aguray, kakabsat!

DUA PAY NGA ENTRIES
Topic: Pasalip
Iti pannakaipablaak dagiti sarita a naisalip, dua nga entries ti nalibtawan a di inggaggagara. Maysa a sarita ken maysa a daniw.

Dagitoyda:

SARITA
GAKAT ni Dr. Pluma PhD

DANIW
W W W ni J. Wordstar

Kadagiti mannurat a maseknan, ladingitenmi daytoy a napasamak. Ipanamnamami a mairaman dagitoy a sarita ken daniw a lumaban para iti RFAAFIL 2004-2005.

RFAAFIL 2005 READER'S CHOICE AWARD
Topic: Pasalip

PADAANANYO!!!!!

OPISIAL A BILANG DAGITI NAISALIP
Topic: Pasalip

Pakauna: Basaen ti kompleto a listaan dagiti naisalip a sarita ken daniw iti RFAAFIL 2004-2005 iti www.rfaafil.com ken iti Marso 14 nga isyu ti Bannawag.

Duapulo ket dua (22) amin dagiti naisalip a sarita iti RFAAFIL 2004-2005. Husto daydiay pugtomi maipanggep iti bilang dagiti nakisalip iti sarita ita a tawen. Kinunami a basbassit ti bilang dagiti maisalip ita a tawen kompara iti napalabas a dua a tawen.

Iti met biang ti daniw, tallupulo ket siam (39) amin dagiti naisalip.

Iti panangbukitkitmi kadagiti amin a naisalip, makunami nga awanen naglabsing iti pagannurotan a kas itay napalabas a tawen. Nababaked ken napinpintas dagiti naisalip. Dagitoy ket bukodmi laeng a paliiw. Urayentayo ti makuna dagiti hurado kangrunaanna ti resulta ti pasalip.

Agyamankami kadagiti amin a nakisalip. Ken goodluck kadakayo amin!

NAISALIP A SARITA ITI RFAAFIL 2004-2005
Topic: Pasalip

Adtoy man nga irugimi iti maysa a pakpakatawa ti panangsirigmi iti sabali manen a sarita a naisalip iti Sarita 2004-2005.

Iti maysa a kalye iti siudad, ipukpukkaw ti magmagna a tindero ti "Balot, ballot, baloootttt!" Idi adda malabsanna a balasitang, nagsardeng ta immasideg daytoy kenkuana.

"Adda kadi lakom a penoy, manong?" sinaludsod ti balasitang.

"Adda a, `ding!" insungbat ti tindero ket imbabana a dagus ti bay-onna. Napartak a nangiruar iti itlog a penoy.

Ngem nagwingiwing ti balasitang ta saan met a gumatang. "Adda gayam lakom a penoy, manong," kinunana, "apay ngarud a dim' ipukkaw ti `Balooootttttt..... penooyyyyy!"

Nakudkod ti tindero iti saan met a nagatel a teltelna.

Ngek! Korni! Ngem no apay a rinugianmi daytoy panangsirigmi iti daytoy a sarita agsipud ta kastoy ti wagas nga inaramat ni naragsak a mannurat nga agkubkubukob iti sinsinan nagan a Manny Pinat iti saritana a "Ay, Maniyo'ta, `Ding!" Makapakatawa, makapaellek, makaparungiit, makapagarakgak ken no ania la ditan a mangpabukar iti bibig. Wen kabaelanna nga ited kenka ti nasam-it, a kas diro, a bangbangir nga isemmo.

Idi rugianmi a basaen ti sarita, nasaludsodmi a dagus ti bagimi no nayaw-awan kadi manen daytoy a sarita iti pasalip. Ngem napaneknekanmi a saan ta makitami met a tratarenna ti maysa a pagsapulan. Paulo pay laeng ti sarita ket mapugtuamon a pagsapulan ti ipaspasimudaagna. "Ay, maniyo dita, ading!" Agaw-awis ti aglaklako a gumatangka iti tagilakona a mani.

Kastoy man ti panaglako ni Pilo, ti bida, iti sarita.

"Ay, ading, maniyo'ta! Maniyo'ta!" Pinayapayan ni Pilo dagiti uppat a seksi nga agtutubo nga agpapada ti badoda: nakamaong iti nakipet ken nakabadoda iti nalabaga a venus cut a hanging ken nakasapatosda iti puraw a goma. "Mani, `ding, gumatankayon, kalluto! Naimas ken nalaka!" Kinermakermanna dagiti agtutubo.

"Naimas met laeng `toy manim, manong? Ti ammok ket babai laeng ti aglako iti naimas a mani, hi-hi-hi!"

"Ay, nakaim-imas, ading biutipul, kasla kaimas `ta isemmo!"

Saanen a pagduduaan. Narigat a putaren ti kastoy a sarita. Kasano a paglaokem ti panangray-aw iti panangitan-okmo iti maysa a pagsapulan? Kayatmi a sawen, no kayatmo nga itan-ok ti maysa a pagsapulan, seriosoka koma, apay nga agpakatawaka? Patienda kadi ti ibagbagam a maysa a serioso a banag ket ti met wagasmo a mangibaga ket ang-angaw, katkatawa. Daytoy ita ti pagbilibanmi ken ni mannurat. Kadagiti amin a naisalip, naisabsabali unay a klase daytoy a sarita. Dimi ammo no talaga nga inranta ni mannurat daytoy a wagas wenno talaga nga abilidadna ti agsurat iti kakastoy a sarita.

Topiko pay laeng, maipanggepen iti panagkatawa. Kas koma iti daytoy: Adda maysa nga aglaklako. Isursursurna dagiti tagilakona iti kalsada. Ipukpukkawna ti produktona kadagiti amin a malabsanna. Normal, saan kadi. Awan nakakatkatawana. Ngem ania ngata no ibagami a ti tagilakona ket maysa a lungon. He-he-he! Saanka kadi nga agkatawa? Ania ngata, susuonen kadi ni tindero ti lungon nga ilasatlasatna iti kalsada? Adda ngata mayat a gumatang? Saan ngata a palapalendaka iti tsinelas? Ibagada ngata nga agmauyongka? Uppppssss! Ammok, umis-isemkayo la ketdi iti bangbangir. Narigat ti umisem no tuppolka. Dim' kabaelan ti close-up smile.

Kuna ni Pilo, ti kangrunaan nga agbibiag iti sarita: "Dimo laisen ti mani, baket. Gapu iti mani, naam-ammoka. Gapu iti mani a sinungbatam ti ayatko. Agtaud iti mani ti pagbiaganta. No bumaknangta, gapunto met laeng iti mani."

Bimmaknang kadi ti pamilia ni Pilo iti panaglaklakona iti mani? Adtoy ti paset ti sarita a mangsungbat iti dayta a saludsod:

Manipud iti bodega, lima a babbai ken pito a lallaki a trabahadorna ti agkikinnissiim ken mangis-isem iti kaipinpinta ni Pilo a marka ti dyip iti ngatuen ti windshield: AY, MANIYO'TA, `DING! Sabali pay ti immarkana iti kutit ti luganna a TUBBOG TI MANI.

Nabsogkami a nangbasa iti sarita. Naka-relatekami met kadagiti pasamak. Talaga a naray-awkami. Istoriaek met koma dagiti nakakatkatawa a kapadasanmi iti biag- kas koma ti dimi malapitan a date iti uneg ti pagsinean, ti pannakaripar ti gurongmi iti lamiis ti airconditioned nga elevator, ti panangpagatang kadakami ti maestrami iti mami, ti kinaturtur-ogmi, ti makagat iti alimatek, ti mabitin ti kamisetana iti nangato a sanga, ti matnag iti kulluong ti baboy, ti ipalned ti nadagsen a palpal, ken adu pay - ngem saanen. Por delikadesa. Nakababain, nakakatkatawa. Ngem bilibak a talaga met ken ni Pilo, ta buttaw la ngaruden ti siortsna ket agpaparangen dagiti agsumbangir a pingping, sumrek pay laeng iti uneg ti banko tapno matungpal laeng ti nalpasen nga inkarina. Kasta man dagiti Ilokano, addaan iti palabra de honor.

Pagrukbabanmi ni mannurat iti likudan ti parbo a nagan a Manny Pinat iti makapaellek a saritana nga "Ay, Maniyo'ta, 'Ding!" ta nupay nagpakatawa, siento porsiento a nagballigi a nangitag-ay iti maysa a pagsapulan.

READER'S CHOICE AWARD: SALUDSOD KEN SUNGBAT
Topic: Pasalip

ADTOY TI ABABA A SALUDSOD:

Namin-adu ngatan a naawatmi daytoy iti E-lokano Mail. Kastoy man ti nagunegna.

Nasaysayaat koma a saan a maibutaktak ti pudno a nagan dagiti lima a mapili a sarita sakbay a mapili ti Reader's Choice. Ngamin, tapno saan a maimpluensaan dagiti mannurat dagiti readers a mangpili iti Reader's Choice wenno impluensiaan ni mannurat dagiti agbasbasa lalo no daytoy ket nalataken. Tapno patas ti labanan, ti koma pay la parbo a nagan ti maibaga agingga a mapilin ti umuna agingga iti maikalima a gunggona. Maipakat iti nalimed ken estrikto a komunikasion kadagiti lima a mapili tapno saan a sumngaw ti kinasiasinoda. Di kadi la mabalin apo a mapadayawan daytoy a suhestionmi?

DAYTOY TI ATIDDOG A SUNGBATMI:

Umuna unay, pagyamananmi dagiti kakabsat a nangiyarungaing iti daytoy a banag.

Sakbay pay nga impakatmi ti Reader's Choice Award, inadalmin a naimbag dagiti gannuatmi. Dayta a dalan ti sursurotenmi idi ken uray ita ken iti masakbayan. Malagipmi ita no kasano idi a napalapal daytoy a proyektomi. Ngem no saan a nabileg ti pundasionmi, nalabit natumba daytoyen a dagus iti umuna pay laeng nga addangna.

Confidentiality ti kasapulanmi tapno ad-adda nga agballigi ti RFAAFIL Reader's Choice Award. Isut' gapuna a kalpasan a mapili dagiti hurado dagiti lima a sarita, agbalin a nalimed ti isubmitirda a ranggo dagiti lima. Ideretsoda nga isubmitir dayta iti RFAAFIL. Isu pay a kaykayatmi a dida agsasarak iti personal tapno maaramid ti deliberasion ket iti laengen website ti RFAAFIL ti pagdadanonanda. Isu pay a kaykayatmi a saan a maibutaktak ti kinasiasino dagiti hurado agingga iti aldaw a pannakapadayaw dagiti mangabak. (Isut' gapuna a kunami pay, saanto a dakamaten ti RFAAFIL ti kinasiasino dagiti mannurat a nakisalip malaksid no napili ti saritana.) Iti sabali a bangir, uray estriktokami iti confidentiality, agbalin met a transparent dagiti pasamak a saan ketdi nga ilemlemmeng kadagiti agbasbasa kangrunaanna dagiti nakisalip.

Limmabankami metten iti Bannawag a dida koma ibunannag ti ranggo dagiti mangabak a sarita gapu iti Reader's Choice. Ngem paglinteganda kano ngamin, ken nakaisigudanen a mapaspasamak, nga iwaragawagda ti nagan ken puesto dagiti mangabak sakbay ti kombension tapno makapagsagana wenno agatendar kano ti nangabak a mannurat. Ammoyo no ania ti sungbatmi iti daytoy nga isyu? Kinunami a saanda la ngaruden nga iyar-aramidan iti press release dagiti nangabak, ta makaammon ti RFAAFIL a mangpakaammo kadagiti mannurat a mapadayawan. Ti inaramatmi iti kallabes a panaghurado ket nakabilbileg tapno maiggamanmi ti naan-anay a kontrol. Wen, awan makaibaga iti deretso no ania dagiti puesto dagiti sarita. Kadagiti hurado, adda laeng pamalpalatpatanda. Didanto met ammo ti kinasiasinno ti kaduada a hurado tapno damagenda no ania met ti nagbalin a ranggo daytoy. (Maragsakankami unay ta naaramid ti kallabes a press release a saan a nadakamat ti ranggo dagiti napili a sarita. Pagyamananmi ti coordinatortayo iti pasalip gapu iti daytoy a banag.)

Para iti pannakaammo ti publiko, adtoy a lukaisanmi ti maysa a banag maipapan iti Reader's Choice Award. Tinawen a no madanon ti awarding ceremonies, lima a sertipiko ti naiprinta para iti Reader's Choice. Nakasagana ti lima a sertipiko kadagiti lima a pagpilian a sarita. Dimi ngamin ammo no ania kadagiti lima ti mapadayawanto iti Reader's Choice. Agpatingga ngamin ti panagbutos iti kombension ket no close fight dagiti sarita, saganaanmi dagiti posibilidad. No asinonto ti mapili, alaenmi ti sertipiko para iti daytoy a sarita. Pigisenminto metten dagiti uppat a sertipiko a para kadagiti sarita a saan a napili dagiti readers. (Ngem kadagiti napalabas a dua a tawen, saan met a nagbaliw ti trend. Dagiti limmamang iti Internet voting, ad-adda pay a limmamangda idi maitipon ti bilang dagiti nagbutos nga awan aksesna iti kompiuter.)

Mapilpili dagiti sarita a mapadayawan iti Reader's Choice a nakawaragawagen ti pudno a nagan dagiti mannurat ngem nakalemmeng ti ranggoda. Ket no iti suhestion a nakalemmeng met koma ti kinasiasino dagiti autor dagitoy a sarita iti panawen ti panagpipili, narigat apo a patganmi daytoy a kiddawyo. Daytoy ti dakkel a rasonmi. Kadagiti agbasbasa nga awan aksesna iti Internet, usarenmi ti ipablaakmi a libro tapno daytoy ti aramatenda a mangpili iti magustuanda a sarita. Kayatna a sawen nga ilibromi a dagus dagiti sarita sakbay pay a mapadayawan ti sarita para iti Reader's Choice. No malagip, naipablaaken ti libro a SAGUT sakbay pay ti kombension. Kayatmi ditoy nga ilawlawag, a nasken a ti pudno a nagan ti mannurat ti maimaldit iti libro. Permanententon dagiti balikas a naikur-it iti libro ket dimi met ngarud kayat no parbo a nagan ti aramatenmi. (Ti tinawaen koma a panagilibromi ti gapuna no apay a 10 a sarita ti mapadayawan iti pasalip ngem napattog daytoy a banag gapu iti napalabas a tawen a lima laeng ti mapili dagiti hurado a maikari a mangabak. Nagtinnag a dua a tawen ti pasalip ti kasapulanmi tapno makairuar iti libro.)

Napintas koma ita a tawen nga aramiden daytoy a singasingyo ta awan met mairuar a libro. Mairamanto laeng dagitoy a sarita iti libro nga iruar inton sumaruno a tawen. Ngem, no aramiden daytoy, mapukaw ngamin ti consistency. Ad-addanton a makatikaw kadagiti agbasbasa a mayat a makipartisipar iti panangpadayaw ken ni mannurat.

Dagitoy dagiti rason no apay a saanmi a mapatgan ti kiddawyo ket sapay koma ta maawatandakami. Sapay koma ta nasamayen a wagas ti pannakailemmeng ti ranggo ti sarita tapno pilien ni agbasbasa iti sarita a magustuanna iti bukodna a panagraman. (Saan ket a kas iti pagam-amkan idi dagiti teddek iti literatura nga apay kano a kayatmi a pagdasigen ti pili dagiti hurado iti pili dagiti readers.)

Ipalagipmi manen kakabsat nga adda kontrol ti panagbutos nga isaysayangkatmi. Laglagipen nga adda bayad tunggal butos. Gundaway nga it-itedmi kadagiti naayat nga agbasbasa a makipartisipar ken tapno tumulong metten iti panagdur-as ti literaturatayo. Dagiti pagannurotan ken bambanag maipanggep iti Reader's Choice, urayen ti isagsaganami a pannakapili iti RFAAFIL 2005 Reader's Choice Award, wenno bisitaen laeng dagiti napalabas a dua a Reader's Choice.

Kadagiti napalabas a Reader's Choice Award (a nangabakan ti sarita a Kanta iti Sab-ok ti Agpakadan a Malen ni Agustin DC. Rubin ken ti Maysa a Linabag ti Biag ni Segundina De Dios ni Francisco T. Ponce), nagbalin met a naannayas dagiti pasamak. Sapay koma ta kastanto manen ita a tawen ken sapay koma ta adu manen nga agbasbasa ti makipartisipar ita a tawen. Namnamaenmi ti panagbutosyo iti RFAAFIL 2005 Reader's Choice Award.


PAKAAMMO: Padaananyo ti panangbukitkitmi iti sabali manen a napintas a sarita. Ti makapaellek nga "Ay, Maniyo'ta, 'Ding!" Amangan ta daytoyto a sarita ti sumaruno a mapadayawan iti RFAAFIL Reader's Choice Award. Padaananyo!

NAISALIP A SARITA ITI RFAAFIL 2004-2005
Topic: Pasalip

Adtoy manen nga isarunomi ti sabali pay a sarita a lumaban iti salip iti sarita.

ADTOYAK, NI TRANQUILINO TACNENG: ITI 28 KADSAARAN A LUBONG

Asino kadi ni Tranquilino Tacneng?

Immadayo tapno birokenna ti kaibatoganna iti sabali a lugar nga iti unos ti tallupulo a tawen a pannakaiyadayona, nagbalin a ganggannaet iti nakayanakanna a daga.

Kunana: "Nagsagabaak iti nakaro nga iliw iti pannakaipusingko iti daga a nakayanakak ngem gapu iti bilbilin ti naasi nga inak a nagramut iti panunotko, saan a nabaelan ti tallopulo a tawen a pinukaw ti anag ti kina-Ilokanok. Uray no maysaakon a makipagili iti ganggannaet a lugar, Ilokanoak a naipasngay, Ilokanoakto pay laeng nga agsubli iti tapok a naggapuak..."

Dayta ni Tranqulino Tacneng. Napaneknekanna a ti kinatan-ok ket adda iti sadino man a yan no ammo la ketdi nga ipateg ti bukod a kinatao...

9:15 ti Rabii, Pebrero 23, 2005

Wen, kaniak la a maysa, ti natan-ok a makipagili isu daytay saan a mangisukat iti kinasiasiona iti ania man a banag--kinabaknang, dayaw... Ania koma dagiti plake no saanka met a napudno iti bagim? Gabsuonandaka man iti plake wenno sertipiko no dimo ammo ti kinasiasinom, ken no dimo ammo ti agserbi iti amin a kabaelam uray nangato wenno awan naragpatmo nga adal, ania ti mamaayna?

9:17 ti Rabii, Pebrero 23, 2005

Napateg ti relo kadakami. Kasla dikami makatalna no awan relo iti takiagmi. Adda ngamin nangisagut kadakami iti relo ket kunana a tunggal mariknaminto ti pitik ti relo iti pulsomi, tunggal matmatanminto ti relo iti imami, panunotenmi kano a napategkami a tao kenkuana.

Kasta met ni Tranquilino Tacneng. Tunggal matmatanna ngata ita ti relona, maipalagip kenkuana dagiti adu a bambanag kangrunaanna ti de-oras a panagserbina iti kompania a nagtartrabahuanna. Maipalagip kenkuana a bigbigenda ti kinatan-okna.

Iti panangbasbasami iti sarita, makitami a matmatmatan ni Tranquilino Tacneng ti relo iti takiagna bayat ti panagurayna iti kangrunaan a pasetna iti programa- ti pannakaitan-okna.

9:25 ti Rabii, Pebrero 23, 2005

No napadasamon ti nagdiskurso, ammon nga iti panangur-uraymo iti batangmo, taldiapka la a taldiap iti oras. Bayat a matmatmatam ti relom, mabalin nga agsisimparat dagiti pampanunotem- napalabas, agdama wenno masangnguanan.

9:28 ti Rabii, Pebrero 23, 2005

Ti Adtoyak, ni Tranquilino Tacneng: Iti 28 Kadsaaran a Lubong ket maysa laeng iti dua a sarita a naisalip a mapnekkami iti panagtransisionna. Nabileg unay ti oras nga ipaspasimudaagna. Minatmatanmi met ti oras bayat ti panangbasbasami iti sarita.

9:32 ti Rabii, Pebrero 23, 2005

Ania kadi dayta 28 Kasaaran a Lubong iti paulo ti sarita? Dayta ti natan-ok a pagsapulan ni natakneng a Kilin (a.k.a. Tranquilino Tacneng). Umuli-umulog nga elebeytor iti duapulo ket walo kadsaaran a pasdek.

Maysa manen a nasiglat a mannurat a naglemmeng iti parbo a nagan a Sabas Rentiquiano ti akimputar iti sarita nga "Adtoyak: Ni Tranquilino...." Pulido ti pannakasangalna. Nisupsupadi iti kaaduan kadagiti sarita.

Napigsa daytoy a sarita a lumaban iti kinatan-ok ti maysa a pagsapulan.