Topic: Dadduma Pay
KOMUSTA itan ti RFAAFIL? Saludsod a nalaka laeng a sungbatan. Mabalin a kunaen nga: "Naimbag. Adtoy, sibibiag pay!" Sibibiag pay ngem kaludludon dayta a biag ti rigat. Kayariganmi daytay maysa nga ama a marigatan nga agpator iti anak. A, saan a barengbareng. A, saan nga ang-angaw ti biagmi iti lubong ti RFAAFIL. Kasano kadi a nayanakkami? Gapu iti pammateg iti pagsasao a nariinganmi.
Idi mangrugrugikami, pakaseknanmi no agtuloy met laeng ti angesmi. No adda met laeng mayat a mannurat a mangbiag - makisalip - kadakami. Ket saankami a napaay. Ta dimteng dagiti ayat ket saranay. Daytoy latta ti pakaseknanmi tunggal mangrugi ti pasalip.
Komusta ti maika-8 a tawen a panagpasalip? Naannad manen ti panagpilimi iti tema. Daydiay saludsodenmi ti bagimi no adda kadi met laeng makisalip no daytoy ti tema nga idasarmi. Nabayagen nga adda iti panunot ti sarita koma a para ubbing. Ah, ngem ta adda metten nakauna kadakami. Narigat met no tuladenmi ta dinto ket mabingay dagiti mannurat a makisalip. Gapu ta awan mapanunotmi a tema para iti daniw, agbanag ngata a nawayanto ni mannaniw iti tema ti daniwna. Iti met biang ti sarita, natinongmin ti panunotmi a Sarita a Pantasia [Fantasy Story] ti mapagsasalipan iti 8th RFAAFIL (2009-2010). Alla, ket walo gayamen ti tawenmi!
Itay napan a tawen, rinugianmi ti maysa a benneg a para kadagiti agdadamo gapu met laeng iti singasing dagitoy. Ngem, komusta itan daytoy a benneg? Nakaturogen. Addan sa tallo nga agdadamo a mannurat a nakipartisipar iti daytoy a proyekto. Kalpasanna, awan metten. Ania pay ngarud ti maaramidanmi? Awan met mangnayon iti angesmi. Itay napan a tawen, naparaburan dagitoy tallo nga agdadamo a mannurat iti sertipiko ti A.N.A.K. - libre a panagatendar iti kombension ti GUMIL Filipinas babaen iti ayat ken tulong dagiti esponsor a masarakanmi. Saan a nakaatendar dagitoy a mannurat. [Iti daytoy a gundaway, ipakaammomi a no bilang addanto gundaway dagitoy a makitabuno iti kombension, pakaammuandakaminto koma ta maipaay met laeng daytoy a sertipiko kadakayo.]
Komusta met itan ti A.N.A.K. ti RFAAFIL? Tinawenen daytoy a mapaspasamak manipud rugina idi 2005 ken agtultuloy latta. Adda metten mabilang nga agdadamo a mannurat a nagbalin nga A.N.A.K. ti RFAAFIL. Pagyamyamanan kadagiti naayat nga esponsor a tumulong iti daytoy a gannuat. Pagyamyamananmi ti PAYPAL a nawaya nga ar-aramatenmi nga umawat iti tulong nga ipaay dagiti esponsor. Naragsakkami para kadagiti maesponsoran nga agdadamo a mannurat ken naragsakkami nga agyaman kadagiti managparabur nga esponsor. Ngem saan a naan-anay ti ragsakmi. Adda birbirokenmi. Adda kurang daytoy a proyektomi.
Ladingitenmi nga ibaga a sipud nangrugi ti A.N.A.K., awan pay kombension a naatendaranmi. Narigat kadi ngata no madakamat bassit ti nagan dagitoy nga esponsor iti kombension? Kayatmi laeng ti transparency. Mano kadi ti makaammo iti A.N.A.K.? Nalabit mabilbilang. Kadagiti kallabes a kombension manipud 2005, kasla ita laeng a tawen nga adda souvenir program no saankami a nagbiddut. Ket wen, maragsakankami unay ta adda wagasmi a mangipakaammo kadagiti esponsor a naidanon ti ayatda kadagiti agdadamo a mannurat. [Iti sabali a bangir, adtoy man ti one-page ad ti rfaafil iti souvenir program ti GF Convention 2009.]
Para kadakami, saan nga umanay ti pannakaimaldit ti naganda iti panid laeng ti rfaafil.com. No adda koma pabor a dawatenmi iti Bannawag, uray daytoy la koma pannakaipablaak sangkabassit ti A.N.A.K. kas pammaneknek wenno mangted ragsak kadagiti esponsor. Bareng mangrikna dagiti maseknan ket matungpal daytoy arungaingmi. [Kas tay, panangipablaakda iti pagannurotan ti pasalipmi a dimi inkalbit kadakuada. Addayta pay ti dadapilan.com a mangirakrakurak kadakami a dimi impakaasi. Trivia: Almost 50% of rfaafil readers come from the site dadapilan.com.]
Komustan ti SAGUTmi, dagiti SAGUTmi? Addayta a pangted pay laeng dagitoy. Saanmi pay nga naikupin dagiti panidna. Gapu kadagiti saan a napakpakadaan a pasamak ngem patienmi a dumtengto ti pannakairingpasna. Ta napateg ti SAGUT kadakami, ta awanto ti danagmi no bilang man mabura ti pagtaenganmi iti Internet, naimalditton iti SAGUT dagiti nagunegna.
Komusta metten ti pasalip ti RFAAFIL iti Internet? Kas umuna a pasalip nga agaramat iti Internet, isu koma ti kapapaspasan a malpas ti resultana. Ngem narigat latta a mapasamak ti kayat. Adda met latta dagiti mannurat a di pay naglupos iti sidong ti makinilia. Ngem maragsakankami a mangibaga, nga umad-adu metten dagiti mangipatpatulod iti pakisalipna babaen ti e-mail. Narigat a pagkaykaysaen dagiti naisalip. Malaksid kadagiti naisalip, addayta pay ti parikut maipanggep kadagiti hurado. Saan kadi koma a nalaklaka a pagtutugmoken dagitoy iti Internet? [Apo Hurado, nakamaldit dagiti sarita iti website ti RFAAFIL. Nawayakayo latta a mangukag kadagitoy no daytoy ti kaykayatyo a wagas.]
No adda man agkuna a pasalipkami iti Internet, sikami pay ti maud-udi, saan a dayta ti pakaseknanmi. Ammomi nga adda met saguday a naisalsalumina kadakami nga awan iti sabali. Saan a nasakit ti bakrangmi, ta ammomi no sadino ti pagpatinggaan ti kabaelanmi. Saanmi a piliten ti bagimi no dimi a kabaelan ti sapsapulenda kadakami.
Naimbag ta adda daytoy a website a pagdadanonan dagiti nakisalip. Naimbag ta adda daytoy a blog a bisitaen dagiti agbasbasa a mayat a mangammo kadagiti mapaspasamak iti pasalip ti RFAAFIL.
AWAN kadagiti nadakamatmi iti ngato ti ad-adda a pakaseknanmi. Sipud pay ngamin nayanak ti RFAAFIL, sapsapulenmi pay laeng agpapan kadagitoy ti agbalin nga opisial a logomi. Bareng addanton mapilimi inton dumteng ti maikasangapulo a tawenmi. Komustanto ngatan ti RFAAFIL?
