Mood: cool
Topic: Literatura
SAANKAMI a mannurat no di ket mannurotkami laeng kas nakunamin. Ad-adda ngata nga agbasbasa ti akemmi kadagiti sinurat. Ngem padpadasenmi met ti agkur-i-kur-it. At least, we keep on trying, kunami man.
Kas maysa nga agbasbasa, adun dagiti sarita a nabasbasami. Adda met bukodmi a panirigan. Adda met bukodmi a panagraman. No adda dimi kayat iti maysa a sarita, no mabalin, saanmin a dakamaten, saanmin nga usigen. Ad-adda a kitaenmi ti pagpigsaanna kas met ti panangkitami kadagiti nasayaat a bambanag iti maysa a tao a saan ket a ti pagkuranganna.
Adtoy man ngarud a lukatanmi ti blag iti panunotmi, kablag, tapno iburaymi dagiti sarita, (sibubukel a sarita wenno pasetna laeng) a magustuanmi. Dagiti sarita kadagiti napalabas a pasalip ti RFAAFIL.
* DUMA TI MARIS TI DARA
Naruamen ni Emong iti kasta a konsierto tunggal parbangon. Ngem kellaat a nagtaul ni Brownie. Kasla nadugsak daytoy nga adda kabutengna. Madamdama pay agtagtaguoben. Dayta ti nakariingan ti anakda ken Lourdes. Nagibit ti duat' tawenna nga ubing ngem saan a napuotan ni Lourdes. Pinikpikan ketdi ni Emong tapno sumardeng. Idi saanna a mapasardeng, binagkatna daytoy. Ket ditana a naammuan a nabara ti ubing, adda gurigorna. Riniingna ni Lourdes. Masarakan daytoy iti rugi ti sarita.
Daytoy met ti mabasa iti dandanin panaggibus ti sarita: Arigna ti saan a nakaturog iti agpatnag. Nalukag iti panagpayakpak ti kawitan a nagtaraok. Sinaruno dayta ti dadduma pay a kawitan iti aglawlaw. Ulimek ti nagari sa idi kuan nagtaul ni Brownie. Bimmaringkuas ni Emong ket inkeddengna ti mamarbangon a mapan iti ospital. Agsisinnublaten dagiti panagtaraok dagiti kawitan iti asideg ken adayo. Riniingna ni Lourdes.
"Apay?"
"Mapanta idiay ospital."
"Ambagelka!" imbugtak ni Lourdes.
"Adda rebbengek 'ta kabsatko," inyalumamayna.
BLAG TI ISIPMI: Magustuanmi man ti panagtaul ni Brownie iti daytoy a sarita. Adda bileg ti taul ti aso a mangkalbit iti konsensia ti bida a kabsat. Ti panangriingna iti asawana ket kas met laeng panangriingna iti pannakairidep daytoy tapno masursurona met ti manglipat ken mamakawan.
* OSTIA
Sinumaria dagiti tao: Awan kaduayo, father. Nawatiwat met ngarud. Koma no makadanon ditoy ti semento ken elektrisidad. Nagkatawa laeng: Awan ti matakawda kaniak. Idi pampanurnorenen ti pick-up ti pagsikuan, nasilawanna ti nakabalangan a kayo. Rimkuas ti tallo nga anniniwan. Naluktan ti ridaw ti lugan. Nanalteek ti teltelna.
Daytoy kadi ti gunggona ti uppat a pulo a tawen?
"Bihisan natin?"
Umayka ket surotennak.
"Ganito ang ginagawa ni bossing sa Mindanao, father. 'Sensya na, tao lang. Napag-utosan!"
Binaybay-andak kadi?
"Kilala mo ba si provincial commander?"
Addaak iti amin a puso.
"Syimpri, diri!" (Siempre, saan!)
Dakayo laeng ti nagpaadipenak.
"E, ang ilap-ilap daw neto sa Mindanao e."
Baklayem ti krusko ta maitan-okka iti pagariak.
"Laglagka, lakay. Dinadaelmo ti panguartaan ni bossing idiay."
Kukuayo laeng ti aminko, ti kararuak.
"Sige, tanggalan natin ng bayag `to. Katulad ng mga duwag."
Nakalaglag-anen ti riknana. Naglulok dagiti susuopna. Nabukra dagiti dakulapna ket naregreg ti napirpirsay nga ostia.
Maikanem wenno maikapito no dikami mariro ti nagpuestoan daytoy a sarita kadagiti hurado. Sapay koma ta maawatannakami ti autor no dakamatenmi man ditoy ti maudi a paset ti saritana.
BLAG TI ISIPMI: Napnekkami kadagiti pannakailadawan dagiti lugar ken pasamak. Nagustuanmi ti sibubukel a sarita. Nangnangruna ti dinakamatmi a paset. Sumungsungbat ti isip ti bida a padi kadagiti sasawen dagiti nangsaed kenkuana. Ket ti napirsay nga ostia, nagpintasen a simbolo ti panagsakripisio. Ah, ngem kadagiti hurado, agsapsapulda ngata iti baro a raman, ta ti panagsakripisio ket gagangayen a banag iti maysa nga adipen ti Dios. Nupay kasta, patienmi nga iti biag ti tao, kaludludonna a talaga ti panagsakripisio.
* KANTA ITI SAB-OK TI AGPAKADAN A MALEM
Annay, pusok, annay, annay
"URAY la koma no sangkasilong," kinunam idi ket nakitak ti perlas a nagayus kadagita pingpingmo. "Dimo a maitugot ti sanikua wenno kinabaknang iti Sakaanan ti Namarsua!" inyan-andingayko kenka idi. Inawidko `ta ulom ket insubsobmo `ta rupam iti barukongko. Inam-amuyko idi `ta buokmo. Inyangadmo `ta rupam kalpasan ti sumagmamano a minuto. Nagsabat idi dagiti matata. Napaut. "Wen, napatpateg ti nabiag a daga ngem ti tawidko koma a daga. Wen, tatangda, ta sika ti pinilik," nakitak a nalapgis a naminpinsan ti ladingitmo.
BLAG TI ISIPMI: Adu dagiti nabalitokan a paset ti sarita ngem daytoy man ti magustuanmi unay a paset. Asideg daytoy a pasamak iti pusomi. Kadakami, kablag, napateg ti prinsipio, ti dayaw ken kinatao a saan ket a ti sanikua. Saanak ngarud a masdaaw no apay a nagustuan dagiti agbasbasa a kas kadakami daytoy a sarita. Nabileg ti sibubukel a sarita a mangmuli iti kinataomi.
* CHAMP
Malikudanna ti nakangaton nga init. Immanges iti nakaun-uneg ni Jun sana inruar ti angesna iti nakain-inayad. Nalagipna ti adda sadi ngato... Tarabayennak, Diosko! Nataldiapanna ti coachna iti pingir dagiti pagrubuatan a lanes. Pinerrengna! Saan nga umis-isem ngem nakangato ti maysa a tanganna. Nalagipna manen ti medalia a balitok.
"ON YOUR MARCH!!!" pagamuan nangngegna ti gimluong a naipukkaw. Sa naigiddato a naipaturong ti sinan-paltog iti tangatang. Nagplastar a dagus. Kasla umapuyen ti intero a bagina a kunam la no makina ti agganat a tumayab nga eroplano a para gubat. Magagaranen dagiti dapanna. Mangngegna dagiti nadadagsen nga anges-anges dagiti kaab-abayna.
"GET SET!!!"
Inkidemna. (Uray awanen dagiti imahinasion ti bida iti daytoy a paset. Makaanayen kadakami a nagkidem.)
BANG!!!
BLAG TI ISIPMI: Nangabak kadi ni Jun? Dayta ti saludsodmi iti sarita kalpasan a nabasami. Nasarakanmi ngarud ti sungbat iti paulo ti sarita. Wenno dependen iti agbasbasa no ania ti panunotenna a mapasamak. Amin a ganuat nga irugimi, kablag, saan pay a nagkanalbuong ti go signal, patienmin a dagus nga agballigikami. Napaneknekanmin a nabileg daytoy a wagas aglalo iti karera ti biag.
* MAYSA A LINABAG TI BIAG NI SEGUNDINA DE DIOS
Dimteng ti rabii. Agmaymaysaka ita iti nadaeg a kuarto. Saanka a makaturog nupay nabannogka a nagbiahe. Iti kuarto a pagid-iddaam a nakawangwang ti tawana, binuybuyam ti kabus a bulang nga umusok-usok kadagiti naingpis nga ulep. Kutkutkoten ti lagipmo iti napalabas. Daydi purokyo a Napo. Daydi tatangyo a pimmusay nga agkabanuag. Daydi kalapawyo. Daydi panagbiagyo a nakurapay. Saanmo a mapengdan dagiti luam a manaraigid kadagiti matam.
BLAG TI ISIPMI: Talaga nga alun-onennakami man daytoy a paset ti sarita. Wen, ta kas met kadakami, kablag, adda met dagiti kanito nga agmaymaysakami. Dagiti kanito nga agpampanunot ti panunotmi iti man napalabas wenno iti masanguanan. Ngem nagdumakami ken ni Segundina, ta saankami a napaay iti ayat ti kaayan-ayat. Ah, idi pay laeng, naawatmin a pagrebbengan met gayam ti agayat. Nabayagen a naawatmi nga umanayen nga ipategmi ti nangisuro kadakami nga agayat. Ta dakami ket simmangbaykami ditoy lubong gapu ken ayat.
Adu pay dagiti sarita wenno paset dagiti sarita iti RFAAFIL a magustuanmi a kas agbasbasa. Maibilangen ditoy ti: Ti tanem a nadakamat ti sarita a Bukod a Daga; ti prinsipio no di man pride ti bida iti 'Sumasayyo'; ti kinatalna wenno kappia a mensahe ti Ti Sagu ni Ama Beren; ti agbalin nga ama iti Opcel; ken dadduma pay.
Dagitoy dagiti sarita a nakablag iti isipmi. No apay a dagitoy ti mapilimi, asidegda ngamin iti pusomi wenno iti pasamak ti biagmi wenno iti prinsipiomi.
Wen, adunto pay dagiti sumaruno a sarita a maiblag iti panunotmi. Sabali laeng dagiti agtultuloy a sarita ti biagmi a maiblag iti inaldaw iti nanumo nga isipmi.