Mood:
a-okTopic: Pasalip
GAPU laeng iti ayat ken kalikagumyo, Patgenmi nga Agbasbasa, isu nga lukaisanmi amin dagiti daniw a naisalip iti RFAAFIL 2005-2006 para iti tema a panaggayyem. Awan karbenganmi kadagitoy a daniw isu nga umanayen a maysa laeng nga stanza wenno uppat a linia ti iparangmi para kadakayo. Adtoy ngarud dagiti daniw:
MALAGLAGIPKONTO LATTA TI KAADDAM
malaglagipkonto latta daydi isasangbaymo iti maysa
nga agpakpakadan a malem nga agmaymaysaak
a mangun-unor iti lasonglasong ken killokillo a dana
a nakaitublakak iti namin-anon a daras ngem kinibinnak
iti nalinteg ken patag a dalan nga iti agsumbangir
nga igid umayamuom dagiti naruay a sabsabong.
AGBIAGAK ITI LUBONG TI PUSOK
Ti pusom, gayyem, kasingin ti pusok.
Dita, agparang ti pudno – no kasano
A marisam biagmo iti maris, umno.
Dita, matukod laingmo
Kas maysa nga anghel ti kinapudno.
ISTRAPO KEN KATTUKONG
nailagalaga ti istrapo iti kalipkip ti kattukong
a kasla naabel-abel a sariugma ken daniw
ken nagkallautang dagiti himno ken kurditan
uman-anagaag dagiti layap iti agdardara a wagayway
NAPATEGKA A GAYYEM
Diakto malipatan unos iti panagbiagko
Iti adda kenka, natan-ok a kananakem
A parabur ti Namarsua kenka a naikawes
Naimbag a galad, ken napateg a Gayyem.
SIKA
Iti isasangbaymo iti biagko
Rimmungbo ‘toy lubongko
Addan sa gingginammolmo
Sangabakruy a kanayon ti isemko.
NAUKRAD A DAKULAP
Taklin ti sudi
Kimmaramay a ling-et
Ubbog ti ayat.
DIKEN
Dagiti nagarimayang a lua ti ulimek
Dinto magawgaw dagiti labaan
Ken gelgelenta a mansa
Ti daradara a saem dagiti lagip.
PANAGBALLASIW
Ngem uray kadagiti bituen, no kitaem,
Buyugan ti kudrep ti rimat;
Ti panagsindi, ti panagiddep,
Nga isu ti pagaayat
A tangaden dagiti agdaldaliasat.
GAYYEM SABAS
inakaran dagiti agtukiad a luam awanan gaway a matak
a mangigawid agpilit nga addang ti panunot
a, ta guyodennak ti naisem a kalman ti panagsabatta.
TI GAYYEMKO ISU TI KABUSORKO
NADISKALIPIKA: Naglabsing iti pagannurotan.
GAYYEM ITI AGNANAYON
A nagur-uray kenka: nagsubli ka
O, anian a ragsakko!
Daydi karim a naitagbat idiay bato
Awan-duadua a tinungpal mo
SIKA TI KAPUTOLKO
insagutmo
ti biagmo gapu iti basbasolko
sika ti kaputolko
ANDINGAY
Patgenmi a mannurat, nupay nairaman kadagiti listaan ti daniwmo, matungpal ketdi ti kalikagummo a saanen a lumaban daytoy a daniwmo.
TI PAGAYAMKO
ti pagayamko nabanglo
makaay-ayo a minuyongan
minuyongan a napnuan daeg ken ranga
a minuyongan a napno iti sabsabong.
NAIMPUSUAN A GAMENG
Walo a maris ti bullalayaw
Ladawan ti panagkakaddua
nga addaan maymaysa a sarita
Pinatibker ti panawen
MONUMENTO
NADISKALIPIKA: Naglabsing iti pagannurotan
RAY-AW TI NAPATEG A GAYYEM
Dagus a limmangto arapaap iti kaunggak
Linabag ti biag, nagtuloy a nagsantak
Nagungar ti naliday a kalman a manakanak
Nangparegta masmasnaayan a kararuak!
TI GAYYEMKO A MANNANIW
uray no agpakapaken ti duog a kayo
dika agdanag, gayyemko a mannaniw:
saan a kinabaelan a paglumenen
ti panawen dagiti naikitikit a nagan iti puonna.
umaykan, umaykan, dika agbatbati:
ti plumam, nabuslon pay ti tintana
“UR-URAYENKA”
Naunday a panawen, kaaddam iti sidongko
Diak naipapas, impaidam naglabas a kanito
Pimmanawka’t arpad, awan pulos sintimekmo
Ur-urayenka, ngem awanka a mapasangbayko?
PATGEK A PAGAYAM
Karik ken ibaga, a dikanto pulos baybay-an
Namnamaem a ditoy arpad, dikanto lipatan
A tarabaymo iti tunggal darikmat, pangiwanwan
Patgek a pagayam, sapay ta dinak panawan.
SIKA KEN SIAK
NADISKALIPIKA: Naglabsing iti pagannurotan
KALLABAY KEN NI KABSAT ITI PLUMA A TEDDEK TI LITERATURA ILOKANA
Udaudakto latta dagiti kalye ti laglagip
A paglakuanta’t sibibiag a tagtagainep
A ray-aw namuonan sam-it kanta ni Ilokano!
SAANEN A KAS IDI, BUDDY
Adun ti nabaliw iti tiempo buddy,
Saanen a kas idi a nawayata,
A mapan sumargo iti 9 ball ti kinaagtutubo,
Naragsak. Narikut. Nagulo.
DARA KEN LASAG
NADISKALIPIKA: Naladaw a naipatulod babaen ti e-mail. Pebrero 2, 2006 idi maawatmi iti e-mail.
AGPAINGKA ITI SALINDEG TI PAKUMBABA
Adda ketdi ti bendision iti imam
gaudam a taktikat’ pannakaisalakan
nasken a birokem talingenngen
iti silulukat a salindeg ti pakumbaba
___________________________
MESAHE: Agyamankami amin kadagiti mannaniw a nakisalip. Nayawaten kadagiti hurado dagitoy a daniw. Bisitaenyo laeng ti rfaafil.com tapno maammuanyo dagiti mapaspasamak iti pasalip.
